Kumusta gikan sa Barbados!

Pagkat-on mahitungod sa mga anak sa Langitnong Amahan sa tibuok kalibotan.

Ang Barbados usa ka isla diha sa Caribbean. Mga 280,000 ka tawo ang nagpuyo didto!

Pinulongan

Ang opisyal nga pinulongan sa Barbados mao ang Ingles. Kadaghanan sa mga tawo sa isla nagsulti usab og Bajan.

Sweet fuh days.

Ingon niana ang imong pagsulti kon ang usa ka butang nindot kaayo sa Bajan!

Mga Sinugdanan sa Simbahan

Ang unang pamilya nga nagpamiyembro sa Simbahan sa Barbados gibunyagan niadtong 1978. Karon aduna nay kapin sa 1,000 ka miyembro diha sa nasod!

Langob ni Harrison

Kini usa ka dako nga anapog nga langob nga adunay tubig nga nag-agi niini. Ang mga bisita makahimo sa pagsuhid sa langob gamit ang usa ka tram [sakyanan] ug makita ang tanang mga porma sa bato nga mitubo sa paglabay sa panahon.

Usa ka Mabulokon nga Bandila

Ang bulawan nga kolor diha sa bandila sa Barbados nagrepresentar sa mga baybayon sa isla. Ang asul nagrepresentar sa dagat ug langit sa Barbados.

Kalihokan

Paghimo og Tabanog!

Sa Barbados, ang mga tawo magpalupad og mga tabanog sa Pasko sa Pagkabanhaw. Paghimo og imong kaugalingon nga tabanog aron sa paghinumdom ni Jesukristo.

1. Paggunting og porma sa diyamante gikan sa usa ka piraso nga papel.

2. Pagpapilit og hilo ngadto sa ubos sa diyamante.

3. Karon isulat o idrowing ang mga butang nga imong gihigugma mahitungod ni Jesukristo diha sa imong tabanog!

Risipi

Souse

Kadaghanan sa mga tawo sa Barbados nagkaon niini sa Sabado. Aniay usa ka bersiyon nga mahimo nimong sulayan!

1. Paghiwa og 2 ka libra [0.91kilogram] sa karne nga baboy ngadto sa 1/2-inch (1-cm) ka mga piraso. Pabukala ang karne nga butangan og 1 ka kutsara (15 ml) nga asin hangtod nga maluto, sulod sa 15 minutos. Iyabo ang tubig ug pabugnawa ang karne.

2. Paghiwa og 1/2 nga dako nga bombay, 2 ka pipino, usa ka hakop sa parsley, ug usa ka atsal nga imong gusto ngadto sa ginagmay nga mga piraso. I-sagol ang tanan diha sa usa ka dako nga panaksan. Pagdugang og 1/2 sa kutsarita (2.5 ml) sa thyme ug ang duga gikan sa 3 ka lime ngadto sa mangkok [bowl].

3. Idugang ang naluto nga karne ngadto sa panaksan ug sagola og maayo. Dugangi og asin ug paminta [pepper] para sa timpla. Isulod sa refrigerator sa dili momenos duha ka oras sa dili pa idalit.

Seguroha nga makapangayo og tabang sa usa ka hamtong!

Mga Paghulagway pinaagi ni Simone Fumagalli