“Pagpakigbatok sa Pagbugal-bugal uban ang Gugma,” Higala, Agosto 2024, 38.
Imong Sinulat
Pagpakigbatok sa Pagbugal-bugal uban ang Gugma
Matilda ang akong ngalan, ug ako taga Chile. Sukad mibalhin sa laing nasod, ang ubang mga bata nakamatikod nako nga lahi ko nila. Mokatawa sila sa akong kulot nga buhok, sa kolor sa akong mga mata, sa akong kilay, ug bisan ang kolor sa akong panit. Gitawag ko nila nga maot ug katingalahan ug gisultihan pa ako nga pobre ko tungod kay lahi ako sa uban.
Gitudloan ko sa akong mama sa pagtubag sa bugalbugal uban ang pahiyom. Siya nag-ingon sa daghang higayon nga ang mga tawo nga magbugalbugal mao ang mga magul-anon o nagpuyo kauban sa usa ka butang nga naghatag og kasakit kanila. Gitudloan usab ko niya nga dili kini akong sala, ug ang pagkalahi usa ka butang nga maayo ug talagsaon. Gibuhat sa Dios ang lain-laing mga matang sa mga butang sa kalibotan sama sa lain-laing mga tanom, mga dapit, ug mga tawo. Dili igsapayan kon unsa ang atong hitsura basta maayo ang atong kasingkasing.
Tungod kay gitudloan ko sa akong mama nga, sa matag higayon nga ako bugalbugalan, ako maghunahuna niini ug makig-istorya sa tawo nga nagsulti og daotan. Naningkamot ko sa paghunong sa sitwasyon. Kausa gisultihan nako ang usa ka klasmeyt nga ang pagsulti og daotan nga mga butang bahin sa uban makapasakit kaayo. Miingon ko nga wala siya mahibalo kon unsay mahitabo diha sa kasingkasing sa uban kon makadungog sila ug daotang mga butang bahin sa ilang kaugalingon tungod sa ilang pagkalahi. Sukad niadtong adlawa, kana nga klasmeyt wala na magbiaybiay nako, ug karon higala na mi.
Sa akong hunahuna ang paagi nga gitudloan ko sa akong mama sa pagbatok sa pagbugal-bugal mao ang labing maayo nga paagi. Gitudloan ko niya sa pagpakigbatok sa pagbugal-bugal uban ang gugma, sama sa buhaton sa Dios. Naningkamot ko nga mangutana kanunay sa akong kaugalingon, “Unsa may buhaton ni Jesukristo niini nga sitwasyon?” Nakatabang kini kanako nga mas maduol sa atong Langitnong Amahan.