“Ngaahi ʻEkitivitī ʻo e Haʻu, ʻo Muimui ʻIate Aú,” Ko e Kaumeʻá, Tīsema 2024, 28–29.
Ngaahi ʻEkitivitī ʻo e Haʻu, ʻo Muimui ʻIate Aú
Ki he efiafi ʻi ʻapí pe ako folofolá—pe ke maʻu pē ha fiefia!
25 Nōvema–1 Tīsema
ʻŪ Pousitā ki ha Taumuʻa
Ki he ʻEta 12–15
Naʻe hohaʻa ʻa Molonai naʻe ʻikai ke ne poto ʻi he tohí, ka naʻe tokoniʻi ia ʻe he Tamai Hēvaní ke poto ange ʻi he tohí (vakai ʻEta 12:23–29). Ko e hā ha meʻa ʻokú ke fiemaʻu ke ke lelei ange ai? Tā pe fakapipiki ha fakatātā ʻo e ngaahi meʻa ʻokú ke loto ke fakaleleiʻí ʻi ha pousitā pe laʻipepa. Tautau hoʻo pousitaá ʻi ha feituʻu ke fakamanatu kiate koe hoʻo ngaahi taumuʻá. Lotua ʻa e tokoni ʻa e Tamai Hēvaní ke ke aʻusia ai kinautolu.
2–8 Tīsema
Tohi ʻApasiá
Ki he Molonai 1–6
Ko e sākalamēnití ko ha ouau toputapu ia ʻokú ne tokoniʻi kitautolu ke tau manatuʻi ʻa Sīsū Kalaisi (vakai, Molonai 4–5). Huke ki he peesi 18 ke lau fekauʻaki mo ha kiʻi taʻahine naʻá ne sio ki ha tohi makehe ke tokoniʻi ia ke ʻapasia mo manatuʻi ʻa Sīsū lolotonga ʻa e sākalamēnití. Huke leva ki he peesi 16 pea faʻu haʻo tohi ʻapasia pē ʻaʻau.
9–15 Tīsema
Ngāue Tokoni Fakafufuú
Ki he Molonai 7–9
ʻOku finangalo ʻa Sīsū ke tau feʻofaʻaki (vakai, Molonai 7:45–48). ʻAi ke hiki ʻe he mēmipa takitaha ʻo e fāmilí honau hingoá ʻi ha laʻipepa pea faʻo ia ki ha poulu. Fili leva ha hingoa pea tokoni fakapulipuli ki he tokotaha ko iá ʻi he ʻaho hono hokó ke fakahaaʻi hoʻo ʻofá. ʻI he fakaʻosinga ʻo e ʻahó, mateʻi pe ko hai naʻá ne tokoniʻi koé!
16–22 Tīsema
Fakatātaaʻi Ia!
Ki he Molonai 10
ʻOku fonu ʻa e Tohi ʻa Molomoná ʻi he ngaahi talanoa ʻokú ne akoʻi kitautolu fekauʻaki mo e Tamai Hēvaní mo Sīsū Kalaisi pea mo e kakai ʻoku muimui kiate Kinauá (vakai, Molonai 10:3–4). Taufetongi ʻi hono fakatātaaʻi ʻa e ngaahi talanoa ʻokú ke saiʻia taha ai ʻi he Tohi ʻa Molomoná! Vakai pe ʻe lava homou fāmilí ʻo mateʻi pe ko e hā ʻa e talanoá.
23–29 Tīsema
Ko Ha Meʻa Teuteu ʻAkau Kilisimasi Makehe
Ki he Kilisimasí
Koeʻuhí naʻe ʻaloʻi ʻa Sīsū Kalaisi pea hoko ko hotau Fakamoʻui, te tau lava kotoa ʻo toe nofo fakataha mo e Tamai Hēvaní ʻi ha ʻaho (vakai, Hilamani 5:9). Kosi ʻo toʻo ha fakatātā ʻo Sīsū mei he Ko e Kaumeʻá. Hili iá pea faʻu ha ʻesiaʻi tā ki he fakatātaá ʻo fakaʻaongaʻi ha pepa, vaʻakau fakameaʻa, pe ko ha meʻa pē ʻokú ke fiemaʻu. Fakapipiki ha afo ʻi ha pelu fakafuopotopoto ʻi mui pea tautau ia ʻi hoʻo fuʻu ʻakau Kilisimasí pe holisí!
ʻŪ tā fakatātā ʻa Katy Dockrill