« ព្រះវរបិតាសួគ៌ស្គាល់ខ្ញុំ » ដើម្បីកម្លាំងនៃយុវជន ខែ មករា ឆ្នាំ ២០២២ ។
បាវចនា និង ខ្ញុំ
យុវវ័យចែកចាយពីរបៀបដែលពួកគេកំពុងរស់នៅតាមពាក្យពេចន៍នៃបាវចនាយុវនារី និងកូរ៉ុមបព្វជិតភាព
ព្រះវរបិតាសួគ៌ស្គាល់ ខ្ញុំ
« ខ្ញុំជាបុត្រាសំណព្វរបស់ព្រះ » ។
នៅពេលខ្ញុំបោះជំរំជាមួយប៉ាខ្ញុំ ពួកយើងបានចែកចាយពេលវេលាមួយដែលខ្ញុំមិនអាចបំភ្លេចបានឡើយ ។ ខ្ញុំ និងប៉ាបានឡើងតាមជើងភ្នំនៅពេលយប់មួយហើយក៏បានរកឃើញកន្លែងមួយអង្គុយជាមួយគ្នា ។ នៅពេលដែលខ្ញុំ និងប៉ាសម្លឹងមើលទៅលើមេឃនៅពេលយប់ នៅជុំវិញខ្លួនហ៊ុំព័ទ្ធដោយដួងតារាដ៏អស្ចារ្យបំផុតដែលខ្ញុំមិនធ្លាប់បានឃើញឡើយ ។ ខ្ញុំ និងប៉ាបានអង្គុយជាមួយគ្នាអស់រយៈពេលយ៉ាងយូរ ដោយធ្វើការដាក់ឈ្មោះឲ្យភព និងតារានិករម្តងមួយៗ ។
ក្រឡេកទៅមើលពិភពលោកនៅពីមុខខ្ញុំ ខ្ញុំមានអារម្មណ៍ថាខ្លួនឯងតូចណាស់ ហើយមិនសូវសំខាន់ ។ ខ្ញុំមិននឹកស្មានថាតើមានភពប៉ុន្មានទៀតដែលនៅទីនោះ—« ពិភពទាំងឡាយដ៏គ្មានទីបញ្ចប់ » មែនទេ ? ខ្ញុំជាអ្វីទៅបើប្រៀបធៀបទៅនឹងភពទាំងអស់នោះ ?
ខ្ញុំបានសួរប៉ារបស់ខ្ញុំថាតើមានជីវិតផ្សេងទៀតនៅលើពិពភលោកនេះដែរឬទេ គ្រាន់តែគិតដល់នោះ ខ្ញុំមានអារម្មណ៍ភ័យខ្លាចទៅហើយ ។ ប៉ាច្បាស់ជាដឹងពីអ្វីដែលខ្ញុំគិត ពីព្រោះតែគាត់បាននិយាយយ៉ាងសាមញ្ញ ៖ « នេះជាអ្វីដែលប៉ាដឹង ។ ព្រះវរបិតាសួគ៌បានបង្កើតអ្វីៗជាច្រើន ដូចជាកូនបានឃើញចឹង ។ ប៉ុន្តែក្នុងចំណោមការបង្កបង្កើតរបស់ទ្រង់ទាំងអស់ ទ្រង់សព្វព្រះទ័យ យើង ម្នាក់ៗ ។
« ទ្រង់ជ្រាបដឹងពីអ្វីគ្រប់យ៉ាងដែលកូនឆ្លងកាត់ ហើយសព្វព្រះទ័យលើសអ្វីទាំងអស់ដើម្បីធ្វើជាចំណែកមួយនៅក្នុងជីវិតរបស់កូន ។ ទ្រង់មានព្រះទ័យចង់នាំមកនូវអំណរ ហើយជួយកូនឲ្យត្រឡប់ទៅរស់នៅជាមួយទ្រង់ជានិរន្តរវិញ » ។
ខ្ញុំនៅតែមានអារម្មណ៍ថាខ្លួនឯងតូចនៅក្រោមផ្ទៃមេឃពេលរាត្រីដ៏សែនធំ ប៉ុន្តែ ខ្ញុំជឿលើទីបន្ទាល់របស់ប៉ាខ្ញុំ ។ ខ្ញុំមានសារៈសំខាន់ចំពោះព្រះវរបិតាសួគ៌ ។ ហើយទ្រង់ចង់មានចំណែកនៅក្នុងជីវិតរបស់ខ្ញុំ ។
ខ្ញុំនៅចាំពីអ្វីដែលប្រធាន ឌៀថើរ អេហ្វ អុជដូហ្វ ដែលនៅពេលនោះជាទីប្រឹក្សាទីពីរនៅក្នុងគណៈប្រធានទីមួយបានបង្រៀន ៖ « នេះគឺជាមតិផ្ទុយមួយរបស់មនុស្ស ៖ បើប្រៀបនឹងព្រះ មនុស្សគឺគ្មានជាអ្វីសោះ ប៉ុន្តែយើងគឺជាអ្វីៗ ទាំងអស់ចំពោះព្រះ » ។១
ដូចជាផ្ទៃមេឃដែលមានរស្មីនោះដែរ ការបង្កបង្កើតរបស់ព្រះមិនចេះចប់ឡើយ—ដូចជាក្ដីស្រឡាញ់របស់ទ្រង់ចំពោះកូនចៅម្នាក់ៗរបស់ទ្រង់ដែរ ។ សម្រាប់យើងម្នាក់ ។ ពេលខ្លះខ្ញុំគិតត្រឡប់ទៅគ្រានោះ នៅពេលដែលខ្ញុំអង្គុយលើភ្នំដោយភាពអស្ចារ្យ ។ ខ្ញុំប្រហែលជាគ្មានអ្វីដែលប្រៀបធៀបនឹងព្រះបានទេ ប៉ុន្តែទ្រង់មិនគិតដូច្នេះទេ ។ ខ្ញុំជាបុត្រារបស់ទ្រង់ ហើយទ្រង់ស្គាល់ខ្ញុំ ។
អ្នកនិពន្ធរស់នៅរដ្ឋកាលីហ្វ័រញ៉ា ស.រ.អា.