Ko e Pilinisi ʻo e Melinó

Fai ʻe Palesiteni Dallin H. Oaks

Tokoni ʻUluaki ʻi he Kau Palesitenisī ʻUluakí

Toʻo mei he Facebook, Dec. 8, 2019, mo e Dec. 13, 2023, facebook.com/dallin.h.oaks.

ʻI he faʻahitaʻu Kilisimasi ko ʻení, ʻoku fakamanatua ai ʻe he māmaní ʻa e ʻaloʻi ʻo Sīsū Kalaisi, ko e “ʻEiki ʻo e Melinó.” (ʻĪsaia 9:6) ʻOku tau fakakaukau ki Hono ʻaloʻí, ʻEne moʻuí, mo Hono misioná. ʻI he ngaahi fakahinohino fakaʻosi ʻa Sīsū Kalaisi ki Heʻene Kau ʻAposetoló, naʻá Ne folofola ai, “ʻOku ou tuku ʻa e melinó kiate kimoutolu, ko ʻeku melinó ʻoku ou foaki kiate kimoutolu: ʻoku ʻikai hangē ko e foaki ʻa māmaní, ʻa ʻeku foaki kiate kimoutolú. ʻOua naʻa mamahi homou lotó, pea ʻoua naʻa manavahē ia.” (Sione 14:27)

Ko e melinó ko e talaʻofa ia ʻa hotau Fakamoʻuí, pea ko e melinó ʻa ʻetau taumuʻá. ʻI heʻetau tauhi ʻa e ngaahi fekau ʻa e ʻOtuá, te tau lava ʻo ongoʻi ʻa e melino ko iá.

ʻI heʻetau fakafiefiaʻi ʻa e Kilisimasi ko ʻení, ʻoku ou fakaʻamu ʻe tāpuekina kimoutolu ʻaki ha nonga ʻi homou lotó mo e ʻofa kiate kinautolu ʻoku mou feohí.

Ko Hono Vahevahe ʻo e Melino ʻa e Fakamoʻuí

Te ke lava ʻo vahevahe ʻa e ʻofa mo e melino ʻa Sīsū Kalaisí! Fili ha ʻekitivitī ke fai mo ho fāmilí ʻi ha ʻaho ʻe 12 ʻo aʻu ki he Kilisimasí. Valivali leva ha meʻa teuteu ʻakau kilisimasi.

Fai ha kiʻi ngāue tokoni fakapulipuli.
Tā ki ha mēmipa ʻo e fāmilí pe kaungāmeʻa ʻoku nofo mamaʻo.
Vahevahe ha kiʻi meʻakai maʻamaʻa pe fakaneifua ʻokú ke saiʻia taha aí.
Vahevahe ʻa e Ko e Kaumeʻá mo ha kaungāmeʻa.
Tā ha fakatātā ke ʻave ki ha tokotaha.
Hivaʻi fakataha ha foʻi hiva Kilisimasi.
Lau ha potufolofola fekauʻaki mo Sīsū.
ʻAʻahi ki ha tokotaha ʻoku taʻelata.
ʻAve ha kaati Kilisimasi ki ha faifekau.
Lau fakataha ha talanoa faka-Kilisimasi.
(Tohi pē haʻaú)
(Tohi pē haʻaú)