« Upo’oti’ara’a i ni’a i te mau ravera’a a Sātane », Nō te Pūai o te Feiā ’Āpī, Tēnuare 2022.
Mai, pe’e mai
Upo’oti’ara’a i ni’a i te mau ravera’a a Sātane
Tē rave nei Sātane i te mau mea ato’a e ti’a iāna nō te ha’avare ia tātou. ’Aua’e rā, e tauturu hanahana tā tātou nō te ’ape i tāna mau herepata.
E pata te hō’ē tahutahu i tōna manimani rima ’e e mo’e hō’ē pōpō i mua noa i tō ’outou mata.
E mea māere !
I muri iho e huti mai ’oia i te hō’ē rāpiti i rāpae i te hō’ē taupo’o teitei ’e ’a fa’a’ite mai ai i te hō’ē mea e vai noa i roto i te ’aore.
Whoa ! E nāhea ’oia i te ravera’a i te reira ?
’Ua ’itehia i te mau tahutahu e nāhea rātou i te ha’ati’aturi i te mau ta’ata, ’ia ’ite rātou i te hō’ē mea ’o tē ’ore roa e ti’a i te ta’ata ’ia nā reira, te ti’ara’a mau, ’ua ’ite noa rātou i te mea tā te tahutahu i hina’aro ’ia ratou ia ’ite.
’Ua ti’a te reira ! ’Aita te mau tahutahu e ’ite mau nei i tō rātou mau tauturu i te ’āfara’a o te taime. ’Ua ’itehia ia rātou te mau rāve’a māramarama nō te ha’avarevare ia tātou ’ia feruri ē, ’ua ’ite tātou i te hō’ē mea ’aita i tupu mai. Tei roto te parau huna i te mau mana’o moemoeā ’e te ha’avare.
E ’ohipa teie nō te fa’a’ārearea ’e nō te fa’a’oa’oa, ’āre’a te tahi atu mau huru ha’amoemoeāra’a ’e te ha’avarevarera’a, e mea fifi roa ïa—i te pae tino ’e i te pae vārua.
Hō’ē ta’ata ha’amoemoeā ’e te ha’avarevare ri’ari’a
E ’enemi Sātane nō te mau parauti’a ato’a ’e ’aita ’oia e hina’aro i te hō’ē ta’ata ’ia pe’e i te Metua i te ao ra ’e ia Iesu Mesia. E hina’aro ’oia ’ia ’ōveve roa tātou mai iāna te huru (hi’o 2 Nephi 2:27).
Nō te fa’atupu i te reira, tē rave nei ’oia i te mau mea ato’a e ti’a iāna nō te tūra’i ia tātou ’ia uiui ’e ’aore rā ’ia tāu’a ’ore i te mau parau mau mure ’ore. Tē ’ohipa tu’utu’u ’ore nei ’oia nō te ha’apōiri ia tātou ’ia ti’aturi ē, te maita’i e mea ’ino ’e te ’ino ra e mea maita’i ïa (hi’o Isaia 5:20)).. Nō reira ’oia i parauhia ai i te tahi taime, te metua nō te ha’avare ’e te ha’avare rahi (hi’o Mose 4:4)). ’E e mea maoro i teie nei tōna ravera’a i te reira.
Te hi’ara’a
I roto i te ’ō i ’Ēdene, ’ua parau te Atua ia Adamu ’e ia Eva ’eiaha e ’amu i te hotu o te tumu rā’au nō te ’ite i te maita’i ’e te ’ino. Mai te mea e nā reira rāua, e tītauhia ia rāua ’ia fa’aru’e i te ’ō i ’Ēdene ’e e pohe mau ā rāua. ’Ua parau rā te Atua ia rāua ē, e nehenehe tā rāua e mā’iti (hi’o Mose 3:16–17).
Tē hina’aro nei ’o Sātane e ha’amou i te fa’anahora’a a te Atua. ’Ua tāmata ’oia nā roto i te fa’ahemara’a ia Eva ’ia ’amu i te hotu i rāhuihia. ’Ua ha’avare ’oia ’e ’ua parau ē, e’ita ’oia e pohe (e pāto’i ’āfaro te reira i te mea tā te Atua i parau). ’Ua parau ato’a ’oia iāna i te ’āfa o te parau mau (hi’o Mose 4:11).
I te pae hope’a, ’ua ’amu ’o Adamu ’e ’o Eva i te hotu ’e ’ua ti’avaruhia rāua i rāpae i te aro o te Atua. Tē pi’i nei te mau pāpa’ira’a mo’a i teie te « pohe vārua ». ’Ua riro ato’a mai rāua ’ei ta’ata tāhuti, ’oia ho’i e nehenehe rāua ia pohe i te pae nō te tino. ’Ua parauhia te reira te hi’ara’a.
’Ei hua’ai nō Adamu ’e nō Eva, ’ua ta’a ’ē ato’a tātou i te aro o te Atua ’e e fāri’i tātou i te pohe pae tino. E tāmata-ato’a-hia tātou nā roto i te mau fifi o te orara’a ’e te mau fa’ahemara’a a Sātane.
E riro paha teie mau mea ato’a mai te hō’ē ’ohipa ’ino, terā rā, e tuha’a faufa’a rahi te hi’ara’a nō te fa’anahora’a a te Metua i te ao ra. E hōro’a mai te reira ia tātou i te rāve’a nō te ha’api’i ’e ia tupu i te rahi nā roto i te fa’a’ohipara’a i tō tātou ti’amāra’a ’ia mā’iti nō te rave i te maita’i. ’E maoti Iesu Mesia ’e tāna tāra’ehara, e nehenehe tātou e tātarahapa ’ia hara ana’e tātou ’e ’ia fa’aineine nō te fāri’i i te ora mure ’ore. Te mau mea ato’a tei tupu nā roto i te hi’ara’a, ’ua fa’atītī’aifarohia e Iesu Mesia. ’Aita o Sātane i tāpe’a i te fa’anahora’a a te Atua.
Upo’oti’ara’a i ni’a i te mau ravera’a a Sātane
Tē tāmau noa nei o Sātane i teie mahana i te ha’avarevare ia tātou ’e i te fa’ahema ia tātou. Teie i muri nei te mau rāve’a rau tāna e rave nei :
1. Te fa’ahemara’a
E mea au nā Sātane ’e tu’u i te mau mana’o vi’ivi’i ’e te ’ī’ino i ni’a i tō tātou ’ē’a. Tē hina’aro nei ’oia ’ia ō teie mau mea i roto i tō tātou ferurira’a ’e ’ia tūra’i ia tātou ’ia fa’a’ohipa i te reira. E nehenehe tā tātou e pāto’i i teie fa’ahemara’a nā roto i te paraura’a ia Sātane ’ia haere ’ē atu oia (hi’o te parau poro’i a Elder Stevenson i te ’api 4). Hō’ē o tō tātou pārurura’a rahi i mua i te fa’ahemara’a ’o te pure-tāmau-ra’a ïa (hi’o Alama 13:28 ; 3 Nephi 18:15)). E nehenehe ato’a tātou e tai’o ’e e tuatāpapa i te mau pāpa’ira’a mo’a. Nā te reira e fa’atae mai i te Vārua i roto i tō tātou ’ā’au, e ha’apāpū ia tātou i te mau mea mau, ’e e ha’apūai ia tātou i mua i te fa’ahemara’a nō ananahi.
2. Te mau ha’avare ’e te mana’o hape
I te tahi taime e parau mai ’o Sātane ia tātou i te mau mea mai teie te huru : « ’Aita roa atu ’oe e rave nei i te hō’ē mea ti’a », « Ua rahi roa tā ’oe hara ’ia fa’a’orehia te reira », « E’ita tā oe e nehenehe e taui », ’e ’aore rā « ’Aita e faufa’a tō ’oe, ’e ’aita e ta’ata e tau’a mai ia ’oe ».
E mau parau ha’avare ana’e te reira. ’Eiaha e ti’aturi i te reira ! Teie te parau mau : Tē here nei te Atua ia ’oe ’e tē oa’oa nei ’oia ia ’oe nō te mea e tamari’i ’oe nāna. E mea fa’ahiahia mau ’oe ! E pūai rahi tō ’oe, ’e mai te mea e pe’e ’oe iāna, e ’ana’ana tō ’oe ananahi ! Noa atu ē, ’ua rave ’oe i te mau hape, e nehenehe ā ’oe e fāri’i i te tīa’iturura’a, ’e ma te ’āmui i te Mesia, e taui te mau mea ato’a.
E nehenehe ’oe e ti’aturi i ni’a ia Sātane nō te ha’avare mai ia oe i te mau taime ato’a. E nehenehe ato’a ’oe e ti’aturi i ni’a i te Vārua nō te fa’a’ite ia ’oe i te parau mau i te mau taime ato’a (hi’o Iakoba 4:13)).. Terā te tahi tumu e mea faufa’a ’ia tūtava ’ia vai noa te Vārua i roto ia tātou.
E nehenehe ato’a tātou e ’ite ’e e pāto’i i te mau ha’avare a Sātane nā roto i te tai’o-tāmau-ra’a i te mau pāpa’ira’a mo’a ’e te mau a’ora’a a te feiā fa’atere o te Ēkālesia. E ’itehia mai ia ’outou te mau pāpa’ira’a mo’a fa’aitoito ’e ’aore rā te mau fa’ahitira’a parau nō te fa’aha’amana’o ia ’outou i te mau parau mau ’o tē pāto’i i te mau ha’avare a Sātane. E nehenehe ’outou e tāmau ’ā’au i te reira ’e ’aore rā e tu’u i te hō’ē vāhi e ’ite pinepine ai ’outou i te reira.
3. Te hepohepo rahi
E mea au roa nā Sātane ’ia tupu ana’e te mana’o paruparu i roto ia tātou. Tē hina’aro nei ’oia ’ia ti’aturi tātou ē, te mau mea ato’a e fa’atupu i te pe’ape’a i roto ia tātou, e vai tāmau noa mai te reira. E ’ere rā i te parau mau.
’Ua ha’api’i mai ’o Elder Jeffrey R. Holland nō te pupu nō te Tino ’Ahuru ma Piti āpōsetolo ē, tē hina’aro nei ’o Sātane ’ia ti’aturi tātou i te reira nō te mea « ’ua ’ite [Sātane] ē, e’ita tāna e nehenehe e fa’arahi atu ā, e’ita ’oia e nehenehe e haere i mua, ’e mai te mea ’aita tō te mau ao e hope’a, e’ita roa atu ïa e roa’a iāna i te hō’ē ananahi māramarama. E ta’ata ’ōveve ’oia tei ru’uru’uhia e te mau tā’ōti’ara’a mure ’ore, ’e ’ua hina’aro ’oia ’ia ’ōveve ato’a ’outou. Nō reira, ’eiaha e ti’aturi i te reira ».1
Tē hina’aro nei te Metua i te ao ra ’e ’o Iesu Mesia ’ia ’oa’oa ’outou. Mai te mea e fāriu tātou i ni’a ia rāua, e nehenehe rāua e tauturu ia ’outou ’ia fa’a’oroma’i i te mau tāmatara’a ’e ’ia fāri’i i te hau ’e te ’oa’oa.
’Ua ’ite tātou ’o vai te upo’oti’a i te pae hope’a
Tē ani mai nei te Fa’aora ia tātou ’ia « hi’o [iāna] i tō mau mana’o ato’a na ; ’eiaha e fē’a’a, ’eiaha e mata’u ». (Te Parau Ha’api’ira’a ’e te mau Parau Fafau 6:36). ’Ia ha’apa’o ana’e tātou i teie anira’a, e pūai noa atu tōna aroha ’e tōna mana tāra’ehara i te mau tāmatara’a a Sātane nō te fa’ahema ia tātou. ’Eiaha tātou e topa i roto i te mau ravera’a a Sātane. E nehenehe tātou e fāri’i i te itoito ’e te pūai nō te upo’oti’a i ni’a i te mau fa’ahemara’a a Sātane ’e nō te fa’a’oroma’i i te mau tāmatara’a o te orara’a nei.
’Eiaha e taiā tō ’outou ’ā’au, nā Howard Lyon
’Ua parau te Fa’aora, « ’o vau te māramarama o teie nei ao, ’o tē pe’e mai iā’u ra, e ’ore ïa e haere noa i te pōuri, e māramarama ora ïa tōna » (Ioane 8:12). ’Ua parau ato’a ’oia, « e pohe tō ’outou i teie nei ao : E fa’aitoito rā ; ’ua riro te rē o teie nei ao iā’u » (Ioane 16:33).
E nehenehe Iesu Mesia e fa’ateitei ia tātou ’e e ha’apūai ia tātou i mua i te mau ravera’a ato’a tā Sātane e tāmata nei i te fa’a’ohipa i ni’a ia tātou. ’Ia ha’amana’o ana’e tātou i te Fa’aora ’e tāna mau ha’api’ira’a, e nehenehe tātou e ’ite i te mau ha’avarevarera’a ’e te mau ha’amoemoeāra’a a Sātane ’e ’ia ’ite « i te mau mea i tō rātou huru mau » (Iakoba 4:13).