Te tumu parau ’e ’o vau

Tē fa’ati’a nei te feiā ’āpī e mea nāhea rātou ’ia ora i te mau parau o te tumu parau a te Feiā ’Āpī tamāhine ’e a te Autahu’ara’a a Aarona

’Ua ’ite au i tō’u faufa’a

« E tamāhine herehia vau e nā metua i te ra’i ».

Nā Jihan Johnson

taure’are’a tamāhine

Hōho’a nā Christina Smith

I te mau tuha’a e rave rahi nō Jamaica, e tītauhia i te mau pīahi mai iā’u ’ia rave i te hō’ē hi’opo’ara’a nō te tomo atu i roto i te fare ha’api’ira’a tuarua tā rātou e hina’aro. ’Ua tuatāpapa itoito tō’u mau hoa ’e o vau nei ’ia nehenehe ia mātou pā’āto’a ’ia tomo i roto i te fare ha’api’ira’a tuarua maita’i roa a’e. I tō’u ha’amatara’a i te fē’a’a ’ua ti’a iā’u i te rave i te reira, ’ua fa’aitoito noa mai tō’u māmā iā’u. ’Ua fa’aha’amana’o mai ’oia iā’u ē, e tamari’i au nā te Metua i te ao ra ’e e tauturu ’oia iā’u ’ia haere nā ni’a i te ’ē’a ti’a.

I te taera’a mai tā’u mau nota hi’opo’ara’a, ’ua roa’a iā’u te nota teitei roa a’e tā’u e ti’a ia fāri’i ! ’Ua ’oa’oa roa vau i te mea ē, e nehenehe iā’u e pārahi i pīha’i iho i tō’u mau hoa !

’Aita rā i maoro roa ’ite a’e ra vau ē, ’aita hō’ē o tō’u mau hoa i nava’i maita’i tāna nota. ’Ua ’oto roa mātou pā’āto’a, e’ita tāna e nehenehe e haere mai nā muri iho ia mātou. ’Ua roa’a mai rā te ’oa’oa iā’u i te ha’amana’ora’a i te mea tā tō’u māmā i ha’api’i iā’u. E tamāhine fa’ahiahia ato’a tō’u hoa na te Metua i te ra’i, ’e nāna ato’a e tauturu i tō’u hoa, noa atu te huru o te mau nota hi’opo’ara’a.

’Ua ’ore tō’u ’ana’anatae i te ha’amatara’a tō’u hoa i te parau i te mau ta’ata ato’a ē, e’ita e ti’a iā’u ’ia tomo i roto i terā fare ha’api’ira’a tuarua—’o ’ōna ra te ti’a ’ia tomo atu. ’Ua tāpiri atu te rahira’a o tō’u mau hoa i tōna pae ’e ’ua fa’aea i te haere mai nā muri iā’u. Ha’amata a’e ra vau i te fē’a’a iā’u iho. ’Ua ti’a mau ānei iā’u ’ia tomo atu i reira ?

’Ua feruri fa’ahou vau i te mea tā tō’u māmā i ha’api’i iā’u : E tamari’i ta’a ’ē au i te hōho’a o te Metua i te ao ra.

Tei roto vau i teienei i te fare ha’api’ira’a ’āpī ’e e mau hoa ’āpī tō’u. Tē pāturu nei rātou iā’u ’e tē fa’aha’amana’o mai nei rātou iā’u i tō’u faufa’a. ’Ua ha’api’i mai au ē, e ’ere i te mea faufa’a te parau a vetahi ’ē nō’u. E ’oa’oa vau ’ia tāmata ana’e au ’ia riro mai tā te Atua e hina’aro iā’u ’ia riro mai—nō te mea o te reira tā’u e hina’aro ’ia riro mai.

Tē ora nei te ta’ata pāpa’i i Jamaica.