“ʻOku ʻAʻaku ʻa Kinautolu Peá U ʻIloʻi ʻa Kinautolu,” Ki Hono Fakamālohia ʻo e Toʻu Tupú, Sānuali 2022.
Haʻu, ʻo Muimui ʻIate Au
“ʻOku ʻAʻaku ʻa Kinautolu Peá U ʻIloʻi ʻa Kinautolu”
Laʻitā mei he Getty Images
Kuó ke ongoʻi nai ʻoku ʻikai haʻo mahuʻinga? Mahalo kuó ke ongoʻi peheni ʻi he taimi kuó ke fakakaukau ai ki he tokolahi ʻo e kakai ʻi he māmaní pe sio ki he lahi ʻo e ngaahi fetuʻu ʻi he langí. Kuó ke fifili nai pe ʻoku ʻafioʻi moʻoni nai koe ʻe he ʻOtuá mo e anga hoʻo moʻuí? Kapau ʻoku pehē, pea ʻoku ʻi ai ha pōpoaki ʻa Mōsese maʻau.
ʻI ha mata meʻa-hā-mai, naʻe fakahā ai ʻe he ʻOtuá kia Mōsese ʻa e kihiʻi konga kotoa pē ʻo e māmaní pea mo e kakai kotoa pē ʻe nofo aí. Naʻa nau “taʻefaʻalaua ʻo hangē ko e ʻoneʻone ʻi he matātahí” (Mōsese 1:28). Naʻe folofola leva ʻa e ʻOtuá kia Mōsese kuó Ne fakatupu ha “ngaahi māmani taʻefaʻalaua”(Mōsese 1:33)—ʻoku mahulu atu ʻEne ngaahi fakatupú mei he māmani ko ʻení.
Mahalo naʻe ongoʻi lōmekina ʻa Mōsese ʻi heʻene mamata ki he ngaahi meʻa kotoa ko ʻení. Mahalo naʻá ne fifili: ʻOku ou hao nai ʻi fē ʻi he ngaahi fakatupu lahi peheé? Pea ʻoku lava fēfē ʻe he ʻOtuá ʻo muimuiʻi ʻa e fuʻu meʻa lahi pehē?
Naʻe mahinongofua pē e tali ʻa e ʻOtuá: “ʻOku malaua ʻa e ngaahi meʻa kotoa pē kiate au.” ʻO fēfē? “ʻOku ʻaʻaku ʻa kinautolu peá u ʻiloʻi ʻa kinautolu” (Mōsese 1:35). Naʻe ʻafioʻi ʻe he ʻOtuá ko hai ʻa Mōsese, ʻo hangē pē ko ʻEne ʻafioʻi kotoa ʻEne fānaú, kae pehē foki ki Heʻene ngaahi fakatupú kotoa pē. ʻOku ʻAʻana kotoa kinautolu—ʻa e ngaahi fetuʻú, ʻoneʻoné, kae tautautefito ki Heʻene fānau he māmaní. Ko kinautolu ʻa e tefitoʻi ʻuhinga naʻá Ne ngaohi ai ʻa e māmaní. Ko honau fakamoʻui taʻengatá ʻa e ngāue mahuʻinga taha ʻa e ʻOtuá.
“He vakai, ko ʻeku ngāué ʻeni mo hoku nāunaú—ke fakahoko ʻa e moʻui taʻe-faʻa-mate mo e moʻui taʻengata ʻa e tangatá” (Mōsese 1:39).
Hangē pē ko e ʻilo ʻe Mōsese ʻa hono tuʻunga ʻi he palani ʻa e ʻOtuá, ʻe lava foki ke ke fakapapauʻi ʻoku ʻafioʻi koe ʻe he ʻOtuá! Ko ʻEne ngāué mo Hono nāunaú ke tokoniʻi koe ke ke foki kiate Ia. Ko e hā hono ʻuhingá? Koeʻuhí he ʻoku ʻAʻana koe. Pea ʻoku ʻikai ha meʻa ia ʻe taʻemahuʻinga ai!