“Ko Ha Talanoa mo ʻĀlani fekauʻaki mo e Ngaahi Tefito ʻo e Tuí,” Kaumeʻá, Siulai 2024, 40–41.
Ko Ha Talanoa mo ʻĀlani fekauʻaki mo e Ngaahi Tefito ʻo e Tuí
Ko e haʻu ʻa ʻĀlaní mei Malaka, Sipeini. Naʻa mau ʻeke ange ha ngaahi fehuʻi fekauʻaki mo e founga naʻá ne ako ai ʻa e Ngaahi Tefito ʻo e Tuí.
Fakamatala mai kau kiate koe.
Ko hoku taʻu valu ʻeni. ʻOku ou fie hoko ko ha saienisi mataotao ʻi heʻeku fuʻu lahí. Ko e lanu ʻoku ou saiʻia taha aí ko e lanu molí, pea ko e meʻakai ʻoku ou saiʻia taha aí ko e tortillas de patatas (ʻomeleti faka-Sipeini) ʻoku ngaohi ʻe heʻeku kuifefiné.
Naʻá ke ako fēfē ʻa e Ngaahi Tefito ʻo e Tuí?
Naʻá ku kamata ako ia ʻi he Palaimelí. Naʻa mau hivaʻi ha ngaahi hiva ke tokoni ke mau ako maʻuloto ia. Naʻe hiki ia heʻemau kau faiakó he taimi ʻe niʻihi ʻi he palakipoé pea tamateʻi ha ngaahi foʻi lea ʻe niʻihi. Naʻa mau tā foki ha ʻū fakatātā ke nau fakamatalaʻi ʻa e ʻuhinga ʻo e Ngaahi Tefito ʻo e Tui takitaha.
Naʻá ku akoako lau maʻuloto ia mo hoku fāmilí ʻi he kaá ʻi heʻemau ʻalu ki he akó. ʻOku ou tokoni ki hoku kiʻi tuofefine ko Maiá, ke ne ako foki ia. ʻOkú ne ʻosi ʻiloʻi ʻa e ʻuluakí ki he onó!
Ko e fē ʻa e Tefito ʻo e Tui ʻokú ke saiʻia taha aí?
ʻOku ou saiʻia he fika hivá. “ʻOku mau tui ki he ngaahi meʻa kotoa pē kuo fakahā mai ʻe he ʻOtuá, mo e ngaahi meʻa kotoa pē ʻokú Ne fakahā mai ʻi he taimi ní, pea ʻoku mau tui te Ne kei fakahā mai ʻamui ha ngaahi meʻa lalahi mo mahuʻinga ʻo kau ki he Puleʻanga ʻo e ʻOtuá.” ʻOkú ne akoʻi mai ʻoku kei ʻi ai ha ngaahi meʻa lahi ange ʻa e Tamai Hēvaní ke tau ako taha taha.
Kuo tokoniʻi fēfē koe ʻe hoʻo ʻiloʻi ʻa e Ngaahi Tefito ʻo e Tuí?
ʻI ha ʻaho ʻe taha ʻi he akó, naʻe ʻeke mai ʻe hoku kaungāmeʻa ko Sōfiá pe ko e hā ʻa e meʻa ʻoku ou tui ki aí pea ʻoku ou kau nai ki ha faʻahinga tui fakalotu. Naʻá ku manatuʻi ʻa e Tefito ʻo e Tui ʻuluakí, “ʻOku mau tui ki he ʻOtua, ko e Tamai Taʻengatá, pea ki Hono ʻAlo ko Sīsū Kalaisí, pea ki he Laumālie Māʻoniʻoní.” Ko ia ne u vahevahe ange kiate ia.
Naʻá ku talaange foki ko ha Kalisitiane pea mo ha mēmipa au ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻá ne fakafanongo pē pea naʻe mahino kiate ia ʻa e meʻa naʻá ku vahevahe angé.
Ko e hā ʻa e ongo naʻá ke maʻu mei hoʻo aʻusiá?
Naʻá ku ongoʻi fiefia ʻaupito he naʻá ku ʻiloʻi naʻá ku loto-toʻa ke vahevahe ʻeku tuí mo hoku kaungāmeʻá. Koeʻuhí ko ʻeku ngāue mālohi ke ako ʻa e Ngaahi Tefito ʻo e Tuí, naʻá ku lava ai ʻo vahevahe ʻa e ongoongoleleí mo ʻilo ʻa e meʻa ke u lea ʻakí.
Tā Fakatātaaʻi ʻe Toby Newsome