“Ngaahi Foʻi Teʻelango ʻo e Efiafi Kimuʻa ʻi he Kilisimasí,” Ko e Kaumeʻá, Tīsema 2024, 4–5.
Ngaahi Foʻi Teʻelango ʻo e Efiafi Kimuʻa ʻi he Kilisimasí
Naʻe ulo ngingila ʻa e maama ʻi he faʻitoká kotoa hangē naʻe fetuʻuʻiá.
Naʻe hoko ʻa e talanoá ni ʻi Finilani.
Naʻe lue fakalongolongo atu pē ʻa Sōsika mo hono fāmilí ʻi he sinoú. Ko e Efiafi ʻeni Kimuʻa ʻi he Kilisimasí, pea naʻa nau fakahoko ha taha ʻo e ngaahi tukufakaholo naʻa nau saiʻia taha aí. ʻI he taʻu kotoa pē, naʻe ʻaʻahi ʻa e kakai ʻi Finilaní ki he faʻitoká ke tutu ha ngaahi foʻi teʻelango ʻi he faʻitoka honau ngaahi ʻofaʻangá.
Naʻe lahi ha ngaahi foʻi teʻelango ulo ngingila ʻi he fakapoʻulí. Neongo naʻe momoko, ka naʻa nau ʻai ʻa e faʻitoká ke nau ongoʻi māfana mo nonga.
Naʻe taki kinautolu ʻe he ongomātuʻa ʻa Sōsiká ki ha faʻitoka. Naʻe fehuʻi ange ʻe hono kiʻi tuofefine siʻisiʻí, “Ko hai ʻeni?”
Naʻe talaange ʻe Mami, “Ko ʻeku faʻētangata uá ʻeni.”
Naʻe tuhu ʻa e tehina ʻo Sōsika ko Tuló ki he ʻū ʻaho ʻi he maká. “Naʻe fāʻeleʻi ia ʻi he taʻu ʻe teau tupu kuo ʻosí!”
“ʻIo. Ka ʻokú ne kei hoko pē ko ha konga hotau fāmilí.” Naʻe toʻo hake ʻe mami ha foʻi teʻelango. “ʻOkú ke fie tutu ʻa e foʻi teʻelangó, Sōsika?”
Naʻe kamokamo ʻa Sōsika mo ne tutu ʻa e foʻi teʻelangó. Naʻá ne hili hifo leva ʻi ʻolunga ha foʻi tāpuni kapa avaava. Te ne taʻofi hano puhi ʻe he havilí ke mate ʻene uló. Naʻá ne tuku ʻa e foʻi teʻelangó ki he kelekelé ʻi muʻa ʻi he malaʻé. Naʻe hā fakaʻofoʻofa ʻa e ulo vaivai mai ʻa e māmá.
Naʻa nau ʻalu leva ki he malaʻe hoko ʻa e fāmilí. Naʻe puke ʻe Sōsika ʻa e nima ʻo ʻAsá ʻi heʻenau lué.
Naʻá ne fehuʻi ange, “Ko e hā ʻa e ʻuhinga ʻoku tau tutu ai ʻa e ngaahi foʻi teʻelangó ʻi he ngaahi malaʻé?”
Naʻá ne talaange, “Koeʻuhí he ʻoku mahuʻinga ke manatua ʻa e ngaahi mēmipa ʻo hotau fāmilí.”
Naʻe ʻeke ange ʻe ʻAsa, “Tatau ai pē kapau naʻa nau moʻui kinautolu ʻi he taʻu ʻe teau kuo ʻosí?”
Naʻe talaange ʻe Teti, “ʻIo.” “Ko e kātoa hotau ngaahi mehikitangá, faʻētangatá, kāsiní, mo e kuí, ko ha konga kinautolu ʻo hotau fāmilí. ʻOku tau hoko ko ha fāmili tokolahi pē ʻe taha makatuʻunga ʻia Sīsū Kalaisi.”
Naʻe toʻo hake ʻe Mami ha toe foʻi teʻelango ʻe taha. Naʻe tokoni ʻa Tulo kia ʻAsa ke tutu ia.
Naʻe ʻeke ange ʻe ʻAsa, “Tatau ai pē kapau naʻa nau moʻui kinautolu ʻi he taʻu ʻe teau kuo ʻosí?”
Naʻe fakakaukau ki ai ʻa Sōsika ʻi ha lau miniti. ʻE lava pē ke nau tutu ʻa e ngaahi foʻi teʻelangó ʻi he faʻitoká ʻi ha faʻahinga ʻaho pē. Ko e hā nai ʻoku tutu ai ʻi he Efiafi Kimuʻa ʻi he Kilisimasí?
Naʻe talaange ʻe Sōsika, “Mahalo pē koeʻuhí ko Sīsū ʻa e Maama ʻo e Māmaní.”
Naʻe malimali ʻa Mami. “Ko ha tali lelei ia. ʻOku ou tui ʻokú ke moʻoni.” Naʻá ne tokoni kia ʻAsa ke fokotuʻu ʻene foʻi teʻelangó ʻi he sinoú ʻi he tafaʻaki ʻo e faʻitoká. “Koeʻuhi ko Sīsū Kalaisi, te tau lava ai ʻo fakataha mo hotau fāmilí ʻo taʻengata. Pea koeʻuhí naʻá Ne toe moʻui, te tau toe moʻui foki mo kitautolu.”
Naʻa nau manga kotoa ki mui ke sio ki he ngaahi māmá. Naʻe ulo ngingila ʻa e maama ʻi he faʻitoká kotoa hangē naʻe fetuʻuʻiá.
Naʻe ongoʻi māfana ʻa e loto ʻo Sōsiká ʻi heʻenau lue foki ki he kaá. ʻI heʻenau aʻu ki ʻapí, te nau fakaava ʻenau ʻū meʻaʻofá mo vaʻinga. Ka ʻi he taimi ní, naʻe fiefia ʻa Sōsika naʻá ne feohi mo hono fāmilí ʻi he taimi lōngonoa ko ʻení. Te ne houngaʻia maʻu pē ʻi he maama ʻa Sīsuú.
Tā fakatātaaʻi ʻe Flavio Remontti