“Ko Hotau Fakahinohino ki he Moʻoní,” Ki Hono Fakamālohia ʻo e Toʻu Tupú, Sānuali 2022.
Lea Fakaʻosí
Ko Hotau Fakahinohino ki he Moʻoní
Mei ha Lea ʻi he konifelenisi lahi ʻi ʻŌkatopa 2004.
Tā fakatātā ʻe Emily Davis
Mei ho tuʻunga ʻi he hala ʻo e moʻuí, ʻoku lahi ha ngaahi maile ke ke fononga ai mo ha ngaahi fili ke ke fai ʻi hoʻo feinga ke foki ki heʻetau Tamai Hēvaní. ʻOku lahi ha ngaahi fakaʻilonga ʻi he halá ʻokú ne kolea ho tokangá. Ko Sētane naʻá ne faʻu ha niʻihi ʻo e ngaahi fakaafe ko ʻení. ʻOkú ne feinga ke fakafihi mo kākaaʻi kitautolu, ke taki kitautolu ʻi ha hala faingofua ʻoku tāumamaʻo mei hotau ikuʻanga taʻengatá.
ʻOku ou fie vahevahe atu ʻa e founga te ke lava ai ʻo fakaʻehiʻehi mei hano kākaaʻi koé. ʻUluakí, kuo akoʻi kiate koe ʻa e māʻoniʻoní mo fakapapauʻi atu ʻa hono moʻoní, ko ia, nofo maʻu ai. Piki maʻu ki he folofolá, ʻa ia ʻoku hoko ʻa hono ngaahi akonakí ke maluʻi kitautolu mei he koví. Uá, ʻoku ʻikai feʻunga ke maʻu pē ʻa e moʻoní. Kuo pau foki ke tau maʻu “ʻa e Laumālie Māʻoniʻoní ke hoko ko [hotau] fakahinohino” pea “ʻikai kākaaʻi ʻa [kitautolu]” (Tokāteline mo e Ngaahi Fuakava 45:57).
ʻOku founga fēfē ʻetau maʻu ʻa e Laumālie Māʻoniʻoní ko hotau fakahinohinó? Kuo pau ke tau fakatomala mei heʻetau ngaahi angahalá pea fakafoʻou ʻetau ngaahi fuakavá ʻaki ʻetau maʻu ʻa e sākalamēnití ʻi he uike takitaha ʻaki ha nima mo ha loto ʻoku maʻá. Ko e founga pē ʻeni ʻe lava ke tau maʻu ai ʻa e palōmesi fakalangi ʻe “ʻiate [kitautolu] maʻu ai pē ʻa hono Laumālié” (Tokāteline mo e Ngaahi Fuakava 20:77). Ko e Laumālie ko iá ʻa e Laumālie Māʻoniʻoní, ʻa ia ko Hono misioná ke fakamoʻoniʻi ʻa e Tamaí mo e ʻAló, ke akoʻi kitautolu, pea ke tataki kitautolu ki he moʻoní.