Mga Tanong at mga Sagot

“Paano ako magkakaroon ng lakas-ng-loob na sundin ang mga espirituwal na pahiwatig?”

“Darating ang Espiritu Santo at ipapahiwatig sa inyo ang mga bagay na magagawa ninyo para sa ibang tao. Kapag humayo kayo at ginawa ninyo ang mga bagay na iyon, kayo ay nasa paglilingkod ng Panginoon, at kapag kayo ay nasa paglilingkod ng Panginoon, nagiging karapat-dapat kayo para sa kaloob na Espiritu Santo.”

Pangulong Henry B. Eyring ng Unang Panguluhan, sa “President Eyring 1990s,” Deseret News, Abr. 2, 2009, deseretnews.com.

Tunay na Layunin

“Lumalakas ang loob ko sa pamamagitan ng panalangin. Kapag nagdarasal ako sa aking Ama sa Langit nang may tunay na layunin sa aking puso, alam kong sumasaakin ang Kanyang Espiritu. Sa pamamagitan ng Kanyang Pinakamamahal na Anak, alam kong pagpapalain ako kapag sinusunod ko ang mga espirituwal na pahiwatig.”

Agbonavbare Bright I., 19, Nigeria

Pag-aayuno at Pagkilos

“Para magkaroon ako ng lakas-ng-loob na sundin ang inspirasyong natatanggap ko, nagdarasal ako para malaman kung talagang nagmula iyon sa Panginoon. Pagkatapos ay nangangako akong sundin ang paghahayag, na may kasamang maraming panalangin at pag-aayuno.”

Obed M., 19, Democratic Republic of the Congo

Nakadarama ng Kagalakan

“Kapag kailangan ko ng lakas-ng-loob na makinig sa mga pahiwatig, iniisip ko kung gaano nito pinasasaya ang aking Ama sa Langit. At kapag nakikinig ako sa mga pahiwatig na maglingkod sa iba, nagiging mas masaya ako at mas gumaganda ang araw ko. Ang pagsampalataya sa Panginoon ay tumutulong sa akin na magkaroon ng lakas-ng-loob na sundin ang mga espirituwal na pahiwatig.”

Alyssa S., Utah, USA

Sumusuportang Grupo

“Kung paliligiran mo ang iyong sarili ng mga taong sumusuporta sa paggawa ng mabubuting desisyon, nagiging mas madaling sundin ang mga pahiwatig. Sumampalataya sa plano ng Panginoon. Nais Niyang maging pinakamabuti ang kalabasan ng lahat para sa iyo.”

Charlie R., Alberta, Canada

Paggawa ng Gawain ng Diyos

“Naaalala ko na ang mga espirituwal na pahiwatig ay nagmumula sa Diyos at mabubuting bagay lang ang ipinagagawa Niya sa atin. May kapangyarihan tayong tulungan ang iba na lumapit sa Diyos—kapag kumikilos tayo ayon sa mga pahiwatig, ginagawa natin ang gawain ng Diyos. Hindi mo maiisip kung ano ang uri ng epektong magagawa mo kung kikilos ka ayon sa pahiwatig!”

Sara S., 17, California, USA

Ang mga sagot ay nilayong makatulong at magbigay ng pananaw, hindi bilang mga opisyal na pahayag ng doktrina ng Simbahan.

Ano sa Palagay Mo?

Bakit mahalaga ang mga pamantayan ng Simbahan? Paano tayo magkakaroon ng patotoo tungkol sa mga ito?

Ipadala ang iyong sagot at larawan bago sumapit ang Enero 15, 2022.

Pumunta sa ftsoy.ChurchofJesusChrist.org at iklik ang “Submit Your Work.” Mag-sign in gamit ang iyong Account sa Simbahan at pagkatapos ay piliin ang “For the Strength of Youth” sa ilalim ng “Choose Magazine.” Iklik ang “Add File” para piliin ang iyong file at mga larawan, at pagkatapos ay iklik ang “Submit” para i-upload at ipadala sa amin ang iyong file. O mag-email sa amin sa [e-mail].

Ang mga sagot ay maaaring i-edit para paikliin o gawing mas malinaw.