“Ko hono Manatuʻi ʻo Sīsuú,” Ko e Kaumeʻá, Tīsema 2024, 18–19.
Ko hono Manatuʻi ʻo Sīsuú
“Ko ha tohi makehe ʻeni. Te ne lava ʻo tokoni ke ke manatuʻi ʻa Sīsū Kalaisi.”
Naʻe hoko ʻa e talanoa ko ʻení ʻi he ʻIunaiteti Siteiti ʻo ʻAmeliká.
Naʻe sio ʻa Vikatōlia ʻi he sioʻatá lolotonga hono helu ʻe Mami hono ʻulú. Kuo mei hokosia ʻa e taimi ki he lotú.
Naʻe fehuʻi ange ʻe Vikatōlia, “Ko e hā ʻa e ʻuhinga ʻoku tau ō ai ki he lotú?”
Naʻe tuku hifo ʻe Mami ʻa e polosi helú ki lalo. “ʻOku tau ō ki he lotú ke maʻu ʻa e sākalamēnití mo ako fekauʻaki mo Sīsū Kalaisi.”
Naʻe ʻeke ange ʻe Vikatōlia, “Ka ko e hā koā hono ʻuhingá?”
Naʻe talaange ʻe Mami, “ʻOku tokoni ʻa e maá mo e vaí ke tau manatuʻi ʻa e mamahi mo e pekia ʻa Sīsū maʻatautolú. ʻI heʻetau maʻu ʻa e sākalamēnití, ʻoku tau manatuʻi ʻa e meʻa kotoa naʻá Ne faí. Pea tau palōmesi ke feinga foki ʻo fai mo e ngaahi meʻa ʻoku leleí.”
Naʻe malimali ʻa Vikatōlia. “Koeʻuhí ke tau hangē ko Sīsuú!”
“Ko ia!” Naʻe tokoni ʻa Mami kia Vikatōlia ke fakatui hono suú. “ʻOku ngaohi kitautolu ʻe he feinga ke hangē ko Sīsuú, ke tau fiefia.”
Naʻe tangutu fakalongolongo ʻa Vikatōlia ʻi he lotú mo Mami mo Teti. Naʻe vave ke hokosia ʻa e taimi sākalamēnití. Naʻe punou hono ʻulú pea fanongo ki he lotú.
Naʻe toʻo hake leva ʻe Mami ha tohi mei heʻene kató. Naʻá ne fanafana ange, “Ko ha tohi makehe ʻeni. Te ne lava ʻo tokoni atu ke ke manatuʻi ʻa e Fakamoʻuí lolotonga ʻa e sākalamēnití.”
Naʻe fakaava hake ʻe Vikatōlia ʻa e tohí. Naʻe lahi ai ha ʻū fakatātā ʻo Sīsū Kalaisi. Naʻe ʻasi ʻi ha laʻitā ʻe taha ʻEne hoko ko ha kiʻi pēpē ʻi ha ʻaiʻangakai ʻo e manú. Naʻe ʻasi ʻi ha tā ʻe taha hono papitaiso Iá. Naʻe manatuʻi ʻe Vikatōlia ʻa e talanoa ko iá mei he Palaimelí. ʻE papitaiso foki mo ia ʻi ha ʻaho!
Naʻe puke hake ʻe Mami ʻa e laulau maá. Naʻe toʻo loto-ʻapasia ʻe Vikatōlia ha meʻi mā. Peá ne tafoki leva ʻo sio ki heʻene tohí. ʻI he peesi hono hokó, naʻe ʻi ai ha fakatātā ʻo Sīsū ʻoku lotu ʻi ha ngoue. Naʻe ʻiloʻi ʻe Vikatōlia naʻá Ne mamahi koeʻuhí ko e ngaahi angahala ʻa e tokotaha kotoa pē pea ongoʻi honau faingataʻaʻiá mo e mamahí. Naʻá ne fakakaukau, Pau pē ʻokú Ne ʻofa lahi ʻaupito ʻiate kitautolu.
Naʻe toutou huke ʻe Vikatōlia ʻa e ʻū pēsí. Naʻe lahi ʻa e ʻū tā naʻe ʻasi ai hono tokoniʻi ʻe Sīsū ʻa e niʻihi kehé. ʻI he tā ʻe taha, naʻá Ne akoʻi ʻa e kakaí. ʻI he taha, naʻá Ne fakamoʻui ha tangata kui. Naʻe ʻi ai foki mo ha tā ʻo Ia mo ha fānau.
Naʻe hoko mai leva ʻa e vaí. Naʻe punou ʻa e ʻulu ʻo Vikatōliá lolotonga ʻa e lotú. Naʻe paasi atu leva ʻe Mami ʻa e laulaú.
Naʻe toʻo ʻe Vikatōlia ha kiʻi ipu vai ke inu. Naʻá ne fakakaukau ki he ʻofa ʻa Sīsū ki he niʻihi kehé. Na‘e fonu ʻa hono lotó ʻi ha ongoʻi māfana. Naʻá ne loto ke angalelei mo angaʻofa foki.
Naʻe fanafana ange ʻa Vikatōlia, “Mami, ʻoku ou fie hangē ko Sīsuú.”
Naʻe malimali pē ʻa Mami. “ʻOku ou fiefia ai. Pea ʻoku ou ʻilo ʻoku fiefia foki mo Ia ai.”
Naʻe malimali foki mo Vikatōlia. Naʻá ne ʻofa ʻia Sīsū Kalaisi. Naʻá ne fiemaʻu ke manatuʻi maʻu pē Ia.
ʻŪ tā fakatātā ʻa Tammie Lyon