« Te ’ino rahi o te ’ohe iti » Hoa, Tetepa 2024, 4–5.
Te ’ino rahi o te ’ohe iti
’Ua itoito ānei Daniel i te fa’a’ite i te parau mau ?
’Ua tupu teie ’ā’amu i te fenua Marite.
’Ua amo Daniel i te tāpo’i o te ’āfata ha’uti tahito a pāpā’ū ’e ’ua hi’o atu i roto. ’Ua ha’aputuputu mai tōna mau taea’e fēti’i nō te hi’o. E mea au roa nā rātou e ha’uti ’āmui i te fare o pāpā’ū !
I roto ’ua rau te mau ha’uti tahito tā te māmā ’e te metua vahine fēti’i ’o Daniel i ha’uti na, i tō rāua tamari’ira’a.
« E aha terā ? » ’Ua fa’atoro atu Noa te taea’e fēti’i ’o Daniel i ni’a e ono ’ohe iti tahito ’e te ’ana’ana. E mau tara ’oe’oe tō te reira ’e te mau reva tei ’ūhia—te tahi mea ’ute’ute ’e te tahi mea re’are’a.
’Ua rave mai Daniel hō’ē. « ’Ua parau mai tō’u māmā nō teie mea iā’u », ’ua nā ’ō atu ’oia. « E tu’u ’oe i te hō’ē pa’a menemene i ni’a i te ’aihere i rāpae’au. I muri iho, te tahi i muri mai i te tahi, e tāora ’oe i te reira i ni’a ’e e tāmata i te fa’atopa i te reira i roto i te pa’a menemene.
« ’Aita atu ai ! », ’ua parau a’era Noa. ’Ua horo a’ena ’oia i roto i te ’āua nō te fa’aineine te ha’uti.
’Aita i maoro roa, ’ua ha’amata Daniel ’e tōna mau taea’e fēti’i i te tāora haere te mau ’ohe iti i ni’a ’ati a’e i te ’āua o pāpā’ū. Mea au roa nā Daniel ’ia topa ana’e mai te mau ’ohe iti ’e ’ia putu roa i roto i te ’aihere.
« E pārie vau e nehenehe au e tāora i tā’u ’ohe ’iti teitei a’e i tā ’outou », ’ua parau Lily te tuahine fēti’i ’o Daniel.
’Ua ’ata’ate te mau tamari’i ’e ’ua tāora haere i te mau ’ohe iti ’ia teitei atu ’e ’ia teitei roa atu ā.
I muri iho e mana’o tō Daniel. « E pārie vau e nehenehe au e tāora i tā’u i tera pae mai o te ’ē’a ’e e puta i roto i te pa’a menemene ! », ’ua parau ’oia. ’Ua horo atu ’oia i tera pae mai o te ’ē’a ’e ’ua tāora ma tōna pūai ato’a i te ’ohe iti.
’Ua rere teitei roa te ’ohe iti i roto i te aore, ’aita rā i topa i roto i te ’aihere. ’Āhiri i te reira, ’ua topa ti’a atu te reira i ni’a i te pere’o’o ’āpī o Robilyn te metua vahine fēti’i ma te māniania pūai THUD.
« ’Aiiii ! » ’ua tuō Noa.
’Ua ohi mai Daniel i te ’ohe iti. Tē vai ra te hō’ē pu’u rahi i ni’a i te pere’o’o i te vāhi ’a topa ai te ’ohe iti.
’Ua hi’o a’era te mau tamari’i i te tahi ’e te tahi ma te ri’ari’a. I muri iho, ma te paraparau ’ore, ’ua taora atu rātou i te mau ’ohe iti i ni’a i te ’aihere ’e ’ua horo atu i roto i te fare.
I taua avatea ra i muri a’e, ’ua ho’i atu te mau ta’ata ato’a i tō rātou pere’o’o nō te ho’i i te fare. ’Ua ’ite atu te metua vahine fēti’i o Daniel i te pu’u i ni’a i tōna pere’o’o uira. « E aha tei tupu ? » ’ua ui ’oia.
’Ua teimaha roa te ’ōpū o Daniel. ’Aita rā ’oia i parau a’e hō’ē parau. ’Ua pa’i’uma noa ’oia i roto i te pere’o’o ’e ’ua tārape atu nō te aroha i tōna mau taea’e fēti’i.
I ni’a i te purūmu ho’ira’a i te fare, ’ua pārahi māmū noa Daniel i ni’a i te parahira’a i muri. ’Ua tāmata ’oia i te tai’o i tāna buka. ’Aita rā i ti’a iāna ’ia rōtahi atu. E au ra ’ua ma’ihia ’oia i roto iāna nō te ’ohipa i tupu. ’Ua ’ite ’oia ē, te vai ha’avare-’ore-ra’a ’o te ’ohipa maita’i a’e e rave. Te paraura’a rā i te parau mau e mea fifi roa ïa ! E riro tōna nā metua i te riri rahi roa atu iāna. Nā reira ato’a tōna metua vahine fēti’i.
I muri iho, ’ua mana’o Daniel i tāna ’aito au roa i roto i te pāpa’ira’a mo’a. ’O Daniela i roto i te Faufa’a Tahito tei hurihia i roto i te ’āpo’o o te mau liona, nō tōna mā’itira’a i te maita’i. E ta’ata itoito roa ’oia. Penei a’e e nehenehe ato’a ’o Daniel e riro ’ei ta’ata itoito.
« Hei, māmā ? » ’Ua parau atu Daniel. « ’Ua tāora vau i te hō’ē ’ohe iti nō te aihere, ’e ’ua puta atu i ni’a i te pere’o’o o tati Robilyn ’e ’ua ’āpo’ohia. Nā’u te hape ».
’Ua hi’o atu māmā iāna nā roto i te hi’o hipamuri. ’Aita ’oia i riri rahi mai tā Daniel i mana’o. « Māuruuru nō tō ’oe fa’a’itera’a mai iā’u i te parau mau », tāna ïa i parau.
Huti a’era Daniel i te aho hōhonu. « E nehenehe ānei au e pi’i ia tati Robilyn ’ia tae ana’e tātou i te fare ? » ’ua ui atu ’oia. « Tē hina’aro nei au e tātarahapa. ’E e rave itoito vau i te ’ohipa ’ia roa’a mai te moni nō te ’aufau i te tātā’īra’a i tōna pere’o’o uira.
’Ua ʼataʼata māmā. « E mana’o maita’i roa te reira ».
’Ua ’ore roa te mana’o teimaha i roto i tōna ’ōpū, ’e ’ua putapū Daniel i te hau. ’Ua roa’a iāna te itoito nō te fa’a’ite i te parau mau. Maoti Iesu Mesia, ’ua nehenehe iāna e tātarahapa ’e e fa’anaho maita’i i te mau mea.
Faʼahōhoʼaraʼa nā Josh Talbot