Te mahana fiu o Patrik

Nā Rebekah Jakeman

(Nō roto mai i te hō’ē ’ā’amu mau)

Nō Patrik, e mea ’ohipa tāmau roa tōna mau taea’e pa’ari.

’Ua tupu teie ’ā’amu i te fenua Marite.

Tē hi’o ra Patrik i te aroaro ’a tārava noa ai ’oia i ni’a i tōna ro’i. ’Ua fiu roa ’oia. ’Ua tai’o a’ena ’oia i tāna mau buka ’ānimara, ’ua ’ōu’a i ni’a i te ’ōu’ou’ara’a rereata ’e ’ua ta’ahi i tōna pereo’o ta’ata’ahi nā roto i te aroā. E aha tāna e nehenehe e rave i teienei ?

’Ua ti’a mai Patrik i ni’a ’e ’ua haere atu i te piha o Daniel tōna tua’ana. « E hina’aro ānei ’oe e ha’uti nā muri iā’u ? » ’Ua ui atu Patrik.

« ’Eiaha e ’ino’ino mai, e’ita tā’u e nehenehe. E ti’a iā’u e tāmau i tā’u ha’api’ira’a », ’ua pāhono atu Daniel. ’Aita roa a’e ’oia i hi’o mai ’a tai’o noa ai ’oia i tāna buka.

’Ite a’e ra Patrik i tōna māfatu i te vīra’a. Tē tāmau noa ra Daniel i tāna ha’api’i’ra’a. ’Aita ānei tāna e nehenehe e fa’afa’aea ri’i ?

Tī’ārā hoa ïa. Mea ’ohipa roa Daniel, e nehenehe paha ïa Patrik e ani i te tahi atu o tōna taea’e, ia Simion. « ’Ua fiu roa vau. E nehenehe ānei ’oe e ha’uti nā muri iā’u ? » ’Ua ui atu Patrik.

« ’Aita, ’eiaha i teie mahana. E haere au nā muri i tō’u mau hoa ». ’Ua ’ō’omo Simion i tōna pereue ’e ’ua haere atu i rāpae nā te ’ōpani tomora’a o te fare.

’Ua riri rahi roa Patrik ! ’Ua tūpa’ipa’i vitiviti tōna māfatu. E mea ’ohipa tāmau roa tōna nā tua’ana. ’Ua horo atu ’oia i tōna piha ’e ’ua tāpiri pūai i te ʼōpani.

E ’ere i te mea tano ! Mana’o a’era Patrik.

’Ua tūpa’ipa’i ’oia i tōna ’āvae i ni’a i te tahua ’e ’ua fa’atopa atu iāna i ni’a i tōna ro’i. ’Ua vī roa tōna ’ōuma. ’Ua fiu roa ’oia ! ’Ua riri roa rā ’oia nō te feruri i te tahi atu ’ohipa e rave.

I muri iho, ’ua ha’amana’o ’oia i te tahi mea ’o tāna i ha’api’i mai i te fare ha’api’ira’a. ’Ua ha’api’i tāna ’orometua ia rātou ē, te huti-hōhonu-ra’a i te aho e nehenehe e tauturu ia rātou ’ia putapū i te hau.

« Mea fifi roa ’ia tāta’i i te hō’ē ’ohipa ’ia riri ana’e ’oe », tā te ’orometua ïa i parau. Penei a’e ē mai te mea e marū ri’i mai a’e ’oia, e nehenehe Patrik e ’ite mai te hō’ē rāve’a nō te pāhono i tōna fifi fiu.

Nō reira ’ua huti Patrik i te aho rarahi ’e te hōhonu. I muri iho, ’ua nā reira fa’ahou ā ’oia. I muri a’e i te tahi taime fa’ahou ā, ’aita tōna ’ōuma i ’ite fa’ahou i te vīra’a. ’Aita ato’a rā ’oia i ’ite e aha te mea tāna e rave.

’Ua pārahi mai ’oia ’e ’ua hi’o atu i te hōho’a o Iesu Mesia i ni’a i te papa’i. E aha tāna e hinaaro ’ia rave Patrick ?

’Ua tūturi atu Patrik. « E te Metua i te ao ra, ’a tauturu ia Daniel ’a tāmau ai ’oia i tāna ha’api’ira’a », ’ua parau ’oia. « ’A tauturu ia Simion ’ia ’ārearea maita’i ’e tōna mau hoa. ’E ’a tauturu mai nā iā’u ’eiaha vau ’ia fiu ».

I te fa’aotira’a ’oia i tāna pure, e mana’o tei tae mai ia Patrik. ’Ua horo atu ’oia i roto i te piha o Daniel.

« Daniel, ’ia fa’aoti ana’e ’oe, e nehenehe ānei tāua e ha’uti ? »

’Ua hi’o a’e ra Daniel i te uāti i ni’a i te papa’i, mai ni’a mai i tāna buka. « E nehenehe au e fa’afa’aea ri’i i roto e 30 minuti. I muri iho, e nehenehe tāua e haere i rāpae. E hina’aro ānei ’oe e nā reira ? »

« ’Ē ! » ’Ua ’ata’ata Patrik ’e ’ua ho’i ma te horo i roto i tōna piha. ’Ua ’ite mai ’oia i te hō’ē buka ’ānimara nō ni’a i te mau taita, ’o tāna e au ’ia māta’ita’i. I muri a’e i tōna tai’ora’a ma’a taime ri’i, ’ua ha’uti atu ’oia i te mau piha’a rā’au na’ina’i. ’Aita i maoro ’ua ma’iri te taime, ’e ’ua haere atu ’oia ’e ’o Daniel i roto i te uru rā’au fātata mai i tō rātou fare.

« E hina’aro ānei ’oe e ha’uti i te mau ’aito i roto i te reva ’aore rā i te mau ta’ata ma’imi i roto i te uru rā’au ? » ’Ua ui atu Daniel.

« Tei ia ’oe noa. Tā’u noa e ’oa’oa nei ’ia rave tāua i te taime ’o tāua ana’e. E mea maita’i a’e i te fa’aea fiu noa », ’ua parau Patrik.

’Ua ’ata’ata Daniel. « ’Oia ïa, te ha’utira’a nā muri ia ’oe e mea ’ārearea a’e i te tāmaura’a i te ha’api’ira’a nō te hō’ē hi’opo’ara’a ».

’Ua oa’oa roa Patrik ’a ne’e ai ’oia ’e ’o Daniel nā roto i te aihere. ’Ua tauturu te tāmarūra’a iāna, ’ia feruri māramarama a’e ’ia nehenehe iāna e pāhono i tōna fifi. ’E ’ua tauturu te Metua i te ao ra iāna ’ia riro hau atu ā mai ia Iesu Mesia te huru. I te hope’a, ’ua riro te reira ’ei mahana maita’i.

Fa’ahōho’ara’a nā Linh My Nyguyen