« Nā’u ho’i te reira, ’e ’ua ’ite au ia rātou », Nō te Pūai o te Feiā ’Āpī, Tēnuare 2022.
Mai, pe’e mai
Nā’u ho’i te reira, ’e ’ua ’ite au ia rātou
Hōho’a nā Guetty Images
’Ua feruri a’e na ānei ’outou ē, e mea faufa’a ’ore ’outou ? ’Ua tupu paha te reira ferurira’a i te taime ’a feruri ai ’outou ē, e hia rahira’a ta’ata i roto i te ao nei ’e ’aore rā, ’a hi’o ai ’outou i te rahira’a feti’a i roto i te ra’i. ’Ua uiui a’e na ānei ’outou ē, ’ua ’ite mau ānei te Atua e ’o vai ’outou ’e mai te aha te huru tō ’outou orara’a ? Mai te mea ē, ’ē, e poro’i ïa tā Mose nō ’outou.
I roto i te hō’ē ’ōrama, ’ua fa’a’ite te Atua ia Mose i te mau huero ato’a o te fenua nei ’e te mau ta’ata ato’a e ora ra i reira. E rave rahi « e ’aore e hope ia tai’ohia, e au īa mai te one tahatai ra » (Mose 1:28). I muri iho ’ua parau te Atua ia Mose ē, ’ua hāmani ’oia i « te mau ao ’e ’aore e hope ’ia tai’ohia »((Mose 1:33)—’oia ho’i, ’ua tae roa tāna mau hāmanira’a i ’ō atu i teie nei fenua.
Pāpū ē, ’aita ’o Mose i ta’a fa’ahou ē, nāhea rā, i tōna ’itera’a i te tā’āto’ara’a o teie mau mea. ’Ua uiui paha ’oia ē : I hea vau e vai ai i rotopū i teie mau hāmanira’a e rave rahi ? ’E nāhea e ti’a ai i te Atua ’ia hi’opo’a i teie mau mea e rave rahi ?
E mea ’ōhie te pāhonora’a a te Atua : « ’Ua tai’ohia rā te mau mea ato’a e au nei ». Nāhea ? « Nā’u ho’i te reira, ’e ’ua ’ite au ia rātou » (Mose 1:35). ’Ua ’ite te Atua ’o vai Mose, mai tāna i ’ite i te tā’āto’ara’a o tāna mau tamari’i, ’e tae noa atu i tāna mau hāmanira’a ato’a. Nāna te mau mea ato’a—te mau feti’a, te one, ’e tāna iho ā rā mau tamari’i i ni’a i te fenua nei. ’O rātou te tumu hō’ē roa i hāmani ai ’oia i te fenua nei. Tō rātou fa’aorara’a mure ’ore ’o te ’ohipa faufa’a roa a’e ïa a te Atua.
« Inaha, ’o teie ho’i tā’u ’ohipa e tō’u hanahana ho’i, ’ia fa’atupu i te tāhuti ’ore ’e te ora mure ’ore o te ta’ata nei » (Mose 1:39).
Mai ia Mose i ha’api’i mai i tōna vaira’a i roto i te fa’anahora’a a te Atua, e ti’a ato’a ia ’outou ’ia ’ite pāpū ē, ’ua ’ite te Atua ia ’outou ! Te tauturura’a ia ’outou ’ia ho’i iāna ra, ’o tāna ïa ’ohipa ’e tōna hanahana. Nō te aha ? Nō te mea nāna ’outou. ’E e ’ere roa atu te reira i te mea faufa’a ’ore !