“Managsoong Lalaki sa Kahangtoran,” Higala, Agosto 2024, 14–15.
Managsoong Lalaki sa Kahangtoran
“Panahon na nga moadto sa templo!” Mihunghong si Roy samtang nanglakaw sila paingon sa sulod.
Kini nga istorya nahitabo sa Zimbabwe.
“Gusto kong makita. Ug moadto sa templo,” mikanta si Ryan.
“Moadto didto karon!” miingon ang magulang nga lalaki ni Ryan nga si Roy.
Gipilo ni Mama ang pipila ka sinina ug gibutang kini sa bag nga pangbiyahe. “Magsugod kita karon, apan mokabat og duha ka adlaw aron kita makaabot sa templo sa South Africa,” miingon siya.
Si Ryan ug ang iyang pamilya naghulat og dugay nga panahon aron makaadto sa templo. Ug karon mao na gayod ang higayon! Wala sila sa tibuok semana.
“Mama, istoryahi na usab kami mahitungod ni Tawananyasha,” miingon si Roy.
Mipahiyom si Mama sa mga batang lalaki. “Si Tawananyasha mao ang inyong magulang nga lalaki. Namatay siya sa dihang usa pa lang siya ka tuig. Apan igsoon gihapon siya ninyo, sama ni Tafadzwa ug Tatenda. Si Papa ug ako nahigugma sa tanang lima namo ka anak nga mga lalaki.”
Mipahiyom si Ryan samtang naghunahuna siya ni Tawananyasha. Nindot ang pagbati nga mahibalo nga ang ilang mga ginikanan nahigugma nilang tanan.
“Mao na nga moadto kita sa templo,” miingon si Mama. “Aron maselyo isip pamilya sa kahangtoran!” Iyang gisirado ang bag nga pangbiyahe. “Karon kuhaa ang inyong mga butang. Panahon na nga moadto sa templo!”
Si Roy mitabang ni Ryan sa pagbitbit sa ilang bag nga pangbiyahe padulong sa gawas. Miapil nila si Papa, nagbitbit og kahon sa pagkaon nga giandam ni Mama alang sa biyahe. Si Tafadzwa ug Tatenda nagbitibit usab sa ilang mga bag. Sa wala madugay ang tibuok pamilya nagsugod sa paglakaw ngadto sa simbahan. Usa ka bus ang naghulat nila aron dad-on sila sa templo.
Si Ryan misaka sa bus ug milingkod tupad ni Roy. May laing tulo ka pamilya gikan sa ilang ward ang misakay usab sa bus. Sa dihang ang tanan nakalingkod na, ang bus misugod na sa taas nga biyahe padulong sa templo.
Si Ryan ug Roy mitan-aw sa gawas sa bintana. Panahon kadto sa ting-ulan, mao nga ang tanan berde ug nindot tan-awon. Gilabyan nila ang mga umahan ug mga tindahan daplin sa dalan diin ang mga tawo namaligya og mga tamatis, mga saging, ug mga patatas. Nakakita pa gani sila og mga unggoy diha sa dalan! Naghunahuna si Ryan kon unsa pa kaha nga ubang mga hayop ang tingali nagtago sa tag-as nga mga sagbot ug mga kahoy.
Sa wala madugay ang adlaw nahimong gabii, ug ang bus nagpadayon. Taas kadto nga biyahe, apan wala moreklamo si Ryan ug Roy. Nakatulog si Ryan nga naghunahuna, Higayon na nga moadto sa templo!
Sa dihang naabot na sila sa siyudad, ang tanan diha sa bus mitan-aw sa gawas sa mga bintana. Kinsa ang unang makakita sa templo?
“Naa ra!” Miingon si Roy.
Sa kataposan, panahon na gayod aron mosulod sa templo. “Panahon na nga moadto sa templo!” Mihunghong si Roy ni Ryan samtang naglakaw sila padulong sa sulod. Nag-ilis sila og puti nga mga sinina. Dayon ang mga batang lalaki milingkod sa dapit nga hulatanan kauban sa ubang mga bata sa makadiyot.
Sa wala madugay usa ka buotan nga temple worker ang midala sa mga bata aron moapil sa ilang mga ginikanan. Misulod sila sa usa ka lawak nga adunay lamesa sa tunga nga dunay humok nga ludhanan sa ubos aron ludhan sa mga tawo. Kini gitawag og altar.
“Welcome sa selyohanan nga lawak,” miingon ang temple worker sa atubangan sa lawak. “Karon, akong gamiton ang pagkapari aron iselyo ang matag pamilya sa kahangtoran.”
Mitan-aw si Ryan ug Roy samtang giselyo ang laing tulo ka pamilya. Dayon turno na nila.
Si Ryan ug ang iyang igsoong mga lalaki miluhod uban sa ilang mga ginikanan palibot sa altar. Ang tigselyo midapit sa usa sa ilang mga higala nga morepresentar ni Tawananyasha. Mitan-aw si Roy ni Mama ug Papa samtang gibutang niya ang iyang mga kamot sa ilaha. Nakakita siya og mga luha nga midagayday sa mga aping ni Mama, apan dako kaayo ang iyang pahiyom.
Sa dihang nahuman na ang pagselyo, gigakos ni Ryan si Mama. “Mura kamo og mga anghel” mihunghong siya sa iyang mga anak nga lalaki.
“Mura og mabati nga adunay anghel kauban nato,” mihunghong og balik si Roy. “Ako adunay espesyal nga gibati sa akong kasingkasing.”
“Ako usab,” miingon si Ryan. Makapahingangha nga maanaa sa templo kauban ang iyang pamilya sa kahangtoran!
Paghulagway pinaagi ni Rachel Hoffman-Bayles