Ang Labing Dako nga Gahom

Ni Presidente Russell M. Nelson

Gikuha gikan sa “Si Kristo Nabanhaw: Ang Hugot nga Pagtuo diha Kaniya Makabalhin og mga Bukid,” Liahona, Mayo 2021, 101–4.

Pipila ka tuig ang milabay, si Sister Nelson ug ako mibisita sa Samoa, Tonga, Fiji, ug Tahiti. Ang matag usa niini nga isla nga kanasoran nakasinati og kusog kaayong pag-ulan sulod sa mga adlaw. Ang mga miyembro nag-ampo nga ang ilang mga miting nga ipahigayon sa gawas mapanalipdan gikan sa ulan.

Didto sa Samoa, Fiji, ug Tahiti, pagsugod gayod sa mga miting, mihunong ang ulan. Apan sa Tonga, ang ulan wala mohunong. Apan 13,000 ka matinud-anon nga mga Santos ang miabot sa sayo pa nga mga oras aron makalingkod. Mapailobon sila nga nagpaabot sa padayon nga pag-ulan. Sila dayon milingkod sa basa kaayo nga miting.

Mga tawo nga naglingkod nga nagsul-ob og pangsimba ug mga rain coat

Among nakita ang dakong pagtuo nga anaa sa matag usa niadto nga mga taga-isla—hugot nga pagtuo nga igong mopahunong sa ulan ug hugot nga pagtuo nga magpadayon bisan ang ulan wala mohunong.

Ang mga hagit sa atong kinabuhi dili sa kanunay mausab sa bisan unsang paagi o kon kanus-a nato gusto. Apan ang atong hugot nga pagtuo kanunay nga motabang kanato paabante. Ang inyong hugot nga pagtuo makatabang kaninyo sa pagbalhin sa inyong mga hagit ngadto sa kalamboan ug oportunidad.

Ang hugot nga pagtuo diha kang Jesukristo mao ang labing dako nga gahom nga atong magamit niini nga kinabuhi. Ang tanan nga butang mahimo ngadto kanila nga magatuo.

Pagpalambo sa Inyong Pagtuo

Sama nga kita makatabang sa usa ka liso nga motubo pinaagi sa paghatag niini og kahayag sa adlaw, tubig, ug maayo nga yuta, kita makahimo og mga butang nga makatabang aron molambo ang atong pagtuo! Kolori ang matag bahin sa litrato ug basaha kon unsa ang imong mahimo aron mapalambo ang imong pagtuo.

Magkat-on mahitungod ni Jesukristo ug sa Iyang ebanghelyo sa panimalay, sa simbahan, ug diha sa mga kasulatan.
Mag-ampo ug mangayo alang sa tabang nga makahibalo kon unsa ang tinuod.
Sunda ang mga sugo ug paghimo og maayo nga mga pagpili aron motabang nimo nga mas mapaduol sa Langitnong Amahan.

Koloranan nga pahina nga adunay adlaw, panganod nga may ulan, ug usa ka tanom nga mitubo gikan sa yuta