« ខ្ញុំស្គាល់តម្លៃរបស់ខ្ញុំ » ដើម្បីកម្លាំងនៃយុវជន ខែ មករា ឆ្នាំ ២០២២ ។
បាវចនា និង ខ្ញុំ
យុវវ័យចែកចាយពីរបៀបដែលពួកគេកំពុងរស់នៅតាមពាក្យពេចន៍នៃបាវចនាយុវនារី និងកូរ៉ុមបព្វជិតភាព
ខ្ញុំស្គាល់តម្លៃ របស់ខ្ញុំ
« ខ្ញុំគឺជាបុត្រីសំណព្វរបស់ព្រះបិតាមាតាសួគ៌ » ។
រូបថតដោយ គ្រីស្ទីណា ស្ម៊ីធ
នៅផ្នែកជាច្រើននៃប្រទេសហ្សាម៉ាអ៊ីក សិស្សដូចជារូបខ្ញុំត្រូវប្រឡងដើម្បីចូលរៀននៅវិទ្យាល័យដែលពួកគេចង់ចូលរៀន ។ មិត្តភក្តិខ្ញុំ និងខ្ញុំបានខិតខំរៀនដើម្បីយើងទាំងអស់គ្នាអាចចូលរៀននៅវិទ្យាល័យល្អៗបាន ។ នៅពេលខ្ញុំចាប់ផ្តើមមានការសង្ស័យថាខ្ញុំអាចធ្វើបាន ម៉ាក់ខ្ញុំតែងតែលើកទឹកចិត្តខ្ញុំ ។ គាត់បានរម្លឹកដល់ខ្ញុំថា ខ្ញុំជាបុត្រីរបស់ព្រះវរបិតាសួគ៌ ហើយថាទ្រង់នឹងជួយខ្ញុំឲ្យដើរលើផ្លូវត្រូវ ។
នៅពេលលទ្ធផលប្រឡងរបស់ខ្ញុំបានចេញ គឺខ្ញុំទទួលបានចំណាត់ថ្នាក់ខ្ពស់បំផុត ! ខ្ញុំមានចិត្តរំភើបខ្លាំងណាស់ ដោយសារតែនោះមានន័យថាខ្ញុំអាចទៅរៀនជាមួយមិត្តភក្តិខ្ញុំទាំងអស់ហើយ !
ប៉ុន្តែក្រោយមកខ្ញុំបានដឹងថាមិត្តភក្តិខ្ញុំម្នាក់ពុំប្រឡងបានពិន្ទុខ្ពស់គ្រប់គ្រាន់នោះទេ ។ យើងទាំងអស់គ្នាសោកស្តាយខ្លាំងណាស់ដែលគាត់មិនអាចមករៀនជាមួយពួកយើងបាន ។ ប៉ុន្តែខ្ញុំបានរកឃើញអំណរកាលនឹកឃើញពីអ្វីដែលម៉ាក់របស់ខ្ញុំបានបង្រៀនខ្ញុំ ។ មិត្តខ្ញុំក៏ជាបុត្រីដ៏អស្ចារ្យរបស់ព្រះវរបិតាសួគ៌ដែរ ហើយទ្រង់ក៏នឹងជួយនាងដែរ មិនថាពិន្ទុប្រឡងរបស់នាងបានប៉ុន្មាននោះទេ ។
ការរំភើបរបស់ខ្ញុំបានរសាយទៅអស់នៅពេលមិត្តរបស់ខ្ញុំបានចាប់ផ្តើមប្រាប់មនុស្សគ្រប់គ្នាថាខ្ញុំមិនសមនឹងចូលរៀននៅវិទ្យាល័យនោះទេ—ថា គាត់ គួរតែបានចូលរៀននៅវិទ្យាល័យនេះជំនួសវិញ ។ មិត្តភក្តិរបស់ខ្ញុំជាច្រើនបាននៅខាងគាត់ ហើយបានឈប់ដើរលេងជាមួយខ្ញុំ ។ ខ្ញុំក៏ចាប់ផ្តើមសង្ស័យលើខ្លួនឯង ។ តើខ្ញុំពិតជាស័ក្តិសមនឹងបានចូលរៀននៅទីនេះដែរឬអត់ ?
ខ្ញុំបានគិតដល់អ្វីដែលម៉ាក់របស់ខ្ញុំបានបង្រៀនខ្ញុំ ៖ ថាខ្ញុំជាបុត្រីដ៏ពិសេសដែលបានបង្កើតតាមរូបអង្គរបស់ព្រះវរបិតាសួគ៌ ។
ឥឡូវនេះខ្ញុំរៀននៅសាលារៀនថ្មី ហើយខ្ញុំបានរាប់អានមិត្តភក្តិថ្មីៗ ។ ពួកគេគាំទ្រដល់ខ្ញុំ ហើយបានរម្លឹកខ្ញុំពីយុវវ័យរបស់ខ្ញុំ ។ ខ្ញុំបានរៀនថា វាមិនសំខាន់ទេចំពោះអ្វីដែលគេនិយាយអំពីខ្ញុំ ។ ខ្ញុំរីករាយនៅពេលខ្ញុំព្យាយាមធ្វើជាមនុស្សដែលព្រះចង់ឲ្យខ្ញុំធ្វើ—ពីព្រោះនោះជាអ្វីដែលខ្ញុំចង់ប្រែក្លាយ ។
អ្នកនិពន្ធរស់នៅប្រទេ ហ្សាម៉ាអ៊ីក ។