« Te ’āfata o te pe’ape’a », Hoa, Tetepa 2024, 36–37.
Te ’āfata o te pe’ape’a
’Ua feruri rahi Olivia i tōna mau pe’ape’a.
’Ua tupu teie ’ā’amu i te fenua Marite.
’Ua horo atu Olivia i rāpae i tāna piha ha’api’ira’a hou te fa’aotira’a o te ha’api’ira’a. ’Ua tāmata ’oia ’eiaha e hi’o i te ta’ata i roto i te mata.
I teie mahana, e mahana mātāmua ïa nō te rapa’aura’a o Olivia. ’Ua fa’ata’a tōna māmā iāna ē, e fārerei atu ’oia i te hō’ē taote ’o tē nehenehe e tauturu iāna ’ia pāhono i tōna mau pe’ape’a. ’Ua fa’aurua’ī Olivia i te pe’ape’a rahi. I te tahi taime, nō tōna pe’ape’a rahi e mea fifi nōna ’ia ta’oto ’aore rā ’ia ’ārearea ’e tōna mau hoa.
’Ua ta’uma atu Olivia i roto i te pere’o’o ’e tōna māmā ’e ’ua fa’ahe’e atu i roto i tōna pārahira’a.
« Mea maita’i ’oe ? » ’Ua ui atu māmā.
’Aita Olivia i pāhono ’oi’oi atu. « Nō te aha e tītauhia iā’u e haere i te taote ? »
’Ua ha’amata māmā i te fa’ahoro i te pere’o’o. « ’Ua hōro’a mai te Metua i te ao ra ia tātou i te mau taote nō te tauturu ia tātou. Mai tāna i hōro’a mai ia tātou i te tahi atu mau mea nō te tauturu ia tātou, mai te mau hoa ’e te mau pāpa’ira’a mo’a. Tē ha’amana’o rā ’oe i te fifi nō te pāpa’ira’a mo’a tā tāua i hāmani ? »
’Ua tū’au Olivia i tōna upo’o. ’Ua tauturu māmā iāna ’ia ’ite mai i te mau ’īrava o te pāpa’ira’a mo’a ’o tei tauturu iāna ’ia pāhono i tōna mau pe’ape’a. Nō te ’īrava tāta’itahi, e pāpa’i māmā i hea e ’ite mai ai i te ’īrava nō muri iho. ’Ia ha’ape’ape’a ana’e Olivia i te pō, e pure ’oia ’e e ’ite mai ’oia i te hō’ē o te mau ’īrava i roto i te mau pāpa’ira’a mo’a. I muri iho e tai’o ’oia i te tahi atu mau ’īrava o te fifi nō te pāpa’ira’a mo’a ē tae roa i te taime e ta’oto ai ’oia.
’A tomo ai Olivia ’e tōna māmā i roto i te piha tōro’a a te taote, ’ua vauvau mai te Taote Posy ’o vai rā ’oia. ’Ua uiui atu ’oia ia Olivia nō ni’a i tōna mau nino’a mana’o. ’Ua paraparau ri’i Olivia iāna nō ni’a i tōna mau pe’ape’a.
« E rave rahi ta’ata e ro’ohia nei i te mea tei pi’ihia te ahoaho », ’ua parau te taote Posy. « E ha’ape’ape’a rahi nei rātou mai ia ’oe. E nehenehe rā ’oe e rave i te tahi mau ’ohipa nō te tauturu ia ’oe ’ia ha’ape’ape’a iti mai. E nehenehe ānei ’oe e tāmata i te hō’ē o te reira ’e o vau ? »
Hi’o iho ra Olivia i tōna tia’a ’e tū’au ihora tōna upo’o.
’Ua fa’atoro atu te Taote Posy i te hō’ē ’āfata iti ia Olivia. « E ’āfata o te pe’ape’a teie. E pāruru te reira i tō tātou mau pe’ape’a, nō reira ’eiaha fa’ahou tātou e feruri nō te reira ».
’Ua fa’ahurihuri Olivia i te ’āfata i roto i tōna nā rima. E ’ere ho’i te reira i te ’āfata ta’a ’ē.
« I te mau taime i muri nei ’ia ri’ari’a ana’e ’oe, ’a pāpa’i i tō ’oe ha’ape’ape’ara’a i ni’a i te hō’ē ’api parau iti ’e ’a tu’u i roto i te ’āfata », ’ua parau te Taote Posy. « I muri iho, ’a mā’iti i te hō’ē taime nō te ’īriti i te ’āfata i te mau mahana ato’a, nō te taime ha’ape’ape’ara’a. Mai te mea e ha’ape’ape’a ’oe i te hō’ē ’ohipa hou te taime ha’ape’ape’ara’a, ’a parau atu, ‘’aita vau e hina’aro e feruri i te reira i teie taime’ ».
« Nā reira », ’ua parau Olivia. ’Ua tauturu te Taote Posy iāna ’ia pāpa’i i tōna mau pe’ape’a rahi roa a’e, ’e ’ua tu’u atu Olivia i te reira i roto i te ’āfata.
I muri a’e i taua mahana ra, ’ua puta mai te hō’ē o te mau ha’ape’ape’ara’a o Olivia i roto i tōna upo’o. ’Ua parau ’oia iāna iho, tei roto te reira i te ’āfata o te pe’ape’a. E nehenehe au e ha’ape’ape’a nō te reira i muri iho. ’Ua tāmata ’oia i te fa’aea i te feruri i te reira. ’Ua ha’uti ra ’oia ’e tōna taea’e.
I te taime nō te here e ta’oto, ’ua tupu te hitahita i roto ia Olivia. I te maorora’a pō tōna mau ha’ape’ape’ara’a e pūai roa ai. ’Ua tu’u atu ’oia i tāna ’āfata o te pe’ape’a ’e tāna mau pāpa’ira’a mo’a i pīha’i iho i tōna ro’i ’e ’ua pi’i ia māmā.
« E mai te mea ’aita te reira e manuia ? » ’ua ui atu ’oia.
Tauahi a’era māmā iāna. « E tāmata fa’ahou ïa tāua i muri iho. E tauturu mai te Metua i te ao ra ia ’oe ’ia ’ite mai i te tahi atu mau rāve’a nō te tauturu ».
’Ua tū’au Olivia i tōna upo’o. « Penei a’e e ti’a iā’u e pāpa’i ato’a i te reira nō te ’āfata o te pe’ape’a ».
« E mana’o maita’i roa », ’ua parau māmā. ’Ua pure ’oia nā muri ia Olivia. ’Ua tauturu te reira ia Olivia ’ia maita’i a’e mai.
’Aita i maoro tō māmā tūpohera’a i te mori, ’ua puta fa’ahou mai te hō’ē pe’ape’a i te upoo o Olivia. Tū’ama iho ra ’oia i te mori. Pāpa’i atu ra i taua pe’ape’a ra ’e ’ua tu’u atu te reira i roto i te ’āfata nō te tahi atu taime. ’Ua parau ’oia i te hō’ē atu pure nō te ani i te Metua i te ao ra ’ia tāmāhanahana mai iāna.
I muri iho, ’ua ’īriti mai ’oia i tāna mau pāpa’ira’a mo’a ’e ’ua ’imi i te hō’ē ’īrava tei rēnihia i roto i tāna fifi nō te pāpa’ira’a mo’a. Te ’īrava mātāmua tāna i ’ite mao ’o Isaia 41:10. ’O te nā ’ō nei, « ’eiaha e mata’u tei pīha’i iho ato’a vau ia ’oe ».
I pīha’i iho i te ’īrava, ’ua pāpa’i māmā « Te Ha’api’ira’a Tumu ’e te mau Fafaura’a 6:36 ». ’Ua ’imi Olivia i taua pāpa’ira’a mo’a ra ’e ’ua tai’o pūai i te reira. « A hi’o mai iā’u nei i tō mau mana’o ato’a na ; ’eiaha e fea’a, ’eiaha e mata’u ».
’Ua fa’ari’i Olivia i te hau. ’Ua ’ite ’oia ē, e feruri iho ā ’oia i te tahi atu ā mau pe’ape’a. ’Ua hōro’a mai rā te Metua i te ao ra iāna e rave rahi mau mea nō te tauturu iāna ’ia maita’i a’e mai. ’Ua pāhono te Metua i te ao ra i tāna mau pure. ’E ’ua tauturu rahi mai te reira !
Fa’ahōho’ara’a nā Jennifer Naalchigar