« Te fa’anahora’a nō te ’oa’oa a te Atua ’e tō ’outou haere’a hanahana », Nō te Pūai o te Feiā ’Āpī, Tēnuare 2022.
Te fa’anahora’a nō te ’oa’oa a te Atua ’e tō ’outou haere’a hanahana
Nā te hāro’aro’ara’a ’e te orara’a mai te au i te fa’anahora’a nō te ’oa’oa e fa’ati’a ia ’outou ’ia tāpae i tō ’outou haere’a hanahana.
Fa’ahōho’ara’a nā Albert Espí
E aha te puta mai i roto i te ferurira’a ’ia fa’aro’o ana’e ’outou i te ta’o haere’a ? Tē mana’o ra ānei ’outou o te hō’ē mea tei fa’ata’a-ātea-hia ’e ’o tē ’ore e ti’a ’ia ’ape ? Hō’ē mea ri’ari’a ’aore rā te fa’ahiahia ’o tē ’ore e nehenehe e taui noa atu te ’ohipa tā ’outou e rave ra ? ’Aore rā e feruri paha ’outou i te ’aito o te hō’ē hōho’a teata ’aore rā, o te hō’ē buka, tei fa’ata’ahia nō te fa’aoti i te ’imira’a, nō te fa’aora i te ao, ’aore rā nō te riro ’ei ari’i tāne ’aore rā ’ei ari’i vāhine ?
E nehenehe te mau fa’atoro parau e tū’ati i teie mau tātarara’a ; terā rā, ’ia paraparau-ana’e-hia tātou nō ni’a i te haere’a hanahana, e mea ta’a ’ē tā tātou aura’a parau. Ta’a ’ē atu ai i te haere’a tā ’outou e tai’o nei i roto i te mau buka ’aore rā, e hi’o nei i roto i te mau hōho’a teata, te rave-hope-ra’a i tō ’outou haere’a hanahana e ’ohipa pāpū ïa nō te mea e tamari’i ’outou na te Atua, e tītau ato’a rā te reira ia ’outou ’ia fa’a’ohipa i tō ’outou ti’amāra’a.
E mana hope tō te Atua i ni’a i te ra’i ’e i te fenua nei. Tē fa’ati’a nei te mau fafaura’a tā tātou e rave nei ’e tō tātou Metua i te ao ra ’ia riro ’oia ’ei ’āpiti ia tātou ’a haere ai tātou nā roto i te mau vero o te orara’a nei. Tō tātou haere’a hanahana—tō tātou pūai ’ia ’āpiti ana’e tātou i te Atua—e noa’a te reira nā roto i tāna fa’anahora’a nō te ’oa’oa.
Te māramaramara’a i te fa’anahora’a a te Metua i te ao ra nō tō outou ’oa’oa, e fa’ati’a ia ’outou ’ia ’ite i tō ’outou ihota’ata mure ’ore ’e te ’ōpuara’a. ’E te mā’itira’a ’ia rave ’e ’ia ha’apa’o i te mau fafaura’a ’e te Atua e fa’ati’a ia ’outou ’ia fa’atupu i te reira ’ōpuara’a.
I roto i te buka a Mose, tē tai’o nei tātou, « e hōpoihia atu ai Mose i ni’a i te mou’a teitei roa ra, ’e ’ua ’ite ’oia i te Atua te mata ’e te mata, ’e ’ua paraparau iāna » (Mose 1:1–2). Nā roto i teie fārereira’a, ’ua ha’api’i te Atua ia Mose nō ni’a i tōna ihota’ata mure ’ore. Noa atu e ta’ata tāhuti o Mose ’e te hapehape, ’ua ha’api’i mai ’oia i te hō’ē mea faufa’a rahi nō ni’a iāna iho : ’oia ho’i e tamaiti ’oia na te Atua (hi’o Mose 1:6)).
’A ha’amana’o ʼo vai ʼoutou
Tē hina’aro nei Sātane ’ia mo’ehia ia ’outou ’o vai ’outou. I tō Sātane tāmatara’a e fa’ahape ia Mose i te ’ohipa tā te Fatu i fa’aineine nōna, ’ua pāhono itoito ’o Mose e, « ’O vai ’oe ? Inaha, e tamaiti ho’i au nā te Atua » (Mose 1:13 ; reta tei fa’ahuru-’ē-hia). I muri iho ’ua parau ’o Mose, « ’A haere ’ē atu ’oe, e Sātane ; ’eiaha e fa’ahema iā’u » ((Mose 1:16 ; reta tei fa’ahuru-’ē-hia).
E nehenehe e parau ē, ’ua nā ’ō Mose : « E’ita tā ’oe e nehenehe e ha’avare iā’u, ’ua ’ite ho’i au ’o vai au nei. ’Aita tō ’oe māramarama ’e te hanahana o te Atua. Nō te aha ïa vau e ha’amori ai ia ’oe ’aore rā, e topa ai i roto i tā ’oe ha’avarera’a ? »
’Eiaha roa atu ’ia mo’ehia, tē here nei te Atua ia ’outou ’e tē hina’aro nei ’oia e tauturu ’e e ha’amaita’i ia ’outou. Tē vai ra tōna ’ana’anatae hanahana nō ’outou tāta’itahi ’ei hō’ē tamari’i nāna. ’A rave na i te taime nō te ha’api’i mai e aha mau te aura’a ’ia riro ’ei hō’ē tamari’i nā te Atua. I muri iho ’a ha’amau i te mau ’ōpuara’a ’e ’a rave i te mau mā’itira’a ’o tē tauturu ia ’outou ’ia ha’apa’o i taua mau ’itera’a ra i te mau mahana ato’a.
E ’ohipa tā’u nā ’oe
E rave rahi tō ’outou mau fifi ’e mau māna’ona’ora’a rū. E ’ohipa tā ’outou nō te ha’api’ira’a, te auhoara’a, te mau hōpoi’a ’utuāfare, ’e penei a’e ato’a hō’ē ’ohipa. ’Oia mau, tā ’outou tītaura’a ’o te fa’a’aifāitora’a ïa i teie mau ti’ara’a faufa’a rahi ato’a ma te ’ore e ha’amo’e i tā ’outou ’ōpuara’a tumu i roto i te orara’a nei. E ’ohipa tā te Atua nā ’outou ’ia rave (hi’o Mose 1:6). ’O te pāhonora’a ïa i teie uira’a : « Nō te aha tei i’ō nei au i ni’a i te fenua nei » ?
’Ei tamari’i nā te Atua, ’ua haere mai ’outou i te fenua nei nō te fāri’i i te hō’ē tino tāhuti. Ma tō ’outou tino, e nehenehe ’outou e mā’iti ’ia pe’e ia Iesu Mesia ma te ha’apa’o maita’i. E nehenehe ’outou e mā’iti ’ia ha’apa’o i te mau fa’auera’a a te Atua, e fāri’i i te mau ’ōro’a mo’a, ’e ’ia rave ’e ’ia ha’apa’o i te mau fafaura’a o te ’evanelia. Nā te ravera’a i teie mau mea e fa’aineine ia ’outou nō te fa’atupu i tō ’outou haere’a hanahana.
Ma te tāpe’a-pāpū-ra’a i teie ’ōpuara’a i roto i te ferurira’a, e ’ite ’outou i te faufa’a rahi nō te ravera’a i te ’ōro’a mo’a i te hepetoma tāta’itahi, tē tuatāpapara’a i te mau pāpa’ira’a mo’a, te purera’a i te mau mahana ato’a, te ha’amaura’a i te mau ’ōpuara’a maita’i, ’e te tāvinira’a ia vetahi ’ē. E tauturu teie mau mea ’ia fa’aha’amana’o ia ’outou i te tumu mau tei i’ō nei ’outou, ’e e tauturu te reira ia ’outou ’ia vai ti’amā noa nō te fāri’i i te heheura’a o te ta’ata iho ’o tā ’outou e hina’aro nō te vai ’oa’oa noa ’e ’ia fa’aea noa i ni’a i te ’ē’a nō te fafaura’a. ’A tātarahapa ai ’e ’a pe’e itoito ai ’outou i te Fatu, e fāri’i ’outou i te arata’ira’a nō ’outou iho i roto i te mau tuha’a ato’a o tō ’outou orara’a.
’A tūtava ’ia riro mai tā ’outou e ti’a ’ia riro mai
E nehenehe te mau tapitapira’a ’e te mau māna’ona’ora’a o te ao nei, ’aore rā tō ’outou iho mau pāruru-’ore-ra’a, e ha’amo’e i tō ’outou ti’ara’a faufa’a rahi i roto i te fa’anahora’a rahi nō te fa’aorara’a a te Atua. Mai te mea e tupu te reira, tē ani nei au ia ’outou ’ia haere mai i te Mesia ra (hi’o Moroni 10:32). ’Aore roa hō’ē mea i roto i te fa’anahora’a mure ’ore a te Atua e noa’a ’aita ana’e ’oia, e nā roto ana’e iāna, e noa’a ai te mau mea maita’i ato’a.
Te tūtavara’a ’ia pe’e i te Fa’aora ’o te rāve’a maita’i roa a’e nō te tāpe’a i te hō’ē hi’ora’a ātea ’o te ’evanelia. Ma te fa’aro’o ’e te tīa’ituru iāna, e nehenehe ’outou e fa’aruru ma te ti’aturi i te mau tāmatara’a o te orara’a nei. E māramarama rahi atu ā ’outou ’a rave ai ’outou i te mau mā’itira’a, ’a fa’a’āfaro ai i te mau fifi, ’a ’ohipa ai ’outou i ni’a i te mau fā parauti’a ’e ’a fa’aruru ai ’outou i te mau fa’ahemara’a.
E fa’atupu tā ’outou mau fa’aotira’a i te mure ’ore. Nā roto ia Iesu Mesia ’e tāna tāra’ehara hāmani maita’i, e nehenehe ’outou e fāri’i i te ’oa’oa i roto i teie orara’a ’e te orara’a a muri atu. E nehenehe ’outou e fa’atupu i tō ’outou haere’a hanahana nō te fāri’i i te mau mea ato’a tāna e vai ra ’e ’ia ora i te huru orara’a tāna e ora nei, ’oia ho’i « te ora mure ’ore… te hōro’a teie tei hau atu i te mau hōro’a ato’a a te Atua » (Te Parau Ha’api’ira’a ’e te mau Parau Fafau 14:7).