« Te ’itera’a mai ia Iesu Mesia i roto i te Faufa’a Tahito », Nō te Pūai o te Feiā ’Āpī, Tēnuare 2022.

Mai, pe’e mai

Te ’imira’a ia Iesu Mesia i roto i te Faufa’a Tahito

Nā Marissa Widdison

Te mau ve’a a te ’Ēkālesia

Teie e toru rāve’a e nehenehe ’outou e ’imi i te Fa’aora ’ia tuatāpapa ana’e ’outou i te Faufa’a Tahito i teie matahiti.

Hōho’a

Iesu Mesia

E feruri i te mau uira’a : E aha te mau buka pāpa’ira’a mo’a e paraparau nei nō ni’a ia Iesu Mesia ? Hmm. Hi’o ana’e :

Te Buka a Moromona, ’o te tahi atu ïa fa’a’itera’a nōna.

Te Parau Ha’api’ira’a ’e te mau Parau Fafau, ’o te hō’ē ïa ha’aputura’a parau poro’i nō ’ō mai iāna ra nō Iosepha Semita ’e te tahi atu mau peropheta.

Tē fa’ata’a nei te Faufa’a ’Āpī i te mau ’ohipa i tupu i roto i tōna orara’a.

E aha rā ïa te parau nō te Faufa’a Tahito ? Tē ha’api’i ato’a ānei ra te reira ia tātou nō ni’a ia Iesu Mesia ?

’Ē ! Inaha ho’i, ’ua tūtava rahi te Fa’aora i te tauturu i tāna mau pipi ’ia hāro’aro’a i tōna ti’ara’a i roto i te Faufa’a Tahito : « Mai ia Mose ’e te mau peropheta ato’a, ’ua fa’a’ite mai ra ’oia ia rātou i te mau parau ato’a i pāpa’ihia ra, i te mau mea nō ni’a iāna iho » (Luka 24:27).

Teie e toru rāve’a e ’itehia ai ia ’outou ia Iesu Mesia ’a tuatāpapa ai ’outou i te Faufa’a Tahito i teie matahiti.

1. Te mau pāpa’ira’a mo’a ’o tē paraparau nei nō ni’a ia Iesu Mesia ma te fa’a’ohipa i te i’oa ta’a ’ē.

I roto i te Faufa’a Tahito, pinepine Iesu i te topahia te i’oa « Fatu » ’e ’aore rā « Atua ». I roto i te mau pāpa’ira’a o te Bibilia i ha’apararehia e te ’Ēkālesia, tē vai ra te mau fa’ata’ara’a i raro i te ’api ’o tē nehenehe e tauturu ia ’outou ’ia māramarama ’ia fa’ahiti-ana’e-hia te hō’ē ’īrava nō Iesu Mesia. ’Ei hi’ora’a, i te paraparaura’a Mose i te Atua i roto i te hō’ē uru rā’au ama ra (hi’o Exodo 3:6), tē ha’apāpū nei te mau nota i raro i te ’api ē, tē paraparau ra ’oia i te Fa’aora.¹ ’Ua fa’aitoito mai te peresideni Russell M. Nelson ia tātou ’ia tuatāpapa i te mau i’oa ’e te mau ti’ara’a rau o te Mesia tei fa’a’ohipahia i roto i te mau pāpa’ira’a mo’a.²

2. Te mau mea ’e te mau ’ohipa ’o tē fa’aha’amana’o nei ia tātou ia Iesu Mesia.

E rave rahi mau pāpa’ira’a mo’a nō te Faufa’a Tahito tei roto te mau tāpa’o e nehenehe e ha’api’i ia tātou nō ni’a ia Iesu Mesia ’e ’o tē fa’aha’amana’o ia tātou i te tauturu tāna e pūpū nei ia tātou. ’Ei hi’ora’a :

E rave rahi mau pāpa’ira’a mo’a e fa’ata’a nei i te mau taime i reira te mau ta’ata ha’apa’o maita’i i fa’auehia ai ’ia fa’atusia i te mau ’ānimara ’ei tuha’a nō tā rātou ha’amorira’a. ’Ei hi’ora’a, mai te mea ē, ’ua tāpa’o te mau tamari’i o ’Īserā’ela i tō rātou ’ōpani i te toto o te ’ārenio, ’ua pāruruhia rātou i te hō’ē ’ati rahi. Tē fa’aha’amana’o mai nei teie mau tusia ia tātou ē, ’ua fa’ati’a Iesu Mesia iāna iho ’ia taparahi-pohe-hia ’ei tuha’a nō tāna tāra’ehara nō te upo’oti’a i ni’a i te pohe pae vārua ’e te pohe tino. (Hi’o Exodo 12:23).
I te hō’ē taime ’ua tītauhia i te hō’ē peropheta ’o Elia te i’oa ’ia tāpuni i roto i te medebara. ’Ua tupu te ’oto i roto iāna ’e ’ua parau ē, ’ua hina’aro ’oia ’ia pohe ’oia. ’A ta’oto ai ’oia, ’ua fā mai te pane ’e te pape mai te hō’ē temeio, ’ua ha’apūai iāna i te pae tino ’e i te pae ’āehuehu e nava’i nō te tāmau noa. E nehenehe te reira e fa’aha’amana’o ia tātou ē, ’o Iesu Mesia te pape ora ’e te pane o te ora, te puna hope nō te ti’aturira’a ’e te ora. (Hi’o 1 Te mau Ari’i 19:1–8).
« E lamepa tā ’oe parau i tō’u nei avae », ’ua papa’i te hō’ē pāpa’i salamo (Salamo 119:105). ’E ’ua fa’a’ite pāpū mai ra ’o Mika ē, « Pārahi noa ā vau i te pōuri i teie nei, e riro rā Iehova ’ei māramarama nō’u » (Mika 7:8). Tē fa’aha’amana’o mai nei tā rāua mau parau ia tātou ē, ’o Iesu Mesia te māramarama o te ao, ma te arata’i ia tātou ’ia ho’i i tō tātou fare i te ra’i ra.

’A tai’o ai ’outou, e ’ite ato’a paha ’outou i te tahi atu mau mea ’o tē fa’aha’amana’o ia ’outou ia Iesu Mesia ’e i tōna ’aravihi ’ia fa’aora ia tātou. ’Ei hi’ora’a, i te fa’aorara’ahia te ’utuāfare o Noa i te diluvi i roto i te pahī ’e ’aore rā i te taime ’a hōro’ahia ai ia Iona te taime nō te tātarahapa ’a vai ai ’oia i roto i te tohorā. E nehenehe teie mau ’ohipa e fa’aha’amana’o ia tātou ē, e nehenehe te Fa’aora e amo ia tātou nā roto i te mau vero o te orara’a ma te hōro’a ia tātou i te mau rāve’a nō te ho’i fa’ahou i ni’a i te ’ē’a ti’a. (Hi’o Genese 7:1 ; Iona 1:17).

3. Te mau ’īrava e tohu nei nō ni’a i te fānaura’a ’o Iesu Mesia.

I teie mahana, tē tīa’i nei tātou ’e tē fa’aineine nei tātou nō te tae-piti-ra’a mai ’o Iesu Mesia. Mai te reira ato’a tō te mau peropheta i tahito ra tīa’ira’a ma te fa’a’oroma’i ’e ’ua pāpa’i rātou nō ni’a i tōna tae-mātāmua-ra’a mai, ’a fānauhia ai ’oia i ni’a i te fenua nei. ’Ei hi’ora’a :

’Ua fa’ata’a mai te hō’ē peropheta tei pi’ihia ’o Balaama nāhea « e feti’a tē tae mai mai ’ō ia Iakoba ra » (Nūmera 24:17). Te aura’a, e fānauhia te Fa’aora i roto i te huā’ai o Iakoba (e ’aore rā ’o ’Īsera’ela).
’Ua parau te hō’ē peropheta tei pi’ihia ’o Natana i te ari’i Davida ē, e riro Iesu Mesia ’ei hua’ai nō Davida—’oia ho’i, e ha’amau tōna huā’ai i « te terono o tōna ra bāsileia e a muri noa atu » (2 Samuela 7:13)).
’Ua pāpa’i te peropheta Isaia i te tahi o te mau fa’a’itera’a mātaro-maita’i-hia o te Faufa’a Tahito nō te Fa’aora. ’Ua fa’a’ohipahia te tahi o tāna mau parau ’ei mau parau i roto i te Mesia, a Handel, ’o tē hīmene-pinepine-hia i te tau Noela. (Hi’o Isaia 7 ; 9 ; 40 ; 53).

Hōho’a

e tamāhine e tai’o ra i te mau pāpa’ira’a mo’a ’e te mori pata

Ma te ha’api’ipi’i-ri’i-ra’a, e nehenehe ’outou e ’ite ia Iesu Mesia i roto i te Faufa’a Tahito i teie matahiti. ’Ua here ta’a ’ē ’oia ia ’outou mai tāna i here ia ’Adamu ’e ia ’Eva, ia Aarona ’e ia Miriama³—’e e rave rahi atu ā mau ta’ata tāna iho i aupuru i roto i teie mau ’ā’amu tahito ’e te fa’auru. Ma te fa’aro’o ia Iesu Mesia, ’e nā roto i te tauturu a te tahi ’e te tahi, e riro teie ’ei matahiti māere nō te tuatāpapara’a pāpa’ira’a mo’a !