“Ang Pagsulay sa Pagkamabination,” Higala, Agosto 2024, 36–37.
Ang Pagsulay sa Pagkamabination
Nganong magmaayo man si Melanie ngadto sa usa ka tawo nga nagbugalbugal kaniya?
Kini nga istorya nahitabo didto sa Taiwan.
Paspas kaayong midagan si Melanie kutob sa iyang mahimo tabok ngadto sa hawan nga dulaanan sa eskwelahan. Tulo sa iyang mga klasmet nauna lang kaniya og pipila ka lakang. Hapit na sila moabot sa linya nga gimarkahan og “luwas nga dapit.”
Gituyhad niya ang iyang bukton. Gipakusgan pa niya ang iyang mga bitiis sa pagdagan. Sa kataposan, iyang nadakpan ang duha kanila sa sakto gyod nga panahon!
“Dakpan mo!” Miingon si Melanie. Ang iyang mga higala nangatawa samtang sila nangahigda sa yuta.
“Paspas kaayo ka,” misulti si Jia samtang siya gihangos.
Hapit usab madakpan ni Melanie si Jonny. Apan wala niya siya madakpi.
Gitudlo siya ni Jonny ug mikatawa. “Hinay kaayo!” Dayon siya mitawag niya [Melanie] og ngil-ad nga ngalan.
Mikusmod si Melanie. Si Jonny daotan kaayo ngadto niya! Wala siya ganahi niini.
Pagkahuman sa eskwela, si Melanie milingkod sa lamesa sa kusina. Nagtrabaho siya sa iyang homework uban sa iyang magulang nga babaye. Apan dili siya makahunong og hunahuna mahitungod sa unsay gisulti ni Jonny.
“Liv, unsay imong buhaton kon naay usa ka tawo nga daotan diha nimo?” Nangutana si Melanie.
Gitan-aw siya ni Liv. “Aduna bay tawo nga daotan diha nimo?”
Si Melanie mitando. “Usa ka batang lalaki sa eskwelahan. Magbugalbugal siya kanako sa tanang panahon!”
Gibutang ni Liv iyang lapis. “Lisod gyod kaayo na. Gikasubo ko.” Misandig siya ug mikiyugpos sa iyang mga bukton. “Tingali mobuhat ka og maayo nga butang para niya.”
Gikusnot ni Melanie ang iyang ilong. “Butang nga maayo?” Morag dili gyod na makalingaw.
“Oo!” Miyango si Liv. “Kon magbinuotan ka niya, tingali og magbinuotan pod siya nimo. Nasulayan ba na nimo?”
Milingo-lingo si Melanie sa iyang ulo. Dili kaayo siya sigurado kabahin niini nga ideya. Nganong magbinuotan man siya sa usa ka tawo nga daotan?
Nianang gabhiona, nag-ampo si Melanie. “Langitnong Amahan, palihog panalangini si Jonny nga siya magbinuotan nako.” Mihunong siya. Gihunahuna niya pag-usab ang gisulti ni Liv. “Ug palihog tabangi ko sa pagpangita og paagi nga magbinuotan usab ngadto kaniya. Sa ngalan ni Jesukristo, amen.”
Apan unsa kaha ang maayong butang nga iyang buhaton?
Pipila ka adlaw ang milabay, ang klase ni Melanie nag-uban nga nag-hike. Adunay daghang dagkong berde nga punoan sa mga kahoy ug bugnaw nga mga sapa sa agianan.
Sa dihang oras na alang sa break ug paniudto, si Melanie mikaon uban sa iyang mga higala. Dayon nakabantay siya ni Jonny nga naglingkod ilawom sa kahoy. Nag-inusara siya. Tingali mahimo nakong ipakipagbahin ang akong pagkaon niya, naghunahuna siya.
Giduol ni Melanie si Jonny ug milingkod. “Hi, Jonny.”
Mihangad si Jonny ngadto niya. “Hi.”
“Gusto ka og biskwit?” nangutana siya.
Iyang gitunol ang usa sa iyang mga biskwit ngadto ni Jonny. Iya kining gikuha ug mipahiyom. “Salamat.”
“Ganahan ka sa atong pag-hike?” nangutana siya.
“Oo. Nindot kaayo ang tulay nga atong gitabokan.” Miingkit siya sa biskwit. “Mmm. Kini kay lami kaayo.”
“Salamat! Gihimo nako na kauban akong mama ug igsoon nga babaye.”
Si Melanie ug si Jonny nagdungan sa paghuman sa ilang paniudto. Naghisgot sila bahin sa usa ka dula sa baraha nga gusto nilang duha. Makalingaw man diay si Jonny. Nangatawa sila og maayo. Mas ganahan si Melanie niini kay sa iya siyang gibugalbugalan.
“Ganahan ka magdula?” Nangutana si Jonny samtang gisundan nila ang tanan nga palugsong sa agianan sa hiking.
Mitando si Melanie ug mipahiyom. “Sige ba!”
Nagpuli-puli sila sa paglukso-lukso taliwala sa mga bato atol sa nahabiling panahon sa pag-hike. Nalingaw kaayo si Melanie. Sa dihang nahuman na ang pag-hike ug panahon na sa pagpauli, naguol siya nga nanamilit.
“Magdula ta anang card game sunod semana,” miingon si Jonny.
Si Melanie mitando. “OK! Babay, Jonny!”
Mikaway-kaway si Melanie ug mipahiyom. Dili na si Jonny ang batang lalaki nga nagbugalbugal kaniya. Karon, siya amigo na niya.
Mga Paghulagway pinaagi ni Skyler White