Ngaahi ʻEkitivitī ʻo e Haʻu, ʻo Muimui ʻIate Aú

Maʻá e efiafi ʻi ʻapí pe ako folofolá—pe ke maʻu pē ha fiefia!

1–7 Siulai

Ngāue Fakameaʻa ki he Palani ʻo e Fiefiá

Ki he ʻAlamā 17–22

Naʻe fakatou akonaki ʻa ʻĒlone mo ʻĀmoni kau ki he palani ʻa e Tamai Hēvaní ki he fiefiá. Naʻá na ui ia ko e palani ʻo e huhuʻí (vakai, ʻAlamā 18:36–39 mo e ʻAlamā 22). Huke ki he peesi 12 ke faʻu haʻo ngāue fakameaʻa pē ʻaʻau ki he palani ʻo e fiefiá.

Maʻá e fānau iiki angé: Kumi ha laʻitā hoʻo tamá ʻi heʻene kei pēpeé. Fakamahinoʻi ange ʻa e ngaahi founga kuo nau tupu ai talu mei heʻenau kei pēpeé! Talanoa leva ki he founga ʻoku tau ʻi he māmaní ai ke tupulaki ko ha konga ʻo e palani ʻa e Tamai Hēvaní.

8–14 Siulai

Ngaahi Meʻangāue ʻi he Toʻukupu ʻo e ʻOtuá

Ki he ʻAlamā 23–29

Naʻe pehē ʻe ʻĀmoni ki hono ngaahi tokouá, “Kuo ngaohi kitautolu ke tau hoko ko e ngaahi meʻangāue ʻi he toʻukupu ʻo e ʻOtuá ki hono fakahoko ʻo e ngāue maʻongoʻongá ni” (ʻAlamā 26:3). Tānaki ha ʻū meʻa te ke lava ʻo fakaʻaongaʻi ke faʻu ha mūsika. Hili iá pea faʻu ha ʻū fasi mo ha ngaahi hiva. Hangē pē ko ʻetau fakaʻaongaʻi e ʻū meʻaleá ke faʻu ʻaki e fasí, ʻe lava ke fakaʻaongaʻi kitautolu ʻe he ʻOtuá ke tokoni ki hono langa ʻo e Siasi ʻo Sīsū Kalaisí.

Maʻá e fānau iiki angé: Faʻu ha kiʻi halanga kuo ʻi ai ha ngaahi fakafeʻātungia. Akoako ke hū ai! Toʻo leva ʻa e ngaahi fakafeʻātungiá pea toe feinga pē. Fakamatalaʻi ange ʻa e founga naʻe toʻo ai ʻe he Tuʻi ʻo e kau Leimaná ʻa e ngaahi fakafeʻātungiá ʻi he taimi naʻe fie akoʻi ai ʻe ʻĀmoni mo hono ngaahi tokouá ʻa e ongoongoleleí ʻi hono fonuá (ʻAlamā 23:3).

15–21 Siulai

Fakamanatu ʻo e ʻŪ Sea Mūsiká

Ki he ʻAlamā 30–31

Naʻe akoʻi ʻe ʻAlamā “ʻoku fakahā ʻe he meʻa kotoa pē ʻoku ʻi ai ha ʻOtua” (ʻAlamā 30:44). ʻOku ʻuhinga ia ʻe lava ke hoko ʻa e meʻa kotoa pē naʻe fakatupu ʻe he ʻOtuá ko ha fakamanatu ʻo Ia. Fokotuʻutuʻu ʻa e ʻū seá ʻi ha siakale ʻaki ha ʻū sea feʻunga maʻá e tokotaha kotoa pē tuku kehe pē ʻa e toko taha. ʻAi ha taha ke ne tā ha fasi pea fili e taimi ke ne taʻofi aí. ʻI he taimi ʻe tuʻu ai ʻa e fasí, ʻe tangutu ʻa e tokotaha kotoa pē ʻi ha sea. Ko e tokotaha ko ia ʻoku ʻikai hano seá, te ne vahevahe ha meʻa ʻe taha ʻokú ne fakamanatu ange kiate ia ʻa e ʻOtuá. Hokohoko atu pē kae ʻoua kuo vahevahe ʻa e tokotaha kotoa pē.

Maʻá e fānau iiki angé: Lue takai ʻi homou ʻapí pe ʻi tuʻa. Fekumi ki ha ngaahi meʻa ʻe tokoni atu ke ke ongoʻi fiefia ai mo fakamanatu kiate koe ʻa e Tamai Hēvaní.

22–28 Siulai

Ko Hono Fakatupulaki Hoʻo Fakamoʻoní

Ki he ʻAlamā 32–35

Naʻe akoʻi ʻe ʻAlamā ko e taimi ʻokú ke fakafanongo ai ki he folofola ʻa e ʻOtuá mo fai ha ngaahi meʻa ke fakahaaʻi ai hoʻo tuí, ʻe tupulaki hoʻo fakamoʻoní, ʻo hangē ha fuʻu ʻakaú (vakai, ʻAlamā 32:37). Tā ha ngaahi meʻa te ke lava ʻo fai ke tokoni ke tupu ha fuʻu ʻakau, hangē ko hono fuʻifuʻi ʻaki ha vai mo e ʻave ki he laʻaá. Tā leva ha ngaahi meʻa te ke lava ʻo fai ke tokoni ke tupulaki hoʻo fakamoʻoní, hangē ko e ʻalu ki he lotú mo e fai ha lotú.

Maʻá e fānau iiki angé: Hivaʻi ʻa e “Ko e Tuí” (Tohi Hiva ʻa e Fānaú, 50). Lolotonga hoʻo hivá, fakatātaaʻi ia ke fakahaaʻi ha tengaʻi ʻakau ʻoku tupu lahi mo māʻolunga. Talanoa fekauʻaki mo hono fakatupulaki hoʻo fakamoʻoní.

ʻŪ tā fakatātā ʻa Katy Dockrill