Pāpa’ihia e ’oe

Te mau tiare nā tō’u ta’ata tupu

Nā Peter E., 10 matahiti, Utah, Marite

Tau matahiti i ma’iri a’e nei, ’ua pohe te tāne a tō’u ta’ata tupu. ’Ua ’oto roa ’oia.

’Ua ’ite au e aha te huru ’ia pohe ana’e te hō’ē ta’ata tei herehia e ’oe. I te torura’a o tō’u matahiti, ’ua fa’aru’e mai tō’u māmā. I muri a’e tōna pohera’a, ’ua pāpa’i te mau tamari’i nō tō’u vāhi fa’aeara’a i te tahi mau parau ri’i, nā tō’u tua’ane ’e nā’u, ’e ’ua fa’a’una’una i tō mātou ’āua i te mau ha’uti e rave rahi. ’Ua hina’aro ato’a vau e rave i te hō’ē ’ohipa maita’i nō tō’u ta’ata tupu.

’Ua pure au nō te ’ite e aha tā’u e nehenehe e rave nō te tauturu. ’Ua tae mai te mana’o iā’u e hōro’a nāna i te tahi tiare nō te ’ōro’a Saint Valentin. Teie rā, tītauhia iā’u ’ia roa’a mai te moni nō te ho’o mai i te mau tiare. ’Ua ha’amau vau ’ei ’ōpuara’a i roto i tā’u Buka arata’i nā te mau tamari’i ’ia roa’a mai te moni.

’Ua roa’a mai iā’u te moni nā roto i te ravera’a i te tahi mau ’ohipa rau nā vetahi ’ē. ’Ua ’aufau mai tō’u māmā rū’au iā’u nō te tāmāra’a i tāna ’āua tiare ’e te ’ohira’a i te mau pehu i roto i tōna ’āua. I te fare, ’ua roa’a mai te moni iā’u nā roto i te ’ohira’a i te mau ’aihere i muri mai i tō mātou fare maeha’a. ’Ua tītauhia e rave rahi ’āva’e i te ’ohipara’a ’ia roa’a tano maita’i te moni.

I te pae hope’a, ’ua nava’i maita’i tā’u moni nō te haere i te fare toa ’e e ho’o mai i te mau tiare. Tae mai nei te ’ōro’a Saint Valentin, ’ua pūpū atu vau i te mau tiare ’e te hō’ē rata i tō’u ta’ata tupu. E ’oa’oa rahi tōna. ’Ua putapū ato’a vau i te tāmāhanahana ’e te ’oa’oa. ’Ua ha’amāuruuru vau i te Metua i te ao ra i te tauturura’a mai iā’u ’ia rave i te ’ohipa ’o tāna i hina’aro ’ia rave au.

Fa’ahōho’ara’a nā Dave Klüg