« Te ’ōpuara’a ihi », Hoa, Tetepa 2024, 18–19.
Te ’ōpuara’a ihi
« Tē hina’aro nei te Metua i te ao ra ’ia tāmau noa tātou i te tāmata ».
’Ua tupu teie ’ā’amu i te fenua Marite.
’Ua tu’u fa’ahou atu Bradley i te tahi atu ’āu’a one i roto i tāna pātete. E tītauhia iāna ’ia fa’arahi te one !
Tē fātata mai ra ho’i te fa’a’ite’itera’a ihi a tāna fare ha’api’ira’a i te tupu. Tē hāmani nei Bradley i te hō’ē hōho’a e fa’a’ite ra e mea nāhea te miti nīnā fenua i te tupu. ’Ua ha’api’i mai ’oia ē, te miti nīnā fenua ’o te hō’ē ïa ’are rarahi tei fa’atupuhia e te hō’ē ’āueuera’a fenua i raro i te moana. ’Ua hina’aro ’oia ’ia maita’i roa tāna ’ōpuara’a. Penei a’e e noa’a iāna te hō’ē rē !
Te ’īra’a tāna pātete, ’ua ha’aputu Bradley i te tahi mau rā’au. I muri iho, ’ua ’iteahia mai iāna te hō’ē vaira’a pehu ’ūrina ’e te tahi mau fare ha’uti na’ina’i i te tahua i raro.
’Ua māni’i Bradley i te one i roto i te vaira’a pehu nō te hāmani i te fenua. ’Ua tu’u māite atu ’oia i te mau fare ’e te mau tumu ra’au. I muri mai ’o te tuha’a fa’ahiahia roa ïa—te pape ! I te taime ’a māni’ihia ai te pape, e nehenehe te reira e tūra’i i te hō’ē ’api parau pa’ari i roto i te pape nō te fa’atupu i te ’are.
I muri iho rā ’ua rave ’oia i te hō’ē hape rahi. ’Ua māni’i rahi roa ’oia i te pape ! ’Ua nīna roa te pape i te mau fare—’e ’aita ā ’oia i fa’atupu atu ra i te vāve’a. ’Ua fa’atupu te one rari i te hō’ē fa’arapura’a varevare ’e te vari paruparu.
’Ua pi’i atu Bradley i tōna māmā i roto i te piha tunura’a mā’a. « E aha tā’u e rave i teienei ? ’Ua tu’u rahi roa vau i te pape ».
« ’Aita e fifi. E nehenehe noa ’oe e ha’amata fa’ahou », ’ua parau māmā. « E rave ’āmui ana’e tāua i te reira ’e e fāito marū noa ai ».
« Nā reira ». ’Ua pi’o atu Bradley i tōna upo’o ’e ’ua haere atu i rāpae nō te rave fa’ahou mai i te one.
I teie ra taime, ’ua fāito māite maita’i rāua i te fāito o te pape ’e ’ua māni’i atu i te reira i roto. ’Ua fa’anu’u Bradley i te ’āfata parau ’e ’ua māta’ita’i i te mau ’are i te ūra’a i ni’a i te one. ’Ua manuia !
I muri iho, ’ua ’ohipa Bradley ’e ’o māmā i ni’a i tāna hōho’a pia. ’Ua ha’amata ’oia i te pāpa’i i te tahi mau ’ā’amu iti ’ārearea nō ni’a i te miti nīnā fenua. ’Aita te mau parau e mau maita’i rā i ni’a i te ’api parau.
« ’Aita vau e hina’aro e pāpa’i fa’ahou ā i te reira ! » ’ua parau Bradley. ’Ua ha’amata tōna upo’o i te māuiui.
« ’Aita e tītauhia ia tāua e pāpa’i fa’ahou ā i te reira » ’ua nā ’ō atu māmā. « E nehenehe noa tāua e fa’anaho fa’ahou te parau ’ia mau te reira i ni’a i te ’api ».
’Ua ’ū’uru Bradley. ’Aita roa tāna hōho’a pia i tano maita’i mai tāna i mana’o. « ’Aita vau e hina’aro e rave i te reira. E au ra e mea ’ino roa te reira, mai te peu ’aita te mau parau e tano maita’i roa ».
« E nehenehe te ha’api’ira’a mai e riro ’ei ’ohipa fifi ». ’Ua tauahi atu māmā iāna. « I te tahi taime, e rave tātou i te hape. Te mea faufa’a rā ’o te ’orera’a ïa e fa’aru’e. Tē hina’aro nei te Metua i te ao ra ’ia tāmau noa tātou i te tāmata. Nō reira e fa’afa’aea ri’i tāua ’e ananahi po’ipo’i e fa’aoti atu ai ».
I te po’ipo’i a’e, ’ua fa’aoti rāua i tāna hōho’a pia. E ’ere i te mea maita’i roa, ’ua ’oa’oa ri’i rā Bradley nō te reira.
Teie mai nei te mahana nō te fa’a’ite’itera’a ihi. ’Ua ’āfa’i atu māmā ia Bradley i te fare ha’api’ira’a. « ’A ha’amana’o », ’ua parau māmā, « ’ua ha’a itoito ’oe i ni’a i tā ’oe ’ōpuara’a ’e ’ua ’apo rahi mai ’oe. ’O terā te mea faufa’a a’e ».
’Ua ’āfa’i atu Bradley i tāna ’ōpuara’a i te fare ha’atū’arora’a rahi. ’Ua ’ī te reira i te mau ’ōpuara’a ’e te mau hōho’a pia. ’Ua pārahi te mau pīahi ato’a nō te piha maha ’e tē tīa’i ra i tō rātou taime nō te fa’a’ite i tā rātou ’ōpuara’a.
’Aita i maoro roa, teie te taime nō Bradley. ’Ua tūpa’ipa’i vitiviti tōna māfatu ’a haere ai ’oia i mua. ’E mai te peu ’aita te mau mea e tupu maita’i ?
’Ua tūra’i atu Bradley i te ’āfata parau i roto i te pape ’e ’ua fa’a’ite atu i te mau ta’ata hi’opo’a nāhea te mau ’are i te ū atu i ni’a i te fenua.
« Nā vai e fa’atupu i teie mau ’are rarahi i ni’a i te moana ? » ’ua ui mai te hō’ē o te mau ta’ata hi’opo’a.
« E fa’atupuhia te mau ’are rarahi e te… » ’Ua mo’e roa te ferurira’a o Bradley. « ’Aita vau e ha’amana’o fa’ahou ra. E nehenehe rā vau e fa’ati’a atu i te tahi mau ’ā’amu ri’i hō’ata nō ni’a i te miti nīnā fenua ». ’Ua tai’o atu ’oia i te mau tupura’a i ni’a i tāna hōho’a pia.
I muri a’e i te ha’api’ira’a, ’ua pa’i’uma Bradley i roto i te pere’o’o ’e tāna ’ōpuara’a.
« E aha te huru ? » ’Ua ui atu māmā.
« E ’ere mai tā’u i mana’o ». ’Ua ’ata’ata Bradley. « ’Ua rave rā vau mai tā’u e nehenehe ’e ’ua tāmau noa i te tāmata ».
Fa’ahōho’ara’a nā Adam Koford