Ti’aturi i te Fatu

(Maseli 3:5–6)

Nā te mau peresidenira’a rahi o te Feiā ’Āpī Tamāhine ’e te Feiā ’Āpī Tamāroa

Tē ani manihini nei te Atua ia ’outou ’ia ti’aturi iāna i roto i te mau mea ato’a.

I te tahi taime, ’ia tupu ana’e te mau ’ohipa fifi, e uiui tātou e nehenehe ānei tātou e ti’aturi i te hō’ē ta’ata, tae noa atu i te Atua. Tē mata’u nei tātou ’o tē fa’ahepohepo ato’a mai oia ia tātou. Te parau ’āpī maita’i, ’oia ho’i, ’ua here maita’i roa te Atua ia tātou. E ta’ata maita’i ’oia ’e te ’ā’au hōro’a ’e te parauti’a. ’Aita ’oia e taui ’e e nehenehe e ti’aturi iāna.

’E maoti te reira, e nehenehe tātou e ti’aturi iāna noa atu te huru. Te tumu parau a te feiā ’āpī nō teie matahiti, ’oia ho’i « Ti’aturi i te Fatu » (Maseli 3:5–6).

Teie te tahi mau hi’ora’a nō ni’a i te huru mātou tāta’itahi i roto i te mau peresidenira’a rahi o te Feiā ’Āpī Tamāhine ’e te Feiā ’Āpī Tamāroa i ti’aturi ai i te Fatu.

Peresidenira’a rahi nō te Feiā ’Āpī Tamāhine

Michelle D. Craig

Bonnie H. Cordon

Rebecca Craven

Ti’aturi i te mau fa’aitoitora’a a te Atua

Tau mahana noa hou ’a ti’a ai tō’u matahiti i te 16, ’ua tere tō’u ’utuāfare nā te fenua tā’āto’a. ’Ua mana’o vau ē, e taime ’ino mau ! ’Ia hi’o ana’e au i muri, e nehenehe tā’u e ’ite pāpū ē, te tahi o te mau ha’amaita’ira’a rahi roa a’e nō tō mātou ’utuāfare ’e nō’u iho nei, ’ua tae mai ïa maoti taua ’ohipa ra i tō’u ’āpīra’a. E’ita paha tātou e māramarama i te tārena a te Fatu i terā taime, tē ti’aturi nei rā tātou iāna nō te mea e nehenehe tā tātou e ti’aturi i tōna ’ā’au ’e tāna mau fa’aitoitora’a.

Michelle D. Craig

Ti’aturi i te tārena a te Fatu

Nō te pi’ira’a o tō’u metua tāne ’ei peresideni misiōni, ’ua fāri’i au i tō’u iho pi’ira’a ’ia tāvini i te hō’ē misiōni nā mua a’e i te fāito matahiti tumu nō te mau tuahine misiōnare. Te aura’a, e tomo vau i roto i te pū ha’api’ipi’ira’a misiōnare hou te parau tū’ite nō te ha’api’ira’a tuarua. Nō’u nei, ’aita hō’ē aura’a nō te taime, ’ua fāri’i rā vau i te hō’ē ha’apāpūra’a pae vārua pūai ’ia ti’aturi i te Fatu. ’Ua nā reira vau, ’e ’ua tupu nehenehe maita’i te mau mea ato’a.

Te ti’aturira’a i te Fatu ’o tē haerera’a ïa i mua noa atu e ’ere te ’ē’a i te mea māramarama hope roa.

Bonnie H. Cordon

Ti’aturi i te Atua i roto i te mau taime fifi

I te pa’arira’a, e fa’atere nō te nu’u fa’ehau te tōro’a o tō’u metua tāne. Te vāhi fifi noa i roto i tāna ’ohipa ’oia ho’i, tītauhia iāna ’ia haere i te tama’i. 13 matahiti tō’u ’a reva ai tō’u pāpā i Vietnam nō te piti o te taime. ’Ua vai noa i roto i tō’u ferurira’a te mata’u ’o tē ’ore ’oia e ho’i fa’ahou mai, terā rā, ’ua vai noa ato’a tō’u ti’aturi i te Fatu. Hou ’oia ’a haere ai, ’ua hōro’a mai tō’u pāpā i te hō’ē ha’amaita’ira’a metua tāne ma te ha’apāpū mai iā’u ē, e pārahi mai te Fatu i pīha’i iho iā’u ’e e tauturu ’oia iā’u i te taime tei te ātea ’ē tō’u pāpā. ’Ua tupu te hau i roto iā’u. Noa atu ē ’aita vau i ’ite pāpū ē, e ho’i mai ānei tō’u pāpā ma te maita’i, ’ua ti’aturi au ē, e maita’i te mau mea ato’a, noa atu te ’ohipa e tupu.

Rebecca Craven

Peresidenira’a rahi nō te Feiā ’Āpī Tamāroa

Ahmad S. Corbitt

Steven J. Lund

Bradley R. Wilcox

’A ti’aturi ’outou iho i te Atua

I tō’u tomora’a mai i roto i te ’Ēkālesia ’ei taure’are’a, ’ua fa’aoti au e hōro’a i tō’u ora, tō’u taime ’e tō’u ’ā’au i te Fatu. Noa atu ē, e mea huru ri’ari’a taua huru fafaura’a tāmau ra, ’ua ’ite rā vau ē, e mea ti’a te reira. ’Ua ’ite au ē ’ua hina’aro tō’u Metua i te ao ra i teie nō’u, ’e e hau tei roa’a iā’u i te ravera’a i te reira. E ’oa’oa rahi tō’u i te mā’itira’a e ti’aturi i te Atua ’e e vaiiho iāna ’ia upo’oti’a i roto i tō’u orara’a. ’Ua pāpū iā’u ē, ’āhiri au i ti’aturi i ni’a i tō’u iho ’itera’a, e’ita tō’u orara’a e riro ’ei mea tao’a rahi i roto i te ’oa’oa ’e te hau.

Ahmad S. Corbitt

’A ti’aturi i te mau fa’aurura’a a te Fatu

I muri a’e i tō’u tāvinira’a i tā’u misiōni, ’ua tae mai te mana’o i roto iā’u ’ia tomo i roto i te ’āua fa’ehau ’eiaha rā e ho’i i te fare ha’api’ira’a tuatoru. ’O terā ri’i te ’ohipa hope’a tā’u i hina’aro e rave ! ’Ua tupu te ’ana’anatae rahi i roto iā’u, ’ua ha’api’i rā vau ’ia ti’aturi i te Atua, ’e ’ua nava’i tō’u fa’aro’o nō te fa’aro’o iāna ’e nō te ha’apa’o. ’Ua riro mai au ’ei fa’ehau e toru matahiti.

E rave rahi mau mea maitata’i i roto i tō’u orara’a tei mani’i mai nā roto mai i taua fa’aotira’a ra, tae noa atu i te fārereira’a i tā’u vahine i muri iho.

Steven J. Lund

Ti’aturi i te mau muhumuhu a te Atua ’ia ’ohipa i teienei

I muri a’e i tō’u ha’api’ira’a i te piha ono e toru matahiti te maoro, ’ua ha’api’i mai au ē, mai te mea e ha’api’i au e maha matahiti fa’ahou, e aufau te mata’eina’a ha’api’ira’a i te hō’ē tuha’a o tā’u ha’api’ira’a nō te fāri’i i tā’u parau tū’ite Master. Mai te huru ra ē, e fa’anahora’a maita’i te reira—ē tae roa i te taime ’ua fa’auru mai te Vārua iā’u ’ia fa’aru’e i tā’u ’ohipa ’e ’ia ho’i ’oi’oi nō te fāri’i i tā’u parau tū’ite. ’Ua fāri’i ato’a tā’u vahine i te muhumuhu mai te reira te huru, nō reira ’ua haere māua i mua. Te aura’a ra, nā māua iho e ’aufau i tā māua ha’api’ira’a. Nō tō māua nā reirara’a,’ua tihepuhia vau nō te ha’api’i i BYU—Provo. E’ita taua ha’amāramarama ra nō te rāve’a e matara ’ahiri māua i tīa’i e maha fa’ahou matahiti. ’Aita māua i ’ite e aha te ’ohipa e tupu mai, terā rā ’ua arata’i te Fatu i tō māua mau ta’ahira’a ’āvae mai tāna i fafau mai.

Bradley R. Wilcox