Te fa’aurura’a a te hō’ē hoa

Nā Jolie Hatch

E mea fifi roa tō’u tau taure’are’ara’a, ’ua tono mai rā te Atua i te hō’ē hoa nō te tauturu iā’u ’ia fa’aruru i te reira.

tamāhine

Fa’ahōho’ara’a nā Judy Bloomfield

’Ua mana’o noa na vau ē, ’o vau ana’e i roto i teie nei ao. ’Ua ta’a tō’u nā metua i tō’u ’aru’arura’a, ’e tau matahiti i muri mai ’ua fa’aipoipo fa’ahou tō’u māmā ’e ’ua taui i te vāhi fa’aeara’a e 4 000 maile, mai Georgia haere i Oregon, i te fenua Marite. E tauira’a rahi te reira nō te hō’ē tamāhine e iva matahiti nō te fa’aruru, nō te hō’ē iho ā rā e paraparau i te reo marite pae apato’a, ’o tei ’ore i fāri’i-hope-hia e te tahi atu mau tamari’i.

I tō’u haerera’a i te fare ha’api’ira’a tuarua, ’ua fārerei au ia Nicole.^* I terā iho taime, ’ua fāri’i au i te tahi aumanava maita’i ’e te hau nōna—te hō’ē mea ’o tā’u i ’ere na. ’Ua ’ite au ē, e ti’a iā’u ’ia fa’ahoa i teie tamāhine !

I te rahira’a o tō māua mau fārereira’a, ’ua riro mai o Nicole ’ei vāhi hau mau i te ātea ’ē o tō’u vai-’ōtahi-ra’a. ’Ua riro te tomora’a i roto i tōna fare mai te huru ra ē, tē tomo ra i roto i te hō’ē orara’a ta’a ’ē roa : ’Ua ’ī te mau poro ato’a i te Vārua o te Atua. E mau hōho’a nō te Fa’aora ’e nō te mau patura’a rarahi i te mau vāhi ato’a. (I muri mai tō’u ’itera’a ē, e mau hiero teie). ’Ua ha’amata te ’ohipa misiōnare a Nicole nā roto noa i te ani-manihini-ra’a iā’u, ’e ’aita roa atu ’oia i ’ite i te reira.

Te fa’ahoara’a ’e te ti’aturira’a

’Ua aupuru Nicole iā’u nā roto noa i te rirora’a ’ei hoa nō’u. ’Ua hōro’a mai ’oia i te Buka a Moromona iā’u, ’e ’ua ha’amata māua i te tai’o ’āmui i roto i tōna pere’o’o i muri a’e i te ha’api’ira’a.

nā tamāhine ’e te Buka a Moromona

’Ua ha’amata te Buka a Moromona i te fa’a’ī i te mau ’āpo’o i roto i tō’u orara’a. Terā rā, e mana’o ’ōtahi noa ā tō’u. E ’ere au i te melo nō te ’ēkālesia a Nicole, ’aita ato’a rā vau i riro tā’āto’a nō te ha’apa’ora’a fa’aro’o a tō’u nā metua.

’Ua fa’aue marū mai Nicole iā’u ’ia pure ’e ’ia ani i te Atua ē parau mau ānei te Buka a Moromona. ’Aita roa vau i pure a’e nei ma te reo pūai, nō reira ’aita roa atu vau i ’ite e aha te ti’a iā’u ’ia parau. ’Ua haere noa rā vau i rāpae ’e ’ua ha’amata i te paraparau. ’Ua ani au i te Atua, ’o te ’ēkālesia ānei a Nicole te ’ēkālesia mau nō’u. I te otira’a iho ā tā’u uira’a, ’ua ’ite au i te hōriri nā roto i tō’u tino tā’āto’a. ’Ua ’ite a’e rā vau ē, ma te fē’a’a ’ore, e parau mau te Buka a Moromona ’e e mea maita’i teie ’Ēkālesia nō’u.

nā tamāhine i roto i te pereo’o

E 15 matahiti tō’u ’a fāri’i ai au i teie ’itera’a pāpū. I te mau matahiti i muri mai, ’ua ti’aturi au, noa atu ’aita tō’u nā metua i ’ana’anatae i te ’Ēkālesia. ’Aita rā vau i vai ’ōtahi noa i roto i tō’u fa’aro’o, nō te mea tei reira noa Nicole nō te pāturu iā’u.

Fa’aro’o ’āpī, mau uira’a ’āpī

nā tamāhine ’e te mau misiōnare

I muri a’e i te fa’aotira’a i tā’u ha’api’ira’a tuarua, ’ua haere atu vau i Utaha (fenua Marite) e fa’aea ai. Tei reira a’ēna o Nicole ’e tē tīa’i noa ra ’oia iā’u ma te rū ’ia tae atu i reira, ’ia ti’a iā’u ’ia ha’amata i te fāri’i i te mau ha’api’ira’a misiōnare. ’Ua ’ōpua vau e bāpetizo iā’u i tō’u mahana fānaura’a i te 19ra’a o tō’u matahiti—i roto noa e ono hepetoma—’e ’ua ha’apāpū mai Nicole iā’u ē, e fa’aea mai ’oia i reira nō’u i te tā’āto’ara’a o terā taime.

I te ha’amatara’a te mau misiōnare i te ha’api’i iā’u, ’ua ’ite vitiviti au e mea iti roa tō’u ’ite nō ni’a i te ’Ēkālesia. ’Ua tai’o ’e ’ua here roa vau i te Buka a Moromona, i terā iho rā taime, ’ua paraparau mai rāua iā’u nō ni’a i te hōro’a o te Vārua Maita’i, te fa’anahora’a nō te fa’aorara’a, te rirora’a mai te Atua te huru, ’e e rave rahi atu ā mau mea ’āpī. ’Ua rahi roa nō’u nō te ha’api’i mai i te hō’ē ā taime.

nā tamāhine i ni’a i te pārahira’a

’Ua mātau maita’i rā o Nicole iā’u. E tauturu ’oia i te fa’ata’a i te mea tā te mau ’orometua i ha’api’i nā roto i te hō’ē rāve’a tāna i ’ite ē, e ta’a maita’i iā’u. I roto i taua mau ha’api’ira’a mātāmua ra, ’ua riro tāna mau tātarara’a ma te fa’a’oroma’i ’ei tumu i fa’aea mai ai au.

I te pae hope’a, te rirora’a ’ei melo

bāpetizora’a

’Ua pāturu Nicole iā’u i te pae vārua mai te reira ē tae roa i te mahana ’a bāpetizohia ai au—’e i muri mai ato’a. ’Ua tauturu ’oia i te mau melo o te pāroita ’e te mau misiōnare nō te fa’anaho ’ia nehenehe iā’u ’ia bāpetizohia i tō’u mahana fānaura’a nō te 19ra’a o tō’u matahiti. I tō’u haerera’a mai i rāpae i te pape ’e te ’itera’a vau e rave rahi ta’ata ma te mata ’ata’ata, ’aita tō’u e mana’o ’ōtahi fa’ahou. E’ita roa atu e mo’ehia iā’u teie mana’o tā’amura’a i te Fatu ’e i tāna ’Ēkālesia.

Tē ha’api’i noa nei ā vau nā roto mai i te fa’aro’o tāmau e te auhoara’a o Nicole. ’Ua fa’a’ite mai ’oia iā’u mai te ha’amatara’a ē, ’aita te ’ohipa misiōnare e tītau i te hō’ē tāreta i’oa. ’Ua ha’amata te ’ohipa misiōnare a Nicole i roto i tōna ’ā’au, i tōna torora’a i te rima i te hō’ē tamāhine nō te pae apato’a tei hina’aro i te hō’ē mata ’ata’ata.

Tē ora nei te ta’ata pāpa’i i Utaha, (fenua Marite).

• ’Ua tāuihia te i’oa.