Pagpakigbahin sa Iyang Gasa

Ni Rebekah Jakeman

(Gibase sa usa ka tinuod nga istorya)

“Mahimo ba nga panalanginan usab ko?” Si Maddie mihangyo.

Kini nga istorya nahitabo sa USA.

Mapahiyomon nga batang babaye uban sa iring sa atubangan nga pultahan

Tuktok, tuktok.

Midagan si Maddie sa atubangan nga pultahan ug giablihan kini. Mipahiyom siya sa dihang nakita niya si Brother Clayton. Siya mao ang ministering brother sa ilang pamilya.

“Kumusta, Maddie, ania ko aron makigkita sa imong mama ug papa,” miingon si Brother Clayton.

Miduol si Mama kang Maddie diha sa pultahan. “Salamat sa pag-anhi. Palihog og sulod.”

Misunod si Brother Clayton ni Mama ug ni Maddie ngadto sa sala.

Nagpahimutang si Papa og lingkoranan sa tunga sa lawak. “Si Brother Clayton ania aron hatagan si mama nimo ug ako og panalangin sa pagkapari,” giingnan niya si Maddie.

“Ngano man?” Si Maddie nangutana. Nakahibalo siya nga ang mga tawo mangayo og mga panalangin sa pagkapari kon sila nasakit o magsugod og eskwela. Apan nganong si Mama ug Papa nanginahanglan man og panalangin?

“Nakahibalo ka ba sa unsang paagi nga ang atong pamilya nag-agi og kalisod? Gusto ni Papa ug nako ang tabang ug giya sa Langitnong Amahan,” miingon si Mama.

Nakahibalo si Maddie nga si Mama kanunay nga dili mahimutang. Ug si Papa nabalaka mahitungod sa kwarta. Lisod kaayo kini sa tibuok pamilya.

“Ang mga panalangin sa pagkapari dili lamang kon ikaw nasakit,” miingon si Papa. “Kini usab pwede kon ikaw nagkinahanglan og kahupayan o kalig-on.”

“Pwede ba kong magpabilin ug maminaw?” Si Maddie mihangyo.

Mipahiyom si Mama. “Sige. Pwede ba nga molingkod ka nga hilom? Gusto kita nga mahimong hilom aron atong mabati ang Espiritu Santo.”

Mitando si Maddie ug milingkod sa sopa. Dayon gikyugpos niya ang iyang mga bukton ug gipiyong ang iyang mga mata. Naminaw siya ni Brother Clayton nga mihatag og tagsa-tagsa ka panalangin ni Mama ug ni Papa. Gibati niya ang kainit ug pagkamalaomon samtang gisulti ni Brother Clayton ang mapinanggaong mga pulong gikan sa Langitnong Amahan.

Drowing sa usa ka tawo nga naghatag sa laing tawo og panalangin sa pagkapari, nga adunay mga krayola tupad sa papel

Sa dihang nahuman na sila, mibarog si Maddie. “Mahimo ba nga panalanginan usab ko?”

“Siyempre,” miingon si Papa.

Si Maddie milingkod sa lingkoranan, ug si Brother Clayton mipandong sa iyang mga kamot sa iyang ulo. Siya mibati og nindot sa sulod sa iyang kasingkasing. Apan naghunahuna siya kon unsa ang mga pulong sa Langitnong Amahan alang niya. Nakahibalo siya nga ang mga problema sa iyang pamilya lisod—lisod kaayo aron masulbad niya.

“Maddie, ang imong Langitnong Amahan gusto nga masayod ka nga naa nimo ang gasa sa kamaya,” miingon si Brother Clayton. “Siya nahigugma kanimo ug gusto nga magmalipayon ka. Ug gusto Siya nga ipakigbahin nimo ang imong kalipay ngadto sa uban.”

Si Maddie naminaw og maayo. Mibati siya nga malinawon. Tingali dili niya mahimong wagtangon ang dako nga problema nga giatubang sa iyang pamilya. Apan makatabang siya aron magmalipayon ang iyang pamilya.

Mapahiyomon nga batang babaye nga adunay iring atubangan sa drowing sa iyang kaugalingon nga nagdawat og panalangin

Sa dihang nahuman na si Brother Clayton, milukso si Maddie gikan sa lingkoranan ug gigakos og maayo si Mama ug Papa. Dayon gilamano niya si Brother Clayton. “Salamat,” miingon siya.

Unya nianang gabii, si Maddie naglingkod sa iyang higdaanan. Naghunahuna siya sa iyang panalangin sa pagkapari. Unsaon niya sa pagtabang ang iyang pamilya nga mobati og kalipay? Mitan-aw siya palibot sa iyang lawak sa iyang basahon nga adunay mga litrato, mga hayop nga dulaan, ug mga gamit sa art.

Dayon nakaideya siya. Mikuha siya og pipila ka papel, gunting, ug mga krayola. Nagsugod siya sa paggunting sa papel ngadto sa gagmayng mga kwadrado.

Mipunit si Maddie og pula nga krayola. “Mahimo nimo kini!” siya misulat sa unang papel. Sa sunod siya misulat, “Ikaw gihigugma!” Naghunahuna si Maddie og dugang pang malipayon nga mga butang nga isulat. Nagpadayon siya hangtod nga ang tanang papel napuno sa malipayon nga mga pulong.

Sa dihang nahuman na siya, gibutang niya ang mubo nga mga sulat palibot sa balay—usa sa atubangan nga pultahan, usa sa sabon tupad sa banggera, ug usa sa labhananan.

Sa misunod nga mga adlaw, nagpahiyom siya dihang nakita niya ang iyang pamilya nga nagbasa sa mubo nga mga sulat.

“Salamat sa mubo nga mga sulat,” miingon si Mama nga dako kaayo og pahiyom. “Nakapalipay kini kanako. Ug ikaw nakapalipay usab kanako!”

Gigakos ni Maddie ang iyang mama. Ang Langitnong Amahan mitabang niya nga magamit ang iyang gasa aron makatabang sa iyang pamilya.

Malipayon nga batang babaye ug iring nga dunay nagkatag nga mga piraso sa papel

Guntinga kining mubo nga sulat ug biyai kini aron pangitaon sa imong pamilya!

Kamo gihigugma!

Istorya nga naa sa PDF

Mga paghulagway pinaagi ni Annie Poon