“Nonoʻo ʻo e Hallacas,” Ko e Kaumeʻá, Tīsema 2024, 10–11.
Nonoʻo ʻo e Hallacas
Naʻe fehuʻi ange ʻe ʻĪveti, “Ko e hā ʻoku ʻikai ai ke ʻi ai haʻaku ngāue mahuʻinga hangē ko koe pe ko Mamí?”
Naʻe hoko ʻa e talanoa ko ʻení ʻi Venesuela.
Naʻe lele hake ʻa ʻĪveti ʻi he sitepu ʻi muʻa ki he fale ʻo ʻene abuela (kui fefiné). Naʻe muimui mai ʻene ongomātuʻá ʻi hono tuʻá. Ko e Kilisimasí ia, pea naʻe teuteu ke nau fakafiefiaʻi ia mo honau fāmilí kotoa.
Naʻe tokolahi ʻaupito mo longoaʻa ʻa e ʻapí. Naʻe kakata mo fehuaʻaki ʻa e kau mēmipa ʻo e fāmili ʻo ʻĪvetí. Naʻa nau fiefia ʻi he fakatahataha kotoa mai ke ngaohi ʻa e hallacas, ko ha meʻatokoni faka-Venesuela ki he ʻaho mālōloó. ʻI he taʻú ni, naʻe palōmesi ange ʻe Abuela, ʻe tokoni kiate kinautolu ki hono ngaohí. Naʻe hū atu ʻa ʻĪveti ʻi he vahaʻa ʻo ʻene ngaahi faʻētangatá, mehikitangá, mo e ngaahi kāsiní, ko e fakasio ʻo Abuela.
Naʻe ui atu ʻa Abuela, “ʻĪveti? ʻĪveti, ko fē koe?”
“Ko au ʻeni, Abuela!” Naʻe lele ʻa ʻĪveti kia Abuela ʻo fāʻofua kiate ia. Naʻá ne hanga hake ki ʻolunga, mo punopuna ʻi he fiefiá. “Ko e hā ʻeku ngāue makehe ʻi he taʻu ní?”
“Te tau aʻu pē ki ai!” Naʻe mahuʻu ʻa Abuela. “ʻUluakí, tuku ke u talaatu ʻa e ngāue ʻa e tokotaha kotoa pē ke ke lava ʻo sio ki he founga hono ngaohi ʻo e hallacas.”
Naʻe muimui atu ʻa ʻĪveti ʻia Abuela ki he tēpilé. Naʻe namu ifo ʻa e onioní, kakanoʻi manú, mo e ʻū meʻa fakaifoifo meʻakaí. Naʻe ʻikai ke ne faʻa tatali ke kamata!
Naʻe talaange ʻe Abuela, “ʻUluakí, ʻe teuteuʻi ʻe Kalameni ʻa e masa.”
Naʻe hili hifo ʻe ʻAnitī Kalameni ha tou koane molū ki ha loufusi lanu mata. Peá ne lolomi ia ki ha siakale lafalafa.
Naʻe pehē ange ʻe Abuela, “Ko e hokó, ʻe tānaki atu ʻe ʻAna ʻa e pitoí.”
Naʻe tata ʻe he kāsini matuʻotuʻa ange ʻo ʻĪveti ko ʻAná, ha sēpuni sitiu kakanoʻi manu ki he toú. Naʻá ne tānaki ki ai ha ʻōlive, polo, fuamelie, mo ha moa kuo ʻosi haehae, ki ʻolunga.
“ʻE pelu leva ʻe hoʻo mamí ʻa e ʻū loufusí.”
Naʻe kofukofuʻi fakalelei leva ʻe Mami ʻa e ʻū loufusí ʻaki hono louhiʻinimá ki ha tapafā lōloa fōlelei.
“Ko ʻeta ngāué leva ʻoku hokó, ʻĪveti.” Naʻe paasi ʻe Abuela ʻa e hallaca kuo kofú kia ʻĪveti. “Te ta haʻi tāpuni ia.”
Naʻe toʻo hake ʻe Abuela ha konga afo. Naʻá ne puke fakalelei ʻa e afó, ʻo ne fakafehauaki takai ʻa e afó ʻi he hallaca. “Fakahū ho foʻi tuhú ʻi ʻolunga ke ʻoua ʻe heke kau fakaʻosi hono haʻí.”
Naʻe ongoʻi taʻeoliʻia ʻa ʻĪveti. Naʻá ne fakakaukau ko ʻenau foʻi faʻufaʻu pē ʻeni. ʻOku ʻikai ke nau fuʻu fiemaʻu fēfē au.
ʻI heʻene ongoʻi puputuʻú, naʻá ne fehuʻi ange, “Ko e hā ʻoku ʻikai ai ke ʻi ai haʻaku ngāue mahuʻinga hangē ko koe pe ko Mamí?”
“ʻOku mahuʻinga ʻaupito ho ngāue ʻoku faí, ʻĪveti.” Naʻe hili fakalelei ʻe Abuela ʻa e foʻi tuhu ʻo ʻĪvetí ki he afó. “Kapau naʻe ʻikai ke ke ʻi heni ke puke maʻu ʻa e afó, he ʻikai ke mau lava ʻo haʻi ʻa e hallaca ke tāpuniʻi. Pea te nau movete lolotonga hono taʻó. ʻE taʻeʻaonga leva ʻa e ngāue lahi ʻa e tokotaha kotoa pē. ʻOku tau fakahoko kotoa ha konga mahuʻinga ʻi he ngaohi ko eni ʻo e hallaca—hangē pē ko ʻetau fakahoko ʻa e konga mahuʻinga ʻi he fāmili ʻo e Tamai Hēvaní.”
Ko ha konga makehe maʻana pē? Naʻe fakakaukau ʻa ʻĪveti ki ai lolotonga hono haʻi ʻe Abuela ʻa e noʻó ʻi ʻolunga ʻi hono foʻi tuhú. Naʻá ne toʻo hono foʻi tuhú mei he noʻó kae lava ke haʻi maʻu ia ʻe Abuela.
Naʻe tānaki atu ʻe Mami, “ʻOku fiemaʻu kotoa kitautolu ʻi he fāmili ko ʻení. Ko e founga ia te tau mālohi aí.”
Naʻe vakai atu ʻa ʻĪveti ki hono fāmilí kuo nau fakatahataha takai ʻi he tēpilé. Naʻe kehekehe ʻa e tokotaha kotoa pē. Naʻe fai ʻe hono ʻanitií ʻa e ngaahi fakakata lelei tahá. Naʻe ʻoange ʻe heʻene faʻeé ʻa e ngaahi fāʻofua sai tahá. Pea naʻe ʻiloʻi maʻu pē ʻe Abuela ʻa e meʻa ke lea ʻakí ke lelei ange ʻa e meʻa kotoa. Kuo foaki ange ʻe he Tamai Hēvaní ha ngaahi meʻafoaki kehekehe, ka ko e meʻa ia naʻá ne ʻai ke nau makehe aí.
Naʻe faʻo ʻe Abuela ʻa e hallaca ki ha kato fakataha mo e toengá. Naʻe fonu, kofukofuʻi, pea haʻi lelei kotoa kinautolu ʻe he kau mēmipa kotoa ʻo e fāmili ʻo ʻĪvetí, ʻo nau tokoni ʻi ha ngaahi founga kehekehe.
Naʻe malimali ʻa ʻĪveti. Naʻe takitaha ʻa e mēmipa kotoa hono fāmilí ʻi he konga makehe ʻi he fāmili ʻo e Tamai Hēvaní, ʻo hangē ko ʻenau takitaha ʻi he fatongia makehe ʻi hono ngaohi ʻa e hallaca ki he Kilisimasí. Pehē foki kia ʻĪveti!
Naʻá ne hili hono foʻi tuhú ʻi he hallaca hokó lolotonga hono haʻi ʻe Abuela ʻa e noʻó.
Ngaahi tā fakatātā ʻa Denise Damanti