“Ko e Fale Fakafaivaʻi ʻo e Folofolá,” Kaumeʻá, Siulai 2024, 14–15.
Ko e Fale Fakafaivaʻi ʻo e Folofolá
“Fēfē kapau te tau toʻo mai ʻa e puha ki he Sāpaté?” Ko e fehuʻi ange ia ʻa Soní.
Naʻe hoko ʻa e talanoa ko ʻení ʻi he ʻIunaiteti Siteiti ʻo ʻAmeliká.
“ʻOku ou taʻeoliʻia.” Naʻe tokoto ʻa Soni ʻi he faliki ʻo e loto falé.
Naʻe sio fakamamaʻu hono tuofefine ko Sená ki tuʻa he matapā luvá. Naʻá ne pehē mai, “ʻOku hala ha meʻa ke fai.”
Naʻe sio hake ʻa Soni ki he ʻaofí. Ko e hā ʻoku taʻeoli ai ʻa e ngaahi ʻaho Sāpaté?
Naʻá ne fakakaukau leva ki ha meʻa. “Fēfē kapau te tau toʻo mai ʻa e puha ki he Sāpaté?” Ko e fehuʻi ange ia ʻa Soní. Ko e puha ki he Sāpaté ko ha puha makehe ia naʻe fonu ʻi he ʻū meʻavaʻinga maʻá e ʻaho Sāpaté.
Naʻe malimali fiefia ʻa Sena. “Fakalata ia.”
Naʻe fakatovave atu ʻa Soni mo Sena ki he loki ʻo Mamí. Naʻá na toho atu ʻa e puhá ki he loto falé.
“Ko e hā e meʻa te ta kamata aí?” Ko e fehuʻi ange ia ʻa Soní. Naʻá ne fakaava e puhá ʻo toʻo hake ha ʻū tohi fakatātā mo ha ʻū kaati vaʻinga.
Naʻe pehē ange ʻe Sena, “Ta kamata he vaʻinga fakatauhoa ʻa e kau moʻungaʻi tangatá.”
Ko e vaʻingá ko ha ʻū kaati fakatātā ʻo e kau palōfita ʻi he Tohi ʻa Molomoná. Naʻe fakafoʻohifoʻi ʻe Sena ʻa e ʻū kātí ʻi he falikí. Naʻá na taufetongi ʻi hono fili e ʻū kātí mo feinga ke maʻu e ʻū kaati ʻoku hoa mo iá.
Naʻe toʻo hake ʻe Soni ha ongo kaati kehekehe ʻe ua ʻoku ʻasi ai ʻa e ʻEikitau ko Molonaí. Naʻá ne kaila, “Kuó u maʻu ha tatau!”
“Mo au pē!” Naʻe pukepuke hake ʻe Sena ha ongo kaati ʻoku hā ai ʻa Selaia.
Naʻe toe vaʻinga pē ʻa Soni mo Sena ʻi ha ngaahi takai. Naʻe fakalata ʻa e fakakaukau ki he ngaahi talanoa mei he Tohi ʻa Molomoná ʻokú na saiʻia taha aí.
Hili ha kiʻi taimi siʻi naʻe pehē ange ʻe Sena, “Ta hoko ki ha meʻa ʻe taha.”
“Sai. Ta fakatātaaʻi ha taha ʻo e ngaahi talanoa fakafolofola ʻokú ta saiʻia taha aí. ʻE ʻai haʻata fale fakafaivaʻi ʻo e folofolá!” Naʻe kamata ke toʻo hake ʻe Soni ʻa e ʻū kātí.
“ʻIo!” Naʻe tokoni ʻa Sena ki hono tānaki ʻo e meʻavaʻingá ke faʻó.
Naʻe hua ʻe Soni ʻa e puhá ʻo ne maʻu ha ʻū teunga ʻe niʻihi. Naʻá ne toʻo hake ha pulupulu fulufuluʻi manu lanu melomelo ʻo tui. “Ko Samuela au ko e Tangata Leimaná!” Naʻá ne puna ki he funga seá ʻo hangē ko Samuelá, ʻo akonaki mei he ʻā ʻo e koló.
Naʻe fakaava ʻe Sena ʻa e tohi fakatātā ʻo e Tohi ʻa Molomoná. Naʻá ne fekumi ʻi he ngaahi pēsí ʻo aʻu kia Samuela ko e tangata Leimaná. Naʻá ne lau leʻolahi ia kae fakatātaaʻi ʻe Soni ʻa e talanoá.
Naʻe toutou akoako fakahoko ʻe he fānaú ʻa e talanoá. Naʻe ongoʻi loto-māfana mo fiefia ʻa Soni. Naʻe fakafiefia ke manatuʻi ʻa e kau palōfita naʻa nau akonaki fekauʻaki mo Sīsū Kalaisí.
ʻI heʻena ongoʻi mateuteú, naʻe lele ʻa Sione ʻo ui ʻa Mami, Teti, mo hono kiʻi tuofefine siʻisiʻi ko Makená. “Haʻu ʻo sio ʻi heʻema faivá!”
Naʻe tuʻu ʻa Sena ʻi lotomālie he lokí ʻo fakamafao hono ongo nimá. “ʻOku ma talitali lelei kimoutolu ki homa fale faiva fakafolofolá. Te ma ʻoatu he ʻahó ni ʻa e talanoa ʻo … Samuela ko e Tangata Leimaná!”
Naʻá ne kamata leva ʻa e talanoá. “ʻI he kuonga fuoloá, naʻe haʻu ha palōfita ko Samuela ke akoʻi e kau Nīfaí …”
ʻI he aʻu ki he taimi ʻo Soní, naʻá ne tuʻu hangatonu ʻi he seá. Naʻá ne kalanga leʻo lahi “Ko Samuela au, pea ʻoku finangalo ʻa e Tamai Hēvaní ke mou fai ha ngaahi fili ʻoku leleí. Tuku hono fai ʻo e ngaahi meʻa ʻoku koví. Koeʻuhí ʻe ʻaloʻi ʻa Sīsū Kalaisi hili ha taʻu ʻe nima.”
Naʻe pehē ʻe Sena, “Naʻe ʻia Samuela ʻa e mālohi ʻo e ʻOtuá.” Naʻe fakaʻosi leva ʻene fai e talanoá. ʻI heʻene ʻosí, naʻe pasipasi ʻa Mami, Teti, mo Makena.
“Naʻe sai ʻaupito ia!” Ko Mami ange ia.
Naʻe punou ʻa Soni mo Sena. Naʻá na malimali fiefia.
Naʻe pehē ange ʻe Soni, “Ta toe tulamaʻi ha foʻi talanoa ʻe taha.”
Naʻe pehē ange ʻe Mami, “Te mau fiefia ke sio ʻi ha tulama ʻe taha.” Naʻe pasipasi ʻa Makena mo malimali.
Naʻe lele foki ʻa Sena mo Soni ki he puha maʻá e Sāpaté ke maʻu mei ai ha ʻū teunga lahi ange.
“ʻOku fakalata ʻa e ʻaho Sāpaté!” Naʻe pehē ʻe Sena, “ʻOku ou saiʻia he ako fekauʻaki mo e folofolá.”
“Pea mo Sīsū.” Naʻe malimali ʻa Soni ʻi heʻene maʻu ha toe teunga ʻe tahá. Naʻe makehe moʻoni ʻa e ʻaho Sāpaté!
ʻŪ tā fakatātā ʻa Shawna J. C. Tenney