Dali, Sunod Kanako nga mga Kalihokan

Alang sa home evening o pagtuon sa kasulatan—o alang sa kalingawan lamang!

Hulyo 29–Agosto 4

Gagmayng mga Butang, Dako nga Kalainan

Nagkalainlaing sangkap sa pagluto nga adunay hulma sa usa ka nawala nga itlog

Alang sa Alma 36–38

Uban sa tabang sa Langitnong Amahan, ang gagmay nga mga butang makahimo og dako nga kalainan (tan-awa sa Alma 37:6–7). Magkat-on sa paghimo sa imong paborito nga risipi. Unsa ang mahitabo sa risipi kon gikuhaan ninyo og usa sa mga sagol? Hisgoti kon sa unsang paagi ang gagmay nga mga butang makahimo og kalainan ug unsaon ninyo nga makahimo usab og kalainan.

Alang sa mas gagmay nga mga bata: Pangita sa gagmayng mga butang nga makatabang, sama sa gamay nga liso nga mahimong usa ka tanom o switch sa suga nga mopahayag. Hisgoti mahitungod kon sa unsang paagi ang gagmay nga mga butang makahimo og dako nga kalainan, sama kaninyo!

Agosto 5–11

Pagkabanhaw nga Kalihokan

Mga bata nga naghimo og mga puppet

Alang sa Alma 39–42

Si Alma nagtudlo mahitungod sa pagkabanhaw (tan-awa sa Alma 40:23). Paghimo og puppet nga susama ninyo og panagway! Mahimo kamong mogamit og bag nga papel, piraso sa papel, o medyas aron sa paghimo og puppet. Paggamit og mga marker, pintal, lambo, o laing mga gamit sa pagbutang og dekorasyon niini. Ang inyong kamot susama sa inyong espiritu, ug ang inyong puppet susama sa inyong lawas. Tungod kang Jesukristo, ang atong lawas ug espiritu managkauban pag-usab hangtod sa kahangtoran human kita mabanhaw.

Alang sa mas gagmay nga mga bata: Pagbuhat og butang aron malihok ang inyong lawas, sama sa pagsayaw o sa pagdula! Dayon hisgoti kon sa unsang paagi nga ang pagkabanhaw nagpasabot nga maangkon nato ang atong mga lawas pag-usab human kita mamatay.

Agosto 12–18

Kuta sa Kahilwasan

Mga bata nga adunay balay-balay nga kuta gamit ang habol

Alang sa Alma 43–52

Dihang si Kapitan Moroni nag-andam alang sa gubat, siya nagpahimo og mga butang palibot sa dakbayan aron sa pagpanalipod sa katawhan (tan-awa sa Alma 50:1–6). Pagtukod og kuta kauban sa inyong pamilya! Matag higayon nga magdugang kamo og bag-o sa inyong kuta, pagngalan og usa ka butang nga mahimo ninyong buhaton aron ang inyong pamilya magpabilin nga luwas sa espirituwal nga paagi, sama sa pagbasa sa mga kasulatan o sa pag-ampo.

Alang sa mas gagmay nga mga bata: Pagtukod og balay-balay nga kuta nga mahimong kalingkoran. Hisgoti kon unsaon sa mga tawo sa pagtukod og mga kuta aron magpabilin nga luwas. Dayon hisgoti kon unsaon paghimo sa atong panimalay nga magpabiling luwas sa espirituwal nga paagi pinaagi sa pagbasa sa mga kasulatan.

Agosto 19–25

Mga Sulat sa Gugma

Batang babaye naghunahuna samtang nagsulat sa papel

Alang sa Alma 53–63

Si Helaman ug ubang mga lider misulat og mga epistola, o mga sulat, aron sultihan ang matag usa mahitungod sa maayo ug dautang mga butang nga mahitabo diha sa mga gubat (tan-awa sa Alma 56). Mahimo usab kamo nga mosulat og mga sulat! Paghimo og sulat ngadto sa usa ka sakop sa pamilya o higala. Isulat ang maayo nga mga butang nga nahitabo sa inyong kinabuhi ug sa mga butang nga lisod alang kaninyo. Dayon ipadala ang inyong sulat!

Alang sa mas gagmay nga mga bata: Pagpraktis pagsulat og “Gihigugma ko ikaw” o pagdrowing og kasingkasing nga ihatag sa tawo nga inyong gimahal. Hisgoti kon sa unsang paagi ang mga propeta diha sa mga kasulatan misulat usab og mga sulat.

Istorya nga naa sa PDF

Mga Paghulagway pinaagi ni Katy Dockrill