Mau ’ohipa ri’i nō te Mai, pe’e mai

Nō te pō ’utuāfare ’aore rā te ’imira’a maita’i pāpa’ira’a mo’a—’aore rā nō te ’ārearea noa !

26 nō ’Ātete–1 nō Tetepa

Te mau niu pāutuutu

Nō te Helamana 1–6

’Ua ha’api’i Helamana i tāna nā tamaiti ’ia patu i tō rātou orara’a i ni’a i te niu pāutuutu ’o Iesu Mesia (hi’o Helamana 5:12). Hō’ē niu o te hō’ē ïa mea e patuhia i ni’a iho. E ha’apūai te hō’ē niu pa’ari maita’i i te tā’āto’ara’a o te fare patu, noa atu i roto i te mau vero. Hāmani e piti pare—hō’ē i ni’a i te hō’ē niu pa’ari maita’i ’e hō’ē i ni’a i te hō’ē niu paruparu. Tei hea pare e mea pa’ari maita’i a’e ? Nāhea e ti’a ai ia tātou e patu i tō tātou orara’a i ni’a ia Iesu Mesia ?

Nō te mau tamari’i ’āpī a’e : ’A tauturu i tā ’outou mau tamari’i ri’i ’ia ’ite mai i te hō’ē mea tā rātou e mana’o rā e mea pa’ari mau. E aha tā rātou i ’ite mai ? ’A ha’api’i ē, e nehenehe tātou e riro ’ei mea pa’ari mau ’e Iesu Mesia.

2–8 nō Tetepa

’Itera’a pāpū nō te Mesia

Nō te Helamana 7–12

E rave rahi ta’ata i roto i te mau pāpa’ira’a mo’a tei ha’api’i ’e tei fa’a’ite pāpū nō Iesu Mesia (hi’o Helamana 8:16–20). E nehenehe ’oe e ha’amata i te patu ato’a i tō ’oe ’itera’a pāpū nō ni’a iāna ! Te hō’ē ’itera’a pāpū ’o te hō’ē ïa mea tā ’oe e ti’aturi nei ’aore rā, i ’ite e parau mau nō ni’a i te Metua i te ao ra ’e ia Iesu Mesia. ’A pāpa’i i tō ’oe ’itera’a pāpū ’e ’a ha’api’ipi’i i te fa’a’itera’a atu i te reira i tō ’oe ’utuāfare ’aore rā i tō ’oe mau hoa.

Nō te mau tamari’i ’āpī a’e : E ani i tā ’outou mau tamari’i ri’i e aha tā rātou e au nei nō ni’a ia Iesu Mesia. I muri iho, ’a fa’a’ite ia rātou i tō ’outou ’itera’a pāpū nō ni’a i te Fa’aora.

9–15 nō Tetepa

Samuela e pa’uma rā i ni’a i te papa’i

Nō te Helamana 13–16

E peropheta Samuela tei ha’api’i nō ni’a ia Iesu Mesia i ni’a i te patu o te hō’ē ’oire (hi’o Helamana 13:4). ’A haere i te ’api 12 ’e ’a hāmani i te ha’arima’ī nō te tauturu ia ’outou ’ia fa’ati’a i te ’ā’amu o Samuela.

Nō te mau tamari’i ’āpī a’e : ’A tāpe’a i tā ’outou mau tamari’i ri’i ’a ti’a ai rātou i ni’a i te hō’ē pārahira’a, ’e ’a fa’a’ite ai i te mea tā rātou i ’ite nō ni’a ia Iesu Mesia, mai tā Samuela i rave.

16–22 nō Tetepa

Ha’utira’a nō te ha’aputuputura’a

Nō te 3 Nephi 1–7

’Ua fafau Iesu Mesia e ha’aputuputu ’oia i tāna mau tamari’i ato’a nō te mea ’ua here ’oia i te mau ta’ata ato’a ’e tē hina’aro nei ’oia ’ia roa’a te ’evanelia ia rātou (hi’o 3 Nephi 5:24). ’A ha’uti i te hō’ē ha’uti nō ni’a i te ha’aputuputura’a ’Ia ti’a ha’amenemene te mau ta’ata ha’uti. E parau te hō’ē ta’ata i rōpū i te hō’ē parau nō ni’a iāna iho, mai tāna ’ū au roa a’e. Mai te mea e parau mau te reira nō te tahi atu ta’ata, e haere ato’a ïa ’oia i rōpū. ’A tāmau noa i te nā reira ē tae roa atu ’ua ha’aputuputuhia te mau ta’ata ato’a i rōpū.

Nō te mau tamari’i ’āpī a’e : ’A ha’uti perē tāpo e tā ’outou mau tamari’i ri’i. E tauahi ia rātou ’ia ’itehia mai rātou. ’A parau atu nō ni’a i te huru ’a fafau ai Iesu Mesia e ha’aputuputu ’oia ia tātou noa atu te vāhi tei reira tātou.

23–29 nō Tetepa

’O Iesu te māramarama

Nō te 3 Nephi 8–11

’O Iesu Mesia « te māramarama ’e te ora o te ao nei » (3 Nephi 9:18). ’A māta’ita’i i te hitira’a ’aore rā i te topara’a mahana ’e tō ’oe ’utuāfare. I muri iho ’a pāpa’i hōho’a i te mea tā ’oe i ’ite. ’A pāpa’i hōho’a noa ai ’outou, ’a ’āparau nō ni’a i te mau tumu ’outou i here ai ia Iesu Mesia ’e nāhea ’oia i te hōpoi mai i te māramarama ia ’outou.

Nō te mau tamari’i ’āpī a’e : ’A haere i rāpae ’e ’a māta’ita’i i te mau māramarama rau e vai ra, mai te mahana, te mau feti’a, ’aore rā te ’āva’e. E ani i te mau tamari’i ri’i e aha tā te māramarama e ha’aputapū nei ia rātou. E parau e mea nāhea Iesu Mesia e riro ai ’ei māramarama nō tātou.

Fa’ahōho’ara’a nā Katy Dockrill