« Uira’a ’e pāhonora’a », Nō te Pūai o te Feiā ’Āpī, Tēnuare 2022.
Uiraʼa ’e Pāhonoraʼa
« ’Aita tō’u tū’ati rahi i te mau ta’ata nō tā’u pupu feiā ’āpī. E nāhea vau i te tū’ati rahi atu ā ia rātou ? »
’A toro atu i te rima i te tahi atu ta’ata
« E rahi atu ā tō’u ’āpitira’a ia vetahi ’ē ’ia tāmata mau vau i te hōro’a i te taime nō rātou tāta’itahi, ’eiaha noa i roto i te mau fa’anahora’a pupu. Mai te mea e hina’aro ’outou e ’imi i te hō’ē ta’ata e fa’ahoa, ’a toro atu i te rima i te hō’ē ta’ata e au ra ē tē hina’aro ra i te hō’ē hoa. E rahi atu paha tā ’oe e fāna’o i tāna ! »
Latyanna P., 17 matahiti, Singapour
Fa’a’ite i te mau mea tā ʼoutou e ’ana’anatae
« Te rahira’a o te mau ta’ata i roto i tā’u pupu feiā ’āpī e mau mea ta’a ’ē tā rātou e ana’anatae nei. E mea au nā’u ’ia ani ia rātou nō ni’a i tō rātou mau hina’aro nō te mea tē māna’ona’o nei au ia rātou. I muri iho e fāna’o ïa rātou i te ani ato’a mai i tō’u mau hina’aro. Tītauhia te taime tō te fa’atupura’a i te tū’atira’a ’e te ta’ata—’a tāmau noa i te reira ! »
Erin F., 18 matahiti, Utah, Marite
’Imi i te mau tū’atira’a
« Mai te mea e hina’aro ’outou ’ia rahi atu ā tō ’outou tā’amura’a i tō ’outou mau hoa, ’a ’imi i te mau mea maita’i ’e te faufa’a ’o tā ’outou e nehenehe e rave ’āmui, noa atu e mea iti roa rātou. E nehenehe ’outou e ’ite mai i te hō’ē pū tari’a nō ’outou ’aore rā te hō’ē taime ’o tā ’outou e ’oa’oa ’āmui. ’A ani i te tauturu a te Metua i te ao ra, ’e e hōro’a mai ’oia i te fa’aurura’a ia ’outou. »
Carla V., 12 matahiti, Pērū
E māuruuru i te ta’a-’ē-ra’a
« Rahi noa atu tō’u haerera’a nā muri i te mau ta’ata i roto i tā’u pupu feiā ’āpī, rahi noa ato’a atu tō’u au i te mea ta’a ’ē nō ni’a ia rātou ! Tē ha’api’i nei au nāhea i te tāvini maita’i a’e ia rātou, ’o tē tauturu nei iā’u ’ia ha’afātata atu ā ia rātou ’e ia Iesu Mesia. E mau tamari’i pā’āto’a tātou nā tō tātou Metua i te ao ra, nō reira e tū’atira’a rahi atu ā tō tātou i tā tātou e mana’o nei. »
Sarah M., 16 matahiti, Oregon, Marite
Tāmata i te mau mea ’āpī
« ’A fa’ahoa noa ’e ’a tāmau noa i te paraparau ia rātou. Tāmau noa i te tāmata i te mau mea ’āpī ’ia riro ’ei mau mea ha’afātata atu ā. Te hō’ē tamāroa i roto i tā mātou pāroita, e ’ere i te mea au roa nāna te ’ohipa tū’aro, e ha’uti noa rā ’oia nā muri ia mātou. I muri iho, e rave mātou i te mau mea tāna e ’ana’anatae, mai te perēra’a mai te tahutahu ’aore rā te taorara’a tāreta. Te tāmatara’a i te mau mea ’āpī e rāve’a maita’i ïa nō te ’ite mai i te tū’atira’a. »
Jarren M., 17 matahiti, Nova Scotia, Tanata
Toro i te rima
« ’A toro i te rima ’e ’a tauturu i te hō’ē ta’ata i roto i tā ’outou pupu feiā ’āpī e fa’aruru nei i te hō’ē taime fifi. ’Ia tāmata ana’e tātou i te riro ’ei hi’ora’a nō te here o te Fa’aora, e tauturu te reira ia tātou ’ia fa’atū’ati te tahi i te tahi. »
Joshua C., 20, Faleniu, Hāmoa Marite
’Aita e faufa’a e fa’ahua e ta’ata ’ē ’outou
« I te roara’a o te tau, e ’ite mai paha ’outou i te mau tū’atira’a i roto ia ’outou, ’aita rā i terā iho taime. ’A tīa’i noa atu ai i terā taime, e nehenehe tā ’outou e fa’atū’ati ia ’outou nō te mau ’ohipa ri’i ’e te mau mea e tupu mai i roto i te hepetoma. ’A ’oa’oa i te mau ’ātivite ! ’A mā’iti i te ’āmui mai, ’e ’aita e faufa’a e fa’ahua e ta’ata ’ē ’outou ! »
Hannah W., 18 matahiti, Nova Scotia, Canada