« ’Ua mātau te Metua i te ao ra iā’u », Nō te Pūai o te Feiā ’Āpī, Tēnuare 2022.
Te tumu parau ’e ’o vau
Tē fa’ati’a nei te feiā ’āpī e mea nāhea rātou ’ia ora i te mau parau o te tumu parau a te Feiā ’Āpī tamāhine ’e a te Autahu’ara’a a Aarona
’Ua mātau te Metua i te ao ra iā’u
« E tamaiti herehia vau nā te Atua ».
I tō’u pūhapara’a ’e tō’u pāpā, ’ua fa’afāna’o māua to’opiti i te hō’ē taime e’ita roa atu e mo’ehia iā’u. ’Ua pa’i’uma māua i te hiti o te hō’ē mou’a i te maorora’a pō, ’e ’ua ’itehia mai i te hō’ē vāhi nō te pārahi. ’A hi’o ai māua i te ra’i o te pō, ’ua hā’atihia māua e te mau feti’a māramarama roa a’e tā’u i ’ore i ’ite a’e nei. ’Ua pārahi maoro māua, ma te ’imi i te i’oa o te mau paraneta ’e te mau pu’e feti’a hō’ē i muri mai i te tahi.
’A hi’o ai au i te ra’i nui ātea i mua iā’u, e au ē e mea na’ina’i au ’e te faufa’a ’ore. ’Aita e ti’a iā’u ’ia tai’o i te rahira’a paraneta e vai ra—« te mau ao hope’a ’ore ra », e ’ere ānei ? E aha ho’i au nei ’ia fa’aauhia i teie mau mea ?
’Ua ui atu vau i tō’u pāpā, tē vai ra ānei te tahi atu orara’a i roto i te ao nui, ma te ’ite ’ua rahi te maere i tō’u ferurira’a. ’Ua ’ite a’ena paha ’oia i tō’u mau mana’o, nō te mea ’ua parau noa mai ’oia ē : « Teie te mea tā’u i ’ite. E rave rahi mau poietera’a tā te Metua i te ao ra, mai tā ’oe e ’ite ra. Terā rā, i roto i tāna mau hāmanira’a ato’a, ’ua here ’oia ia ’oe iho.
« Tē ’ite nei ’oia i te mau mea ato’a tā ’oe e fa’aruru nei ’e tē hina’aro nei ’oia nā ni’a i te mau mea ato’a ’ia vai ’oia i roto i tō ’oe orara’a. Tē hina’aro nei ’oia e hōpoi mai ia ’oe i te ’oa’oa ’e ’ia tauturu ia ’oe ’ia ho’i fa’ahou e ora i pīha’i iho iāna ē a muri noa atu ».
Noa atu te mana’o ē, e mea ha’iha’i roa vau i raro a’e i teie ra’i ’ā’ano o te pō, ’ua ti’aturi rā vau i te ’itera’a pāpū o tō’u pāpā. E faufa’a tō’u nō te Metua i te ra’i ra. ’E tē hina’aro nei ’oia ’ia vai ’oia i roto i tō’u orara’a.
’Ua ha’amana’o vau i te ha’api’ira’a a te peresideni Dieter F. Uchtdorf, e tauturu piti i roto i te Peresidenira’a Mātāmua i taua taime ra : « Teie te hō’ē ha’ataupupura’a mana’o na te ta’ata : ’ia fa’aauhia i te Atua, e mea faufa’a ’ore te ta’ata ; noa atu rā, e mau mea ato’a tātou nō te Atua ».1
Mai taua ra’i ra tei ’ī i te feti’a, ’aita e hope’ara’a tō te mau poietera’a a te Atua—mai te reira ato’a tōna here nō tāna mau tamari’i tāta’itahi. Nō tātou tāta’itahi. I te tahi taime e feruri au i taua taime ra ’a pārahi ai au i ni’a i te mou’a ma te maere rahi fa’ahiahia mau. ’Aore re’a paha vau ’ia fa’aauhia i te Atua, ’aita rā ’oia e mana’o ra mai te reira te huru. E tamaiti au nāna, ’e ’ua mātau ’oia iā’u.
Tē ora nei te ta’ata pāpa’i i California, fenua Marite.