« Ha’apōpoura’a i nā pupu to’opiti », Hoa, Tetepa 2024, 30–31.
Ha’apōpoura’a i nā pupu to’opiti
’Ua fa’atu’atu’a Jayne i tōna mata. ’Aita ’oia i hina’aro ’ia rē te tahi atu pupu !
’Ua tupu teie ’ā’amu i te fenua Kōrea Apato’a.
’Amu hōpe’a a’era Jayne i tāna mau nūi. Mmmm. ’Auē te au ē !
« Ha’uti ana’e i te Yut Nori ! » ’Ua parau tonton Ji-Ho.
Teie fa’ahou taua taime ra o te matahiti ! Tē fa’ahanahana nei tōna ’utuāfare i te Chuseok, e ’ōro’a ha’amāuruurura’a a te nūna’a Kōrea. I teie mahana, ’ua ha’aputuputu mai te ’utuāfare o Jayne, nō te ’amu e rave rahi mā’a ’e nō te ha’uti ’āmui i te Yut Nori. Te Yut Nori, e ha’uti au roa nā Jayne.
E pārahi ha’amenemene te mau ta’ata i ni’a i te tahua. ’Ua hiʼo hā’ati a’era Jayne. ’O vai te pupu tāna e hina’aro e ’āmui atu ? ’Ua haere atu ’oia e pārahi i pīha’i iho ia tonton Ji-Ho. « Tē hina’aro nei au e ha’uti i roto i tā ’oe pupu ! » ’ua parau Jayne « E riro mai tātou ’ei mau ta’ata upo’oti’a rahi ! »
’Ua ’ata’ata tonton Ji-Ho. « Ia ’oe i roto i tā tātou pupu, mea pāpū e roa’a te rē ia tātou ! »
’Ua tu’u atu te māmā o Jayne i te ’iri ha’uti i rōpū i te ha’amenemenera’a. Tauturu atu ra Jayne iāna ’ia fa’ati’ati’a i te mau tuha’a iti. ’Ua hōro’a atu i nā rā’au e maha i te pupu e ha’amata.
’O Ana, te tuahine fēti’i o Jayne tei ha’uti nā mua. Tāora a’era ’oia i te mau rā’au i roto i te aore. Nā te huru topara’a te mau rā’au i raro e fa’a’ite, e hia ’oehā tā te pupu e nehenehe e fa’anu’u i ni’a i te ’iri ha’uti. ’Ua topa atu nā rā’au e maha te aro i raro, tōna aura’a ’ua roa’a hō’ē Yut ia Ana ! ’Ua ti’a iāna e fa’anu’u i te tuha’a iti e maha ’oeha i mua nō tāna pupu ’e ’ia ha’uti fa’ahou.
’Aita rā Ana i roto i te pupu a Jayne.
’Ua tūfene Jayne i tōna nā rima ’e ’ua fa’atu’atu’a te mata. Muhumuhu a’era Jayne ia tonton Ji-Ho, « maita’i ē ’aita ’oia e tāora maita’i ».
« Pōpou iāna ! » ’Ua parau tonton Ji-Ho. « Nō ha’amata noa atu ra te ha’uti ». ’Ua ’ata’ata fa’aitoito tonton Ji-Ho ia Ana.
I muri a’e te ha’utira’a piti a Ana, ’ua tāora atu te pupu a Jayne i te mau rā’au. ’Aita rā i ti’a ia rātou e fa’anu’u i tā rātou tuha’a iti ātea a’e i te pupu a Ana.
I te mau taime ato’a, e ha’apōpou ’e e ’ata’ata te mau melo o te ’utuāfare o Jayne. Tē hi’o noa ra Jayne i te mau tuha’a iti e fa’anu’u ra i ni’a i te ’iri ha’uti. Tē ’ārearea ra te mau ta’ata ato’a.
Te mau ta’ata ato’a ’aita rā ’o Jayne. E pau noa tāna pupu.
I te hōpe’a, na Jayne e ha’uti. ’Ua tāora ’oia i te mau rā’au i roto i te aore, hō’ē ana’e rā tei topa te aro i raro. ’Ua fa’anu’u noa te tuha’a iti e hō’ē ’oeha nō tāna pupu.
Tūfene a’era Jayne i tōna nā rima. ’Ua tuō atu Jayne « ’aita vau e ha’uti fa’ahou ! ». « ’Ua hina’aro vau ’ia rē tātou ! »
Fa’aea tā’ue roa te māniania. I tōna hi’ora’a atu, tē hi’o noa mai rā tōna ’utuāfare iāna. E au ra ’ua māere roa rātou i tōna riri rahi.
’Ua ’ute’ute roa te hōho’a mata o Jayne. ’Ua māuiui roa ’oia i te ’orera’a e ’oa’oa nō tōna ’utuāfare. Tei mātauhia, e ’ere ’oia i te mea riri roa mai teie te huru. Ti’a a’ere ’oia nō te haere i rāpae i te ha’amenemenera’a.
’Ua tāpe’a mai tonton Ji-Ho i te rima. « ’Aita ’oe i tītauhia e haere i rāpae », ’ua parau ’oia. « E ’ere noa te rē i te mea hina’arohia. E tāmata āna’e i te ’ārearea noa ».
« Nā reira ». Pārahi iho ra Jayne i raro. ’Ua hina’aro ’oia ’ia ’ārearea mai te mau ta’ata ato’a. Huti pūai a’era ’oia i te aho ’e ’ua hi’o atu i tōna taea’e fēti’i ia Ben e tāora ra i te mau rā’au.
« Maita’i roa, e Ben ! » ’Ua parau tonton Ji-Ho. E au ra e ’oa’oa rahi tōna.
’Ua hi’o a’era Jayne ma te mata ’ara’ara ia tonton Ji-Ho. Tē fa’aitoito rā ’oia i te tahi atu pupu ! Penei a’e nō reira ’oia e ’ārearea roa ai.
’A ha’amata ai te ha’utira’a i muri iho, ’ua fa’aoti a’era Jayne e fa’aitoito i te mau ta’ata ato’a o nā pupu e piti. ’Ua tano roa tonton Ji-Ho. E ’ere noa te rē i te mea hina’arohia. E nehenehe Iesu e tauturu iāna, ’ia ’oa’oa nō te mau melo o tōna ’utuāfare, noa atu e pau ’oia.
Taera’a i te taime nō Ana ’ia ha’uti, ’ua ’ata’ata Jayne iāna. « ’A fa’aitoito ! E roa’a ia ’oe ».
I tera pae mai o te ha’amenemenera’a, ’ua ’ata’ata ato’a mai Ana. ’Ua māhanahana te ’ā’au o Jayne. Tē ’ārearea rahi nei ’oia i teienei !
Fa’ahōho’ara’a nā Uran Duo