« ការយកឈ្នះលើឧបាយកលរបស់សាតាំង » ដើម្បីកម្លាំងនៃយុវជន ខែ មករា ឆ្នាំ ២០២២ ។
ចូរមកតាមខ្ញុំ
ការយកឈ្នះ លើឧបាយកលរបស់សាតាំង
សាតាំងធ្វើអ្វីៗគ្រប់យ៉ាងដែលវាអាចដើម្បីបញ្ឆោតយើង ។ យើងមានអំណរគុណណាស់ដែលមានជំនួយដ៏ទេវភាពដើម្បីរួចផុតពីអន្ទាក់របស់វា ។
អ្នកលេងសៀករហ័សកម្មផ្ទាត់ម្រាមដៃរបស់គាត់ ហើយកូនបាល់ក៏បាត់ទៅភ្លាមនៅចំពោះមុខរបស់បងប្អូន ។
អស្ចារ្យណាស់ !
បន្ទាប់មកគាត់ចាប់ទាញយកសត្វទន្សាយចេញពីមួកដែលគ្មានអ្វីសោះនោះ ហើយធ្វើឲ្យអ្វីមួយអណ្តែតខ្លួនឡើង ។
អស្ចារ្យ ! តើអ្នកលេងសៀករហ័សកម្មធ្វើបានដោយរបៀបណា ?
អ្នកលេងសៀករហ័សកម្មបានរិះរកវិធីដើម្បីធ្វើឲ្យមនុស្សជឿថាពួកគេបានធ្វើជាសាក្សីដល់អ្វីដែលមិនអាចធ្វើទៅបាន តាមពិតពួកគេបានឃើញតែអ្វីដែលអ្នកលេងសៀករហ័សកម្មចង់ឲ្យពួកគេមើលឃើញប៉ុណ្ណោះ ។
មែនហើយ ! អ្នកលេងសៀករហ័សកម្ម តាមពិតទៅ មិនបានមើលឃើញជំនួយការរបស់គេតែពាក់កណ្តាលខ្លួននោះទេ ។ ពួកគេរកវិធីឆ្លាតវៃដើម្បីបញ្ឆោតភ្នែកយើងឲ្យគិតថាយើងបានឃើញអ្វីមួយដែលតាមពិតមិនបានកើតឡើយ ។ អាថ៌កំបាំងស្ថិតនៅក្នុងការបំភាន់ និងការបោកបញ្ឆោត ។
ទោះបីវាធ្វើឡើងសម្រាប់ការសប្បាយ និងការកម្សាន្តក៏ដោយ ក៏ការបំភាន់ និងការបោកបញ្ឆោតផ្សេងទៀតមានគ្រោះថ្នាក់—ដល់ខាងរូបកាយ និងខាងវិញ្ញាណផងដែរ ។
មនុស្សមានឧបាលកល និងមនុស្សបោកបញ្ឆោតដ៏គ្រោះថ្នាក់
សាតាំងគឺជាសត្រូវនៃមនុស្សសុចរិតទាំងអស់ និងមិនចង់ឲ្យមនុស្សណាម្នាក់ធ្វើតាមព្រះវបិតា និងព្រះយេស៊ូវគ្រីស្ទឡើយ ។ វាចង់ឲ្យយើងវេទនាដូចជាវាដែរ ( សូមមើល នីហ្វៃទី ២ ២:២៧ ) ។
ដើម្បីសម្រេចបានកិច្ចការនេះ វាធ្វើអ្វីគ្រប់យ៉ាងដែលវាអាចដើម្បីធ្វើឲ្យយើងសង្ស័យ ឬមិនអើពើនឹងសេចក្តីពិតដ៏នៅអស់កល្បជានិច្ច ។ វាធ្វើការឥតឈប់ឈរដើម្បីបំភាន់យើងឲ្យជឿថា ល្អថាអាក្រក់ និង អាក្រក់ថាល្អ ( សូមមើល អេសាយ ៥:២០ ) ។ នេះហើយជាមូលហេតុដែលពេលខ្លះត្រូវបានស្គាល់ថាជា បិតានៃអស់ទាំងការកុហក និងដើម្បី បញ្ឆោត ( សូមមើល ម៉ូសេ ៤:៤ ) ។ ហើយវាបានធ្វើបែបនេះជាយូរយាណាស់មកហើយ ។
ការធ្លាក់
នៅក្នុងសួនច្បារអេដែន ព្រះបានប្រាប់ទៅលោកអ័ដាម និងនាងអេវ៉ាមិនឲ្យបរិភោគផ្លែឈើនៃការដឹងខុសត្រូវឡើយ ។ បើពួកគាត់បរិភោគ នោះពួកគាត់នឹងត្រូវចាកចេញពីសួនច្បារអេដែន ហើយនៅទីបំផុតនឹងស្លាប់ ។ ប៉ុន្តែព្រះបានប្រាប់ពួកគាត់ថា ពួកគាត់អាចធ្វើការជ្រើសរើសបាន ( សូមមើល ម៉ូសេ ៣:១៦–១៧ ) ។
សាតាំងចង់បំផ្លាញផែនការរបស់ព្រះ ។ វាបានព្យាយាមល្បួងនាងអេវ៉ា ឲ្យបរិភោគផ្លែឈើហាមឃាត់ ។ វាបានកុហក ហើយនិយាយថានាងនឹងមិនស្លាប់ឡើយ ( ដែលផ្ទុយទៅនឹងអ្វីដែលព្រះបានមានព្រះបន្ទូល ) ។ វាក៏បានព្យាយាមប្រាប់នាងពីសេចក្តីពិតតែពាក់កណ្តាលដែរ ( សូមមើល ម៉ូសេ ៤:១១ ) ។
នៅទីបំផុត ទាំងលោកអ័ដាម និងនាងអេវ៉ា បានបរិភោគផ្លែឈើ ហើយក៏ត្រូវបានបណ្តេញចេញពីវត្តមានរបស់ព្រះ ។ ព្រះគម្ពីរហៅការណ៍នេះថា « សេចក្តីស្លាប់ខាងវិញ្ញាណ » ។ ពួកគាត់ក៏បានប្រែជាមានជីវិតអមតៈ ដែលនោះមានន័យថាពួកគាត់នឹងត្រូវស្លាប់ខាងសាច់ឈាម ។ ការណ៍នេះត្រូវបានហៅថា ការធ្លាក់ ។
យើងក៏ជាកូនចៅរបស់លោកអ័ដាម និងនាងអេវ៉ា ផងដែរ ដែលត្រូវបានបំបែកចេញពីវត្តមានរបស់ព្រះ ហើយនឹងត្រូវដកពិសោធន៍សេចក្តីស្លាប់ខាងវិញ្ញាណ ។ យើងក៏ត្រូវសាកល្បងដោយការលំបាកក្នុងជីវិត និងការល្បួងពីសាតាំងផងដែរ ។
ការណ៍នេះប្រហែលជាអ្វីៗទាំងអស់ដែលស្តាប់ទៅដូចជារឿងមិនល្អ ប៉ុន្តែការធ្លាក់គឺជាផ្នែកដ៏សំខាន់មួយនៃផែនការរបស់ព្រះវរបិតាសួគ៌ ។ ការធ្លាក់ផ្តល់ឱកាសឲ្យយើងរៀន និងរីកចម្រើនតាមរយៈការប្រើប្រាស់សិទ្ធិដើម្បីជ្រើសរើសធ្វើល្អ ។ ដោយសារព្រះយេស៊ូវគ្រីស្ទ និងដង្វាយធួនរបស់ទ្រង់ យើងទាំងអស់គ្នាអាចប្រែចិត្ត នៅពេលយើងមានអំពើបាប និងរៀបចំខ្លួនដើម្បីទទួលបានជីវិតដ៏នៅអស់កល្បជានិច្ច ។ អ្វីៗដែលបានកើតឡើងជាមួយការធ្លាក់ ព្រះយេស៊ូវគ្រីស្ទធ្វើឲ្យវាត្រឹមត្រូវ ។ សាតាំងមិនបានបញ្ឈប់ផែនការរបស់ព្រះទេ ។
ការយកឈ្នះលើឧបាយកលរបស់សាតាំង
សាតាំងបន្តព្យាយាមប្រើល្បិចដាក់យើង និងបញ្ឆោតយើងនៅសព្វថ្ងៃនេះ ។ នេះគឺជារបៀបមួយចំនួនដែលវាធ្វើ ៖
១. ការល្បួង
សាតាំងចូលចិត្តដាក់គំនិតមិនស្អាត និងអាក្រក់នៅលើផ្លូវរបស់យើង ។ វាចង់ឲ្យអ្វីៗទាំងអស់នេះចូលមកក្នុងគំនិត ហើយឲ្យយើងធ្វើតាមអ្វីៗទាំងនោះ ។ យើងអាចតទល់នឹងការល្បួងនេះដោយការប្រាប់ សាតាំងឲ្យចាកចេញ ( សូមមើលសារលិខិតរបស់អែលឌើរ ស្ទីវ៉ែនសុន នៅលើទំព័រ ៤ ) ។ ការការពារដ៏ធំបំផុតរបស់យើងប្រឆាំងនឹងការល្បួងគឺជាការអធិស្ឋានជានិច្ច ( សូមមើល អាលម៉ា ១៣:២៨; នីហ្វៃទី ៣ ១៨:១៥ ) ។ យើងក៏អាចអាន និងសិក្សាព្រះគម្ពីរផងដែរ ។ ការអាន និងការសិក្សានាំំឲ្យមានព្រះវិញ្ញាណនៅក្នុងដួងចិត្តយើង ធានាប្រាប់យើងនូវអ្វីដែរជាការពិត និងពង្រឹងយើងប្រឆាំងនឹងការល្បួងនាពេលអនាគត ។
២. ការកុហក និងការបោកបញ្ឆោត
ពេលខ្លះ សាតាំង ប្រាប់យើងបែបនេះ ៖ « ឯងមិនដែលធ្វើអ្វីត្រូវឡើយ » , « ឯងមានបាបច្រើនណាស់មិនអាចអភ័យទោសបានឡើយ » , « វាមិនអាចផ្លាស់ប្តូរបានឡើយ » ឬ « ឯងគ្មានតម្លៃទេ ហើយគ្មាននរណាខ្វល់ពីឯងឡើយ » ។
អ្វីៗទាំងអស់នេះជា ការកុហក ។ សូមកុំជឿវា ! នេះគឺជាការពិត ៖ ព្រះស្រឡាញ់បងប្អូន ហើយត្រេកអរចំពោះបងប្អូន ពីព្រោះបងប្អូនគឺជាបុត្ររបស់ទ្រង់ ។ បងប្អូនជាមនុស្សអស្ចារ្យ ! បងប្អូនមានសក្តានុពលច្រើន ហើយកាលណាបងប្អូនធ្វើតាមទ្រង់ នោះបងប្អូននឹងមានអនាគតភ្លឺថ្លា ! ទោះបីជាបងប្អូនមានកំហុសឆ្គង បងប្អូននៅតែអាចមានក្តីសង្ឃឹម ហើយដោយមានព្រះគ្រីស្ទអាចបង្វែររឿងគ្រប់យ៉ាងទៅជាល្អបាន ។
បងប្អូនអាចប្រាកដចិត្ត ថាសាតាំងនិយាយកុហកប្រាប់បងប្អូន ។ ដូច្នេះបងប្អូនក៏អាចទុកចិត្តព្រះវិញ្ញាណឲ្យប្រាប់បងប្អូននូវសេចក្តីពិតផងដែរ ( សូមមើល យ៉ាកុប ៤:១៣ ) ។ នោះគឺជាមូលហេតុមួយដែលវាមានសារៈសំខាន់ដើម្បីព្យាយាមឲ្យមានព្រះវិញ្ញាណគង់នៅជាមួយយើងជានិច្ច ។
យើងក៏អាចស្វែងរក និងតទល់នឹងការកុហករបស់ សាតាំង ដោយការអានព្រះគម្ពីរ និងសារលិខិតរបស់ថ្នាក់ដឹកនាំក្នុងសាសនាចក្រជាប្រចាំផងដែរ ។ បងប្អូនអាចស្វែងរកបទគម្ពីរ សម្តីដកស្រង់ដែលលើកស្ទូយដើម្បីរម្លឹកបងប្អូនពីសេចក្តីពិតដែលប្រឆាំងនឹងការកុហករបស់សាតាំង ។ បងប្អូនអាចទន្ទេញបទគម្ពីរ ឬដាក់តាំងបទគម្ពីរនៅកន្លែងណាមួយដែលបងប្អូនអាចមើលឃើញជាញឹកញាប់ ។
៣. អស់សង្ឃឹម
សាតាំងចូលចិត្តធ្វើឲ្យយើងមានអារម្មណ៍បាក់ទឹកចិត្ត ។ វាចង់ឲ្យយើងជឿថា អ្វីក៏ដោយដែលធ្វើឲ្យយើងបាក់ទឹកចិត្តនឹងធ្វើឲ្យយើងបាក់ទឹកចិត្តជារៀងរហូត ។ ប៉ុន្ដែនោះពុំមែនជារឿងពិតទាល់តែសោះ ។
អែលឌើរ ជែហ្វ្រី អ័រ ហូឡិន ក្នុងកូរ៉ុមនៃពួកសាវកដប់ពីរនាក់បានបង្រៀនថា សាតាំងចង់ឲ្យយើងជឿលើរឿងនេះ ដោយសារ « [ សាតាំង ] ដឹងថា វា ពុំអាចកែលម្អថា វា ពុំអាចរីកចម្រើន ថាពិភពទាំងឡាយដ៏គ្មានទីបញ្ចប់ វា នឹងពុំអាចមានពន្លឺនាថ្ងៃស្អែកទេ ។ វាគឺជាតួអង្គដ៏វេទនាមួយដែលបានចងដោយការដាក់កំហិតដ៏អស់កល្ប ហើយវាចង់ឲ្យបងប្អូនវេទនាដូចវាដែរ ។ មែនហើយ ចូរកុំចាញ់ការល្បួងវាឡើយ » ។១
ព្រះវរបិតាសួគ៌ និងព្រះយេស៊ូវសព្វព្រះទ័យឲ្យបងប្អូនមានភាពសប្បាយរីករាយ ។ ប្រសិនបើយើងងាកទៅរកទ្រង់ទាំងទ្វេ នោះទ្រង់ទាំងទ្វេអាចជួយបងប្អូនឲ្យតស៊ូនឹងការសាកល្បង ហើយស្វែងរកសេចក្តីសុខសាន្ត និងអំណរ ។
នៅទីបញ្ចប់យើងដឹងថានរណាជាអ្នកឈ្នះ
ព្រះអង្គសង្រ្គោះអញ្ជើញយើងឲ្យ « មើលទៅ [ ទ្រង់ ] ដោយនូវគ្រប់ទាំងគំនិត ចូរកុំសង្ស័យ កុំខ្លាចឡើយ » ( គោលលទ្ធិ និង សេចក្តីសញ្ញា ៦:៣៦ ) ។ កាលណាយើងស្តាប់តាមការអញ្ជើញនេះ នោះព្រះគុណ និងព្រះចេស្តាដ៏ធួនរបស់ទ្រង់នឹងរឹងមាំជាងការល្បួងដើម្បីបញ្ឆោតយើងជានិច្ច ។ យើងមិនចាំបាច់ចាញ់ល្បិចរបស់សាតាំងឡើយ ។ យើងអាចមានភាពក្លាហាន និងកម្លាំងដើម្បីយកឈ្នះការល្បួងរបស់សាតាំង និងស៊ូទ្រាំឧបសគ្គក្នុងជីវិតបាន ។
Let Not Your Hearts Be Troubled ( ចូរកុំឲ្យដួងចិត្តបងប្អូនឈឺចាប់ ) ដោយ ហោវើត លីយ៉ន
ព្រះអង្គសង្គ្រោះមានបន្ទូលថា « ខ្ញុំជាពន្លឺលោកីយ៍ អ្នកណាដែលតាមខ្ញុំ នោះមិនដែលដើរក្នុងសេចក្តីងងឹតឡើយ គឺនឹងមានពន្លឺនៃជីវិតវិញ » ( យ៉ូហាន ៨:១២ ) ។ ទ្រង់មានបន្ទូលថា « ដោយសារខ្ញុំនៅលោកិយនេះ នោះអ្នករាល់គ្នាមានសេចក្តីវេទនាមែន ប៉ុន្តែត្រូវសង្ឃឹមឡើង ដ្បិតខ្ញុំបានឈ្នះលោកិយហើយ » ( យ៉ូហាន ១៦:៣៣ ) ។
ព្រះយេស៊ូវគ្រីស្ទអាចលើកស្ទួយយើងឡើង និងពង្រឹងយើងប្រឆាំងរាល់ល្បិចរបស់សាតាំងដែលព្យាយាមប្រើប្រឆាំងនឹងយើង ។ កាលណាយើងចងចាំព្រះអង្គសង្រ្គោះ និងការបង្រៀនរបស់ទ្រង់ នោះយើងអាចមើលឃើញល្បិច និងការបំភាន់របស់សាតាំង ហើយនិងមើលឃើញ « ការណ៍ដែលពួកគេពិតជាមាន » ( យ៉ាកុប ៤:១៣ ) ។