Mālō e Lelei mei Nikalākuā!

Ako fekauʻaki mo e fānau ʻa e Tamai Hēvaní ʻi he funga ʻo e māmaní.

Ko Nikalākuā ko ha fonua ia ʻi ʻAmelika Lotoloto. ʻOku nofo ai ha kakai ʻe meimei toko 7 miliona!

Lea Fakafonuá

Ko e lea fakaʻofisialé ʻa e lea faka-Sipeiní. ʻOku ʻi ai foki mo ha kakai ʻe niʻihi ko ʻenau lea fakafonuá ko e Misikito, Sumo, mo Lama.

¿Nahki sma?

ʻOku ʻuhinga ia ki he “ʻOkú ke fēfē hake?” ʻi he lea faka-Misikitó!

Ko Hono Fakamafola ʻo e Ongoongoleleí

Naʻe omi ʻa e kau fuofua faifekaú ki Nikalākuā ʻi he taʻu 1953. ʻI he taimi ní ʻoku ʻi ai ha kāingalotu ʻo e Siasí ʻe toko 100,000 tupu! ʻOku ʻi ai foki mo ha temipale ʻoku lolotonga langa.

Fanga ʻAnga ʻi he Anovai Nikalākuaá

ʻOku lava ke moʻui ʻa e fanga ʻangá (bull sharks) ʻi he tahí mo e anovaí. ʻOku ʻuhinga ʻeni te nau lava ʻo moʻui ʻi he ngaahi ʻōsení, vaitafé, mo e ngaahi anovaí! Naʻa nau kakau mei he Tahi ʻAtalanitikí ʻi ha vaitafe lōloa ke nofo ʻi he Anovai Nikalākuaá.

Palo te Maiō (Palo de Mayo)

ʻOku fakahoko ʻe he kakai ʻi Nikalākuaá ha kātoanga lahi ʻoku ui ko e Palo te Maiō ʻi he hoko mai ʻa e faʻahitaʻu ʻuhá. ʻOku nau teuteuʻi ha fuʻu ʻakau pe fuʻu pou ʻoku ʻi ai ha ngaahi loufau lanu fakaʻofoʻofa ke nau hulohula takai mo fiefia ai ʻi he māhiná kakato.

ʻEkitivitī

Suisí (Chuwis)

Ko e Suisí ko e vaʻinga ia ʻa e fānaú ʻi Nikalākuaá. Ke fai e vaʻinga ko ʻení, te ke fiemaʻu ha fanga foʻi piini lanu mata (pe ʻū vaʻakau) mo ha foʻi luo ʻi he kelekelé (pe ko ha ipu). ʻOange ha foʻi piini lanu mata ʻe nima ki he tokotaha vaʻinga takitaha. ʻE lī tahataha ʻe he tokotaha vaʻinga ʻuluakí ʻa e piini lanu matá ki he loto luó. Kapau ʻe hala hanau foʻi lī ʻe taha, te nau taʻofi ai kae hoko leva ʻa e tokotaha hokó. Ko e fuofua tokotaha ke tō kotoa ʻene fanga foʻi piini lanu mata ʻe nimá ki he luó, ko ia ʻe mālohí!

Founga Feimeʻatokoní

Kaiopinitō (Gallopinto)

ʻOku tokolahi ha kakai ʻi Nikalākuā ko ʻenau meʻakai fakaʻahó ko e laisé mo e pīní. Ko ha founga ʻeni te ke lava ʻo ʻahiʻahiʻi!

1. Fakamafana ha sepuni lolo lalahi (tablespoon) ʻe 2 mo e ½ onioni engeenga kuo tofitofi. Heu ʻi ha miniti ‘e 5.

2. Heu ki ai ha ipu laise hinehina ʻe 1 1/2 ʻi ha miniti ʻe 2 ki he 3.

3. Tānaki atu ha māsima mo e ipu vai ʻe 3. Toʻo ʻa e tengaʻi poló mei ha vaeuaʻi polo lanu mata pea huaʻi ʻi ʻolunga.

4. Tāpuniʻi pea haka ʻi ha miniti ʻe 15 kae ʻoua kuo mei maha ʻa e vaí.

5. Toʻo ʻa e polo kuo mohó pea heu ki ai ha ipu piini lanu kulokula pe lanu ʻuliʻuli kuo ʻosi haka ʻe 2 mo e 1/2 sepuni-tī kāliki pauta. Haka ai ʻi ha miniti ʻe 10.

Fakapapauʻi ʻoku tokoni atu ha taha lahi!

ʻŪ tā fakatātā ʻa Dave Klüg