« ការស្វែងរកព្រះយេស៊ូវគ្រីស្ទនៅក្នុងព្រះគម្ពីរសញ្ញាចាស់ » ដើម្បីកម្លាំងនៃយុវជន ខែ មករា ឆ្នាំ ២០២២ ។
ចូរមកតាមខ្ញុំ
ការស្វែងរក ព្រះយេស៊ូវគ្រីស្ទ នៅក្នុងព្រះគម្ពីរសញ្ញាចាស់ ។
នេះគឺជារបៀបបីយ៉ាងដែលប្អូនអាចរកមើលព្រះអង្គសង្រ្គោះ កាលប្អូនសិក្សាព្រះគម្ពីរសញ្ញាចាស់នៅក្នុងឆ្នាំនេះ ។
សំណួរពេញនិយម ៖ តើគម្ពីរណាមួយនៃបទគម្ពីរដែលនិយាយអំពីព្រះយេស៊ូវគ្រីស្ទ ? តោះ ។ ចូរយើងមើលទាំងអស់គ្នា ៖
ព្រះគម្ពីរមរមនគឺជាសក្តីបទមួយទៀតអំពីទ្រង់ ។
ព្រះគម្ពីរគោលលទ្ធិ និងសេចក្ដីសញ្ញា គឺជាបណ្ដុំសារលិខិតមកពីទ្រង់ទៅកាន់យ៉ូសែប ស្ម៊ីធ និងពួកព្យាការីផ្សេងទៀត ។
គម្ពីរសញ្ញាថ្មីពិពណ៌នាពីព្រឹត្តិការណ៍នៃព្រះជន្មរបស់ទ្រង់ ។
ចុះចំណែកគម្ពីរសញ្ញាចាស់វិញ ? តើវាបង្រៀនយើងអំពីព្រះយេស៊ូវគ្រីស្ទដែរឬ ?
មែនហើយ ! តាមពិតព្រះអង្គសង្គ្រោះខិតខំយ៉ាងខ្លាំងដើម្បីជួយសិស្សរបស់ទ្រង់ឲ្យយល់ពីតួនាទីរបស់ទ្រង់នៅក្នុងគម្ពីរសញ្ញាចាស់ ៖ « រួចទ្រង់ក៏ស្រាយន័យសេចក្តីដែលតម្រូវដល់ទ្រង់ពីក្នុងគម្ពីរទាំងឡាយឲ្យគេស្តាប់ចាប់តាំងពីគម្ពីរលោកម៉ូសេ និងគម្ពីរពួកហោរារៀងមក » ( លូកា ២៤:២៧ ) ។
នេះគឺជារឿងបីយ៉ាងដែលប្អូនអាចរកមើលព្រះយេស៊ូវគ្រីស្ទ កាលប្អូនអានគម្ពីរសញ្ញាចាស់នៅក្នុងឆ្នាំនេះ ។
១. គម្ពីរនេះនិយាយអំពីព្រះយេស៊ូវគ្រីស្ទដោយប្រើព្រះនាមផ្សេងៗ ។
នៅក្នុងព្រះគម្ពីរសញ្ញាចាស់ ព្រះយេស៊ូវ ជាញឹកញាប់ត្រូវបានហៅថា « ព្រះយេហូវ៉ា » ឬ « ព្រះ » ។ កំណែគម្ពីរប៊ីបដែលបានបោះពុម្ភផ្សាយដោយសាសនាចក្ររួមមានលេខយោងដែលអាចជួយប្អូនយល់នៅពេលដែលខគម្ពីរនេះសំដៅទៅលើព្រះយេស៊ូវគ្រីស្ទ ។ ឧទាហរណ៍ នៅពេលម៉ូសេ បានទូលទៅព្រះនៅក្នុងគុម្ពបន្លាដែលមានភ្លើងឆេះ ( សូមមើល និក្ខមនំ ៣:៦ ) លេខយោងបានបញ្ជាក់ថាលោកកំពុងទូលនឹងព្រះអង្គសង្រ្គោះ ។១ ប្រធាន រ័សុល អិម ណិលសុនបានលើកទឹកចិត្តយើងឲ្យសិក្សាព្រះនាម និងព្រះគោរមងារខុសៗគ្នានៃព្រះគ្រីស្ទដែលបានប្រើនៅក្នុងព្រះគម្ពីរនេះ ។២
២. សាច់រឿង និងព្រឹត្តិការណ៍ដែលរម្លឹកយើងពីព្រះយេស៊ូវគ្រីស្ទ ។
ខគម្ពីរក្នុងព្រះគម្ពីរសញ្ញាចាស់ជាច្រើនរួមទាំងទីសម្គាល់ដែលបង្រៀនយើងអំពីព្រះយេស៊ូវគ្រីស្ទ និងរម្លឹកយើងពីជំនួយដែលទ្រង់ប្រទានយើង ។ ឧទាហរណ៍ ៖
-
ខគម្ពីរជាច្រើនពិពណ៌នាពីពេលដែលប្រជារាស្រ្តស្មោះត្រង់បានបង្គាប់ឲ្យបូជា សត្វពាហនៈ ជាផ្នែកមួយនៃការថ្វាយបង្គំរបស់ពួកគេ ។ ឧទាហរណ៍ ប្រសិនបើកូនចៅនៃអ៊ីស្រាអែលគូសឈាមរបស់កូនចៀមនៅលើទ្វាររបស់ពួកគេ នោះពួកគេនឹងទទួលបានការការពារពីគ្រោះចង្រៃដ៏គួរឲ្យខ្លាច ។ ការបូជាទាំងនេះរម្លឹកយើងថាព្រះយេស៊ូវគ្រីស្ទបានអនុញ្ញាតឲ្យព្រះអង្គទ្រង់ផ្ទាល់ត្រូវគេធ្វើគតដែលជាផ្នែកមួយនៃដង្វាយធួនរបស់ទ្រង់ដើម្បីយកឈ្នះលើការសុគតខាងវិញ្ញាណ និងខាងព្រះកាយ ។ ( សូមមើល និក្ខមនំ ១២:១៣ ) ។
-
នៅគ្រាមួយព្យាការីម្នាក់ដែលមានឈ្មោះថា អេលីយ៉ា បានពួននៅវាលរហោស្ថាន ។ លោកបានមានចិត្តសោកស្តាយ ហើយបានពោលថាបើលោកបានស្លាប់ហើយនោះជាការណ៍ល្អ ។ ខណៈដែលលោកកំពុងលង់លក់ នំបុ័ង និងទឹក បានផុសឡើងដោយអព្ភូតហេតុ ដោយបានពង្រឹងលោកទាំងខាងសាច់ឈាម និងខាងវិញ្ញាណគ្រប់គ្រាន់ល្មមដើម្បីបន្តដំណើរទៅមុខ ។ ដំណើររឿងនេះរម្លឹកយើងថាព្រះយេស៊ូវគ្រីស្ទគឺជាទឹករស់ និងនំបុ័ងជីវិតដែលជាប្រភពនៃក្តីសង្ឃឹម និងជីវិតចុងក្រោយ ។ ( សូមមើល ពង្សាវតារក្សត្រ ទី១ ១៩:១–៨ ) ។
-
អ្នកតាក់តែងទំនុកតម្កើងម្នាក់បានសរសេរថា « ព្រះបន្ទូលនៃទ្រង់ជា ចង្កៀងដល់ជើងទូលបង្គំ » ( ទំនុកតម្កើង ១១៩:១០៥ ) ។ ហើយមីកា បានថ្លែងថា « កាលណាខ្ញុំដួល នោះខ្ញុំនឹងក្រោកឡើងវិញ កាលណាខ្ញុំអង្គុយក្នុងទីងងឹត នោះព្រះយេហូវ៉ា នឹងជាពន្លឺ ដល់ខ្ញុំ » ( មីកា ៧:៨ ) ។ ពាក្យសម្ដីរបស់ពួកលោករម្លឹកដល់យើងថាព្រះយេស៊ូវគ្រីស្ទគឺជាពន្លឺនៃពិភពលោក ដែលដឹកនាំយើងត្រឡប់ទៅផ្ទះនៅស្ថានសួគ៌របស់យើងវិញ ។
កាលបងប្អូនអានបងប្អូនអាចរកឃើញសាច់រឿងផ្សេងទៀតដែលរម្លឹកបងប្អូនអំពីព្រះយេស៊ូវគ្រីស្ទ និងសមត្ថភាពរបស់ទ្រង់ក្នុងការជួយសង្រ្គោះយើង ។ ឧទាហរណ៍នៅពេលគ្រួសាររបស់ ណូអេ ត្រូវបានជួយសង្គ្រោះពីទឹកជំនន់នៅក្នុងទូកធំឬនៅពេលដែល យ៉ូណាស ត្រូវបានផ្តល់ពេលវេលាដើម្បីប្រែចិត្តពេលនៅក្នុងពោះត្រីបាឡែន ។ ព្រឹត្តិការណ៍ទាំងនេះអាចរម្លឹកយើងថាព្រះអង្គសង្គ្រោះអាចនាំយើងឆ្លងកាត់ព្យុះជីវិត ហើយប្រទានឱកាសដល់យើងដើម្បីដើរនៅលើផ្លូវត្រូវត្រឡប់ទៅវិញ ។ ( សូមមើល លោកុប្បត្តិ ៧:១; យ៉ូណាស ១:១៧ ) ។
៣. ខគម្ពីរដែលព្យាករណ៍ពីការប្រសូតរបស់ព្រះយេស៊ូវគ្រីស្ទ ។
នៅសព្វថ្ងៃនេះយើងទន្ទឹងរង់ចាំ និងរៀបចំខ្លួនសម្រាប់ការយាងមកជាលើកទីពីររបស់ព្រះយេស៊ូវគ្រីស្ទ ។ នៅក្នុងវិធីស្រដៀងគ្នានេះដែរ ព្យាការីនៃគម្ពីរសញ្ញាចាស់បានទន្ទឹងរង់ចាំ និងសរសេរអំពីការយាងមកលើកដំបូងរបស់ទ្រង់ នៅពេលដែលគាត់បានកើតនៅលើផែនដី ។ ឧទាហរណ៍ ៖
-
ព្យាការីមួយរូបដែលមានឈ្មោះថា បាឡាម បានពិព៌ណាពីរបៀបដែល « មានផ្កាយមួយចេញពីពួកយ៉ាកុបមក » ( ជនគណនា ២៤:១៧ ) ។ នេះមានន័យថាព្រះអង្គសង្រ្គោះនឹងប្រសូតចេញពីពូជពង្សរបស់យ៉ាកុប ( ឬអ៊ីស្រាអែល ) ។
-
ព្យាការីមួយរូបដែលមានឈ្មោះថា ណាថាន់ បានទូលទៅស្តេច ដាវីដ ថាព្រះយេស៊ូវគ្រីស្ទនឹងប្រសូតចេញពីពូជពង្សរបស់ដាវីដ—ថាពូជអំបូររបស់លោកនឹងត្រូវស្ថាបនាឡើង « បល្ល័ង្កនៃរាជ្យវា ឲ្យនៅស្ថិតស្ថេរជាដរាបទៅ » ( សាំយូអែល ទី២ ៧:១៣ ) ។
-
ព្រះគម្ពីរ អេសាយ បានសរសេរការពិពណ៌នាដ៏មានប្រជាប្រិយភាពក្នុងព្រះគម្ពីរសញ្ញាចាស់អំពីព្រះអង្គសង្រ្គោះ ។ ពាក្យសម្តីភាគច្រើនត្រូវបានប្រើជាទំនុកច្រៀងនៅក្នុងក្រុមភ្លេង ហែនឌែល មែស៊ី ដែលតែងតែច្រៀងនៅក្នុងពិធីបុណ្យគ្រីស្ទម៉ាស់ ។ ( សូមមើល អេសាយ ៧; ៩; ៤០; ៥៣ ) ។
ដោយការអនុវត្តបន្តិចបន្តួច នោះប្អូននឹងរកឃើញព្រះយេស៊ូវគ្រីស្ទនៅទូទាំងព្រះគម្ពីរសញ្ញាចាស់ទាំងមូល ។ ទ្រង់សព្វព្រះទ័យ ប្អូន ជាពិសេស គឺដូចជាទ្រង់សព្វព្រះទ័យនឹងលោកអ័ដាម និងនាងអេវ៉ា អើរ៉ុន និង ម៉ារាម៣—ហើយមានអ្នកផ្សេងទៀតជាច្រើនដែលទ្រង់បានបម្រើដោយផ្ទាល់នៅក្នុងដំណើររឿងដ៏បំផុសគំនិតពីបុរាណទាំងនេះ ។ ដោយមានជំនឿលើព្រះយេស៊ូវគ្រីស្ទ និងដោយមានជំនួយពីគ្នាទៅវិញទៅមក ការណ៍នេះនឹងក្លាយជាឆ្នាំសិក្សាព្រះគម្ពីរដ៏អស្ចារ្យមួយ!