“ʻEva kia Kulenimā mo Kulenipaá,” Kaumeʻá, Siulai 2024, 30–31.
ʻEva kia Kulenimā mo Kulenipaá
Naʻe fie vahevahe ʻe ʻEnesitō e meʻa naʻá ne ako ʻi he Palaimelí.
Naʻe hoko ʻa e talanoá ni ʻi ʻInitonēsia.
Naʻe faʻo ʻe ʻEnesitō ha sote ʻe taha ʻi heʻene kató. Naʻá ne sio takai ʻi he lokí. Ko e hā ha toe meʻa naʻe fiemaʻu ke ne ʻalu mo ia? Naʻá ne sio ki heʻene Tohi ʻa Molomoná ʻi ha funga tēpile. He ʻikai ngalo ia!
Ko e tutuku ia ʻa e akó he faʻahitaʻu māfaná. Naʻe ʻai ke ʻeva ʻa e fāmili ʻo ʻEnesitoó kia Kulenimā mo Kulenipā. Naʻá ne fuʻu fiefia ke sio ki heʻene ongo kuí.
ʻI he aʻu atu ʻa ʻEnesitō mo hono fāmilí, naʻe fāʻofua kiate ia ʻa Kulenipā. “ʻOku ou fiefia ʻaupito ʻi hoʻo ʻi hení!
“Ne ma ʻofa atu kiate koe!” Naʻe malimali mo fāʻofua foki ʻa Kulenimā kia ʻEnesitō.
“Kuo fuʻu fuoloa moʻoni ʻeku tatali mo fakaʻamu ke aʻu ki he ʻaho ní. ʻOku mau saiʻia ke ʻeva mai,” ko ʻEnesitō ange ia.
Naʻe talaange ʻe Kulenipā, “Tau hū ki fale. ʻE kuki ʻe Kulenimā ʻa e meʻakai kotoa pē ʻokú ke saiʻia taha aí.”
Naʻe hū atu ʻa ʻEnesitō ki fale mo Kulenimā mo Kulenipā. Naʻá ne fuʻu fiefia ke feohi mo kinaua.
ʻI he pongipongi hono hokó, naʻe ʻā hake ʻa ʻEnesitō ki he nanamu ʻo e haka laisé. Naʻá ne ʻilo ʻoku femoʻuekina ʻa Mami mo Kulenimā ʻi peito. Naʻá ne ʻuma kiate kinaua fakatouʻosi ʻi he kouʻahé. Naʻá ne lele atu leva ki tuʻa ki he loto ʻataʻataá.
Naʻe tangutu ʻa Teti mo Kulenipā ʻo talanoa ʻi tuʻa, ʻo inu mei ha ongo ipu.
“Mālō ʻetau maʻu ki he pongipongí ni. Te ke fie inu tī?” Naʻe mono atu ʻe Kulenipā ʻene ipú kia ʻEnesitō.
Naʻe sio ʻa ʻEnesitō ki he ipu tií peá ne sio atu kia Kulenipā. Naʻá ne fie vahevahe ʻa e meʻa naʻá ne ako ʻi he Palaimelí. Naʻá ne tali ange, “ʻIkai, mālō, Kulenipā. Naʻá ku ako ʻi he lotú ʻoku ʻikai lelei ʻa e tií, kofí, mo e tapaká ki hotau sinó. ʻOku ou fie muimui ʻi he meʻa ʻoku finangalo ʻa Sīsū ke u faí.”
Naʻe malimali ʻa Teti. “ʻOku tauhi hotau fāmilí ʻa e Lea ʻo e Potó, ka ʻoku kehe e tui ʻa Kulenipaá, pea ʻoku sai pē ia.”
Naʻe talaange ʻe Kulenipā kia ʻEnesitō, “Mālō hoʻo vahevahe ʻa e meʻa ʻokú ke tui ki aí. Ko ha tamasiʻi lelei koe. Te ke lava ʻo inu vai mafana hangē ko hoʻo tetí.” Naʻe lingi ʻe Kulenipā ha ipu vai mei he tīpotá.
Naʻe kiʻi inu ʻa ʻEnesitō. Naʻá ne ongoʻi fiefia ʻi heʻene fili ki he totonú.
ʻI he maʻu meʻatokoni hoʻataá, naʻe maʻu ʻe ʻEnesitō ʻa e meʻakai naʻá ne saiʻia taha aí. Naʻe ngaohi ʻe Kulenimā ʻa e nasi goreng, ko ha meʻakai ʻoku kau ai e laise, fuaʻimoa, kakanoʻi manu, mo e vesitapolo. Naʻe ifo ʻaupito. Pea naʻe saiʻia ʻa ʻEnesitō he talanoa kia Kulenimā mo Kulenipaá lolotonga ʻenau kaí.
ʻI he hoʻataá, naʻe vaʻinga langatoi fakataha ʻa e fāmilí. Naʻe vaʻinga foki ʻa Kulenipā mo Kulenimā!
“ʻOku ou sio atu ʻokú ke ʻi mui ʻi he fuʻu ʻakaú, ʻEnesitō!” Ko e ui atu ia ʻa Teti mo ʻene lele atu ki aí. Naʻe kata ʻa ʻEnesitō mo feinga ke hola. Naʻe fakalata e vaʻinga mo hono fāmilí.
ʻI he pō ko iá, naʻe tangutu takatakai ʻa e tokotaha kotoa pē ʻia Kulenipā ʻi heʻene fai ha ngaahi talanoa. ʻI he ʻosi e talanoa ʻa Kulenipaá, naʻe manatuʻi ʻe ʻEnesitō naʻe teʻeki ai ke nau lau folofola.
Naʻe puna hake ʻa ʻEnesitō. “Te u vave mai pē.”
Naʻá ne lele ʻo ʻomi ʻene Tohi ʻa Molomoná. ʻI heʻene foki maí, naʻá ne fehuʻi ange, “ʻE lava ke tau laukonga?”
“ʻOku ou fiefia ʻi hoʻo manatuʻi iá.” Naʻe toʻo ʻe Mami ʻa e tohí meia ʻEnesitō peá ne huke hake ki he veesi ʻokú ne saiʻia taha aí. Naʻá ne lau leʻolahi ia. Naʻa nau tūʻulutui kotoa leva.
“Te mo fie lotu mo kimautolu?” Ko e fehuʻi ange ia ʻe ʻEnesitō ki heʻene ongo kuí.
Naʻe pehē ange ʻa Kulenimā, “ʻIo, ʻe sai ʻaupito ia.” Naʻá ne tūʻulutui he tafaʻaki ʻo Kulenipaá.
Naʻe fai ʻe Teti ʻa e lotú. Naʻá ne fakamālō ki he Tamai Hēvaní ʻi heʻenau lava ke feohi ko ha fāmilí.
Hili e lotú, naʻe fāʻofua ʻa Kulenipā kia ʻEnesitō. Naʻá ne pehē ange, “Ko e meʻa lelei ʻa e lotu ho fāmilí. ʻOku ou fiefia ʻi hoʻo fie ofi ki he ʻOtuá. ʻE tokoni ia ke kei mālohi ai pē ho fāmilí.”
Naʻe ongoʻi loto-māfana mo loto-nonga ʻa ʻEnesitō. Naʻá ne saiʻia ke vahevahe ʻene tuí—ko ha meʻa naʻá ne ʻofa ai—mo Kulenimā mo Kulenipā—ko ha kakai naʻá ne ʻofa ai.
ʻŪ tā fakatātā ʻa Melissa Manwill Kashiwagi