“ʻOku Fie Hoko ʻa Sioni ko ha ʻĀngelo,” Ko e Kaumeʻá, Tīsema 2024, 30–31.
ʻOku Fie Hoko ʻa Sioni ko ha ʻĀngelo
Naʻe pehē ʻe Teti, “Taimi ʻe niʻihi ʻoku tau ui ha kakai ko e kau ʻāngelo ʻi he taimi ʻoku nau fai ai ha ngaahi meʻa angaʻofa maʻatautolú.”
Naʻe hoko ʻa e talanoa ko ʻení ʻi he ʻIunaiteti Siteiti ʻo ʻAmeliká.
Naʻe sio takai holo ʻa Sioni ki he ʻū puha pepa lalahi ʻi hono ʻapi foʻoú. Naʻe toki hiki pē hono fāmilí mei ʻĀsenitina ki he ʻIunaiteti Siteití.
Naʻe fakailifia ke hiki ki ha feituʻu mamaʻo ʻaupito. Naʻe foʻou ʻa e meʻa kotoa. Ka naʻá ne ʻiloʻi kapau ʻe fakataha pē mo hono fāmilí, ʻe lelei ʻa e meʻa kotoa.
ʻI he tokoni ʻa Sioni ke ʻaʻau ʻenau utá, naʻe toʻo hake ʻe Mami ha puha lahi pea malimali. Naʻá ne pehē, “ʻOku ʻi lotó ni ʻetau ʻū meʻa teuteu ʻakau Kilisimasí!”
Naʻe malimali ʻa Sioni. Naʻá ne saiʻia ʻi he Kilisimasí pea naʻe ʻikai faʻa tatali ke fakafiefiaʻi fakataha ia mo hono fāmilí. Naʻá ne kei manavasiʻi pē ke nofo ʻi ha feituʻu foʻou, ka naʻá ne fiefia ʻi heʻene ʻilo ʻoku ofi mai ʻa e taimi Kilisimasí.
Hili ha ngaahi ʻaho siʻi mei ai, naʻe tangutu fakataha hifo ʻa e fāmili ʻo Sioní ke nau fanongo ki ha lēsoni efiafi fakafāmili fekauʻaki mo e Kilisimasí. Naʻe fakamatalaʻi ange ʻe Teti ko ha faʻahitaʻu ia ki hono foaki ʻo e ngaahi meʻaʻofá.
Naʻe pehē ange ʻe Sioni, “Tōatu! Ngaahi meʻaʻofá!”
Naʻe talaange ʻe Mami, “ʻIo, ʻoku fakafiefia ʻa e maʻu ʻetau ngaahi meʻaʻofá. Ka ʻoku toe mahuʻinga ange ke tau foaki ha ngaahi meʻaʻofa ki he Fakamoʻuí.”
Naʻe fehuʻi ange ʻe Sioni, “Te tau foaki fēfē ha ngaahi meʻaʻofa kia Sīsū?”
Naʻe talaange ʻe Mami, “Ko e taimi ʻoku tau tokoni ai ki he niʻihi kehé hangē ko ia naʻe fai ʻe Sīsuú, ʻokú ne ʻai ke Ne fiefia.”
ʻI he pongipongi hono hokó, naʻe fanongo ʻa Sioni ki ha tukituki ʻi he matapā ʻi muʻá. Naʻá ne puna mei he mohengá ʻo lele ke sio pe ko hai. Ka ʻi he taimi naʻe fakaava ai ʻe Teti mo Mami ʻa e matapaá, naʻe ʻikai ke ʻi ai ha taha ia ai. Ka naʻe toʻo hake ʻe Mami ha kiʻi meʻaʻofa ngingila siʻisiʻi mei he matapaá.
Naʻe ʻeke ange ʻe Sioni, “Ko e meʻa mei fē?”
Naʻe tali ange ʻe Mami, “ʻOku ʻikai ke u fakapapauʻi.” “Mahalo pē ko ha ʻāngelo!”
Naʻe ʻohovale lahi ʻa Sioni. “Hangē ko e ʻāngelo mei he langí?”
Naʻe malimali pē ʻa Teti. “ʻIkai. Taimi ʻe niʻihi ʻoku tau ui ha kakai ko e kau ʻāngelo ʻi he taimi ʻoku nau fai ai ha ngaahi meʻa angaʻofa maʻatautolú. ʻOku hangē kinautolu ko ha kau tokoni ʻa e Tamai Hēvaní ʻi he māmaní.”
Naʻe punopuna ʻa Sioni. “ʻOku ou fie hoko pē mo au ko ha ʻāngelo! ʻOku ou fie fai ha ngaahi meʻa lelei maʻá e niʻihi kehé. Ko ʻeku meʻaʻofa Kilisimasi ia kia Sīsuú.”
Naʻe talaange ʻe Teti, “Fakakaukau lelei ia! ʻE saiʻia ʻa Sīsū ʻi hoʻo meʻaʻofá.”
ʻI he toenga ʻo e uiké, naʻe ʻā hake ʻa Sioni ʻo maʻu ha meʻaʻofa foʻou ʻi he matapaá ʻi he pongipongi kotoa. Naʻá ne ongoʻi naʻe ʻofeina ia ʻi he taimi naʻe tuku ai ʻe he kau ʻāngeló ha ngaahi meʻaʻofa maʻa hono fāmilí. Naʻá ne fie fakahaaʻi ki hono fāmilí naʻá ne ʻofa foki ʻiate kinautolu.
Ko ia naʻe pau ai ke ngāue ʻa Sioni. Naʻá ne teuteu fakapulipuli ha ngaahi meʻaʻofa maʻa ʻene ongomātuʻá mo hono tokouá mo e tuofefiné. Naʻá ne fakangingila ʻa e sū ʻo Tetí lolotonga ʻene ʻi he ngāué peá ne tā ha foʻi haati maʻa Mami. Naʻá ne kofukofuʻi leva ha taha ʻo ʻene ngaahi kā meʻavaʻinga naʻá ne saiʻia taha aí maʻa hono tokouá. Naʻá ne ʻomi ha foʻi pulukamu maʻa hono tuofefiné.
Naʻe hiki fakalelei ʻe Sioni ʻa e ʻū hingoá ʻi he meʻaʻofa takitaha pea tuku ia ʻi he lalo fuʻu ʻakau Kilisimasí. Naʻe ʻikai ke ne faʻa tatali ke sio ki honau fofonga fiefiá! Naʻá ne ongoʻi māfana ʻi heʻene fakakaukau pē ki aí.
ʻI he ʻAho Kilisimasí, naʻe foaki ʻe Sioni ki he mēmipa takitaha ʻo e fāmilí ʻenau meʻaʻofá. Naʻá ne fuʻu fiefia naʻe ʻikai ai ke ne kei lava ʻo tangutu maʻu.
ʻI he sio ʻa Teti ki hono sū ngingilá, naʻá ne pehē, “ʻOiauē, mālō Sioni! ʻOkú na hā fakaʻofoʻofa ʻaupito.”
Naʻe fakaava ʻe he tokoua mo e tuofefine ʻo Sioní ʻena meʻaʻofá, peá na puna hake ke fāʻofua kia Sioni. Naʻá na talaange, “Mālō!”
Naʻe malimali ʻa Mami ʻi heʻene toʻo ʻa e kofukofu ʻo e fakatātā naʻe tā ʻe Sioni maʻaná. Naʻá ne talaange, “Kuó ke tokoni ke makehe ʻa e Kilisimasi ko ʻení, Sioni. Fakamālō atu ʻi hoʻo hoko ko ʻemau kiʻi ʻāngeló.”
Naʻe ongoʻi loto-fiefia ʻa Sioni. Naʻá ne ʻiloʻi ko ʻene fakahaaʻi ʻene ʻofa ki hono fāmilí, ko e meʻaʻofa lelei taha ia ke foaki maʻa Sīsuú!
ʻŪ tā fakatātā ʻa Daniel Duncan