“Gihimo uban ang Gugma,” Higala, Agosto 2024, 10–11.
Gihimo uban ang Gugma
Kinsa kaha ang hatagan ni Vanessa sa bag?
Kini nga istorya nahitabo sa Nicaragua.
Nanamilit si Vanessa ni Mama ug milakaw subay sa bilding sa simbahan. Pipila sa iyang mga higala anaa na didto! Ganahan siya sa mga kalihokan sa Primary.
Si Sister Fonseca nag-andam og lamesa alang sa mga bata nga maghimo og mga craft. Adunay mga ribbon, lambo nga de kolor, ug mga sticker. Naghinamhinam na si Vanessa nga masayod unsa ang ilang himoon!
Pagkahuman sa pag-ampo, mihatag si Sister Fonseca og pipila ka instruksiyon. “Karong adlawa maghimo kita og mga bag alang sa gasa [gift bag]. Mahimo ninyong ihatag kini sa tawo nga inyong gimahal.” Iyang gitunol ang usa ka brown nga papel nga bag sa matag bata.
Naghinamhinam si Vanessa nga makasugod sa pagbutang og dekorasyon. Nagpili siya og dalag [yellow] nga sticker sa kasingkasing ug gibutang kini sa atubangan sa bag.
Dayon, gipilo ni Vanessa ang papel aron mahimong kard. “Ikaw anak sa Dios,” siya misulat. Nagdrowing siya og daghang bitoon ug mga kasingkasing niini.
Si Sister Lopez mipasa og pipila ka biskwit [cookies] ug cupcakes aron isulod sa ilang mga bag. Gibutang usab ni Vanessa ang kard sa sulod. Perpekto!
Wala madugay miabot si Mami aron kuhaon siya. “Tan-awa!” Gipataas ni Vanessa ang iyang bag aron makita ni Mami. “Para ni sa usa ka espesyal nga tawo.”
“Nindot!” Miingon si Mami. “Kinsay imong tagaan niini?”
“Wala ko kahibalo,” miingon si Vanessa. “Gusto nakong ihatag kini sa tawo nga nagkinahanglan og gugma.” Dayon naka-ideya si Vanessa. “Mahimo ba kitang maglakaw-lakaw aron mangita og kahatagan niini?”
“Sige,” miingon si Mami. “Tana!”
Migunit si Vanessa sa kamot ni Mami ug gadala sa iyang bag sa gugma sa iyang pikas nga kamot. Miliko sila subay sa usa ka hilom nga dalan. Tingali adunay usa dinhi nga nanginahanglan og gugma, naghunahuna si Vanessa.
Apan samtang naglakaw sila, mikisdom si Vanessa. Walay bisan usa nga tawo sa dalan!
“Sulayan nato pag-adto niini nga dalan.” Gigiyahan ni Mami si Vanessa sa laing dalan. Apan usab, walay bisan usa ang anaa sa gawas.
Nanghupaw si Vanessa. “Unsay atong buhaton?” nangutana siya.
“Nganong dili man ka mag-ampo diha sa imong hunahuna?” Miingon si Mami. “Hangyoa ang Langitnong Amahan aron giyahan ka ngadto sa tawo nga imong matabangan.”
Miliko sila og lain pa nga dalan, ug si Vanessa nag-ampo sa hilom. Langitnong Amahan, palihog tabangi ko nga makakita og usa ka tawo nga nagkinahanglan og gugma.
Pipila ka minuto ang milabay, si Vanessa nakakita og usa ka gamayng bata nga naglakaw sa aseras [sidewalk].
Ang panagway ni Vanessa mihayag uban sa pahiyom. “Hi,” siya misulti ngadto kaniya. “Gusto ko nga mohatag niini kanimo.” Gitunol niya ang bag.
Sa sinugdan, ang bata morag naglibog.
“OK ra. Mahimo nimo nang dawaton,” mabination nga misulti si Mami.
Hinay-hinay, mikab-ot ang batang lalaki ug gikuha ang bag. Usa ka dakong pahiyom ang makita sa iyang nawong.
“Gihimo ko kini alang kanimo uban ang dako nga gugma,” miingon si Vanessa.
Gibati ni Vanessa ang kalipay samtang siya nagtan-aw sa bata nga midagan balik ngadto sa iyang balay. Nasayod siya nga espesyal siya [batang lalaki] ngadto sa Langitnong Amahan.
Mga paghulagway pinaagi ni Vicky Scott