Tuwirang Sagot

Paano ko malalaman na pinakikinggan ko ang tinig ng Panginoon sa buhay ko?

Inimbita tayo ni Pangulong Russell M. Nelson na “mag-isip nang malalim at madalas” tungkol sa kung paano natin pakikinggan si Jesucristo at “gumawa ng mga hakbang upang pakinggan Siya nang mas mabuti at mas madalas” (“‘How Do You #HearHim?’ A Special Invitation,” Peb. 26, 2020, blog.ChurchofJesusChrist.org).

Mapakikinggan natin Siya sa pamamagitan ng mga banal na kasulatan at ng mga salita ng mga propeta. Ngunit hindi lamang pakikinig o pagbabasa sa mga salitang iyon ang mahalaga. Sa pamamagitan ni Propetang Joseph Smith, ipinaliwanag ng Panginoon:

“Ang aking tinig ang nangusap ng [mga salitang ito] sa inyo; sapagkat ang mga ito ay ibinigay sa pamamagitan ng aking Espiritu sa inyo … ;

“Dahil dito, maaari ninyong patotohanan na narinig ninyo ang aking tinig” (Doktrina at mga Tipan 18:35–36).

Bukod pa rito, ang paghahangad na pakinggan Siya ay hindi isang bagay na ginagawa natin nang pabugso-bugso. Sabi nga ni Pangulong Nelson, “Kailangan ng kusa at tuluy-tuloy na pagsisikap” (“Pakinggan Siya,” pangkalahatang kumperensya ng Abr. 2020 [Liahona, Mayo 2020, 89]).

Habang kayo ay nag-aaral, nagdarasal, sumasamba, naglilingkod, at sumusunod sa mga utos ng Panginoon, pagpapalain Niya kayo sa pamamagitan ng Kanyang Espiritu at babaguhin kayo sa pamamagitan ng Pagbabayad-sala ni Jesucristo. Sa gayon ay malalaman ninyo na pinakikinggan ninyo ang Kanyang tinig.