Ang Gamay nga Cantaloupe

Ni Amanda Joy Penrod-Jang

(Gibase sa usa ka tinuod nga istorya)

Aduna bay bisan unsa nga pwedeng mahimo ni Weston aron matabangan si Nate?

Kini nga istorya nahitabo sa USA.

Si Weston nagdula sa gawas dihang usa ka sakyanan ug dako nga van nga gamiton sa pagbalhin ang mihunong sa atbang nga kalsada. Daghang bata ang migawas sa sakyanan. Usa nila mao ang usa ka batang lalaki nga mura og kaedad ni Weston.

Midagan si Weston pasulod sa iyang balay. “Ma, Pa! Usa ka bag-ong pamilya ang namalhin!”

Mitan-aw si Papa gikan sa proyekto nga iyang gitrabaho. “Nindot kana.”

“Gusto nako sila nga mailaila,” miingon si Weston. “Mahimo ba ka nga mouban kanako?”

“Siyempre!”

Si Weston ug Papa milakaw tabok sa kalsada ngadto sa balay sa ilang bag-ong silingan. Sa dihang nanuktok sila, usa ka babaye ang miduol sa pultahan. Ang batang lalaki nga kaedad ni Weston nagbarog sa iyang likod.

Mikaway si Weston. “Kumusta, ako si Weston. Unsay imong ngalan?”

Ang batang lalaki migawas gikan sa likod sa iyang mama. “Ako si Nate.”

“Gusto ba nimong magdula didto sa akong balay?” Nangutana si Weston.

Mitan-aw si Nate sa iyang Mama.

“Pwede ka nga moadto,” miingon siya. “Basta pauli lang inig tingpanihapon.”

Human niana, si Weston nakigdula ni Nate hapit kada adlaw. Malipayon kaayo siya nga adunay bag-ong higala. Nagbisikleta sila, naligo sa pool, ug nagdula isip mga pirata sa parke. Usahay si Weston magdula usab sa balay ni Nate. Buotan ang tibuok pamilya ni Nate!

Usa ka adlaw, grabe kaayo ang sakit sa papa ni Nate. Kinahanglan siya nga dad-on sa ospital. Ang sakit migrabe pa og maayo. Si Nate ug ang iyang pamilya nabalaka kaayo.

Nabalaka usab si Weston. Ang tanan sa simbahan nagpuasa ug nag-ampo alang sa papa ni Nate. Nagpuasa usab si Weston. Naglaom siya og usa ka milagro. Apan namatay ang papa ni Nate.

Sa paglabay sa mga adlaw, nakita ni Weston kon unsa ka guol si Nate ug ang iyang pamilya. Gusto niya nga palipayon sila. Mitabok siya sa kalsada ug nanuktok sa pultahan ni Nate.

“Dili ko gustong magdula karon,” miingon si Nate.

“O, OK,” miingon si Weston. Aduna bay bisan unsa nga pwede niyang mahimo aron matabangan si Nate?

Mipauli si Weston ug nakit-an si Mama. “Dili ganahan nga magdula si Nate,” miingon siya.

“Lisod kana.” Gigakos siya ni Mama. “Usahay kon ang mga tawo naguol, nagkinahanglan lang sila og higayon nga mag-inusara.”

Mitando si Weston. “Tingali kon ang akong papa mamatay, dili pud ko ganahan nga magdula.”

Apan ganahan gihapon si Weston nga motabang ni Nate ug sa iyang pamilya nga moarang-arang ang gibati. Aduna siyay ideya. “Asa ang gunting?” nangutana siya. “Ganahan kong mohatag ni Nate og usa ka butang gikan sa atong garden!”

Miadto si Weston sa likod sa balay ug nangita og usa ka butang nga ikahatag sa iyang higala. Gitan-aw niya ang yuta nga ilang gitamnan og pipila ka karot. Apan dili pa kini angayan nga anihon. Nangita siya sa mga kahoy nga mamunga apan wala siyay nakita nga bunga.

Dayon si Weston mitan-aw sa ilawom sa pipila ka bagon nga adunay dagko nga mga dahon. Iyang giwaling ang pipila ka dahon ug nakakita og gamay nga berde nga cantaloupe nga mitubo sa bagon. Kini mao ang cantaloupe nga siya mismo ang nagtanom ug nagbu-bo!

Batang lalaki nga nagtan-aw sa cantaloupe nga naa sa bagon

Maayo unta og si Nate ug ang iyang pamilya ganahan og mga melon. Giputol kini ni Weston gikan sa bagon ug gidala sa sulod sa balay. Dayon nagsulat siya og mubo nga sulat kauban sa iyang gasa.

Sa dihang nahuman na ang kard, mainampingon nga gibutang ni Weston ang cantaloupe ug ang kard sa may tumbanan sa pultahan nilang Nate. Dayon gipindot niya ang doorbell ug midagan og balik sa ilang balay sa labing kusog nga iyang mahimo. Naglaom ko nga ila kining magustohan, naghunahuna si Weston.

Sa wala madugay, nakit-an ni Weston ang pamilya ni Nate nga nangaon sa gawas sa balay kauban ang ilang mga silingan.

“Mao kadto ang labing lamian nga cantaloupe sukad!” Miingon ang igsoong babaye ni Nate.

“Dili pa gani kita segurado kon unsa kadto sa sinugdanan.” Mikatawa si Nate. “Nagtuo kita nga usa kadto ka dili kasagaran nga lubi!”

“Salamat sa tam-is nga gasa,” miingon ang mama ni Nate.

Gibati ni Weston ang kainit sa sulod sa kasingkasing samtang gigakos siya ni Nate. Dili niya mapawagtang ang kaguol sa iyang higala, apan bisan ang gamay nga cantaloupe makatabang nga magdala og pahiyom.

Istorya nga naa sa PDF

Paghulagway pinaagi ni Greg Paprocki