“ʻOku Ou ʻIlo Hoku Mahuʻingá,” Ki Hono Fakamālohia ʻo e Toʻu Tupú, Sānuali 2022.
Ko e Kaveingá mo Au
ʻOku vahevahe ʻe he toʻu tupú ʻa e founga ʻoku nau moʻui ʻaki ai e ngaahi fakalea ʻa e Ongo Kaveinga ʻo e Kau Finemuí mo e Kōlomu ʻo e Lakanga Taulaʻeiki Faka-ʻĒloné
ʻOku Ou ʻIlo Hoku Mahuʻingá
“Ko ha ʻofefine ʻofeina au ʻo ha ongomātuʻa fakalangi.”
Faitā ʻa Christina Smith
ʻI ha ngaahi feituʻu lahi ʻi Samaika, kuo pau ke sivi-hū ʻa e fānau ako hangē ko aú ki he akoʻanga māʻolunga ʻoku nau fie ako aí. Naʻá ku ako mālohi mo hoku ngaahi kaungāmeʻá koeʻuhí ke mau lava kotoa ki he ako māʻolunga lelei tahá. ʻI he kamata ke u veiveiua pe te u lavaʻi iá, naʻe fakalotolahiʻi maʻu pē au ʻe heʻeku faʻeé. Naʻá ne fakamanatu mai ko e taha au e fānau ʻa e Tamai Hēvaní pea te Ne tokoniʻi au ke u ʻalu ʻi he hala totonú.
ʻI he taimi naʻe maʻu ai e ola ʻo ʻeku siví, naʻá ku maʻu ʻa e maaka māʻolunga taha ne u lava ʻo maʻú! Naʻá ku fuʻu fiefia ʻaupito koeʻuhí he naʻe ʻuhinga ia te u lava ʻo fakataha mo hoku ngaahi kaungāmeʻá kotoa!
Ka naʻe ʻikai fuoloa kuó u ʻilo naʻe ʻi ai ha taha ʻo hoku ngaahi kaungāmeʻá naʻe ʻikai lava ʻene māká. Naʻa mau loto-mamahi kotoa ʻi he ʻikai ke ne lava ʻo haʻu mo kimautolú. Ka naʻá ku fiefia ʻi heʻeku manatuʻi ʻa e meʻa ne akoʻi mai ʻe heʻeku faʻeé. ʻOku hoko foki hoku kaungāmeʻá ko ha ʻofefine fakaʻofoʻofa ia ʻo e Tamai Hēvaní, pea ʻe tatau ai pē pe ko e hā e ola ʻo e siví, te Ne kei tokoniʻi pē ia.
Naʻe mōlia atu ʻeku fiefiá he taimi naʻe kamata ke tala holo ai ʻe hoku kaungāmeʻá ki he tamaikí naʻe ʻikai totonu ke u lava ki he ako māʻolunga ko iá—ka ko ia naʻe totonu ke ne lava ki aí. Ko e tokolahi taha hoku ngaahi kaungāmeʻá naʻa nau kau mo ia pea ʻikai ke nau toe feohi mo au. Naʻe kamata ke u veiveiua ʻiate au. Naʻe totonu nai ke u lava ki he ʻapiakó?
Naʻá ku fakakaukau ki he meʻa naʻe akoʻi mai ʻe heʻeku faʻeé: ko ha fānau makehe au ʻi he ʻīmisi ʻo e Tamai Hēvaní.
ʻOku ou ʻi he ʻapiako foʻoú he taimí ni, pea kuó u maʻu ha ngaahi kaungāmeʻa foʻou. ʻOku nau poupouʻi au mo fakamanatu mai hoku mahuʻingá. Kuó u ako ʻoku ʻikai mahuʻinga pe ko e hā e lau ʻa e niʻihi kehé ʻo kau kiate aú. ʻOku ou fiefia ʻi heʻeku feinga ke aʻusia e tuʻunga ʻoku finangalo e ʻOtuá ke u aʻusiá—he ko e tuʻunga ia ʻoku ou loto ke u aʻusiá.
ʻOku nofo ʻa e tokotaha naʻá ne faʻú ʻi Samaika.