“Ngaahi Fehuʻí mo e Talí,” Ki Hono Fakamālohia ʻo e Toʻu Tupú, Sānuali 2022.
Ngaahi Fehuʻi mo e Talí
“ʻOku ʻikai ke u faitatau fēfē mo e tamaiki ʻi heʻeku kulupu toʻu tupú. Ko e hā ha founga ke u ongoʻi fehokotaki lelei ange ai mo kinautolu?”
Tokoniʻi ha Taha
“ʻOku ou ongoʻi vāofi ange mo e niʻihi kehé ʻi he taimi ʻoku ou feinga moʻoni ai ke feohi fakafoʻituitui mo kinautolú, kae ʻikai ko e ngaahi fakakulupú pē. Kapau ʻokú ke fie fekumi ki ha taha ke feohi mo ia, tokoni ki ha taha ʻoku hangē ʻokú ne fie maʻu ha kaungāmeʻá. Mahalo ʻe iku lahi ange lelei te ke maʻú ʻi he meʻa te nau maʻú!”
Latiana P., 17, Singapoa
Vahevahe e Ngaahi Meʻa ʻOkú Ke Saiʻia Aí
“Ko e tokolahi taha ʻa e tamaiki ʻi heʻeku kulupu toʻu tupú ʻoku kehekehe e ngaahi meʻa ʻoku nau saiʻia aí. ʻOku ou saiʻia ke fehuʻi kiate kinautolu fekauʻaki mo e ngaahi meʻa ʻoku nau saiʻia aí he ʻoku fakahaaʻi ai ʻeku tokanga kiate kinautolú. ʻOku nau maʻu leva ai ha faingamālie ke fehuʻi fekauʻaki mo e ngaahi meʻa ʻoku ou saiʻia aí. ʻOku fie maʻu ha taimi lahi ke fetuʻutaki ai mo e kakaí—toutou feinga pē!”
ʻElini F., 18, ʻIutā, USA
Feinga ke Maʻu e Mahino Tatau
“Kapau ʻokú ke fie vāofi ange mo haʻo ngaahi kaungāmeʻá, fekumi ki ha ngaahi meʻa lelei mo ʻuhingamālie te mou lava ʻo fakahoko fakataha, neongo kapau ʻoku siʻisiʻi pē ia. Te ke lava ʻo fekumi ki ha fakamānako pe ko ha ngāue ʻoku mou saiʻia kotoa aí. Kole ha tokoni mei he Tamai Hēvaní, pea te Ne ʻoatu ha ueʻi fakalaumālie.”
Kala V., taʻu 12, Pelū
Houngaʻia ʻi Hoʻo Ngaahi Faikehekehé
“Ko e lahi ange ʻeku feohi mo e tamaiki ʻi heʻeku kulupu toʻu tupú, ko e lahi ange ia ʻeku saiʻia he meʻa ʻoku makehe ʻiate kinautolú! ʻOku ou ako ʻa e founga ke tokoniʻi lelei ange ai kinautolú, ʻa ia ʻoku tokoni ia ke u ofi ange kiate kinautolu pea mo Sīsū Kalaisi. Ko e fānau kotoa kitautolu ʻa ʻetau Tamai Hēvaní, ko ia ʻoku lahi ange e meʻa ʻoku tau faitatau aí ʻi he meʻa ʻoku tau fakakaukau atu ki aí.”
Selai M., 16, ʻOlikoni, USA
ʻAhiʻahiʻi ha Ngaahi Meʻa Foʻou
“Anga fakakaumeʻa pē pea hokohoko atu hoʻo talanoa kiate kinautolú. Toutou ʻahiʻahiʻi ha ngaahi meʻa foʻou ke lahi ange ai hoʻo kau atú. ʻOku ʻi ai ha kiʻi tamasiʻi ʻi homau uōtí ʻoku ʻikai ke saiʻia ʻi he sipotí, ka ʻokú ne vaʻinga maʻu pē mo kimautolu. Pea ʻoku mau fai leva e ngaahi meʻa ʻokú ne saiʻia aí, hangē ko e faimaná pe tolo kātí. Ko e ʻahiʻahiʻi ko ia e ngaahi meʻa foʻoú ko ha founga lelei ia ke ongoʻi ʻokú te fehokotaki.”
Sāleni M., 17, Nova Sikoutiá, Kānata
Alanima Atu
“Alanima atu ʻo tokoniʻi ha taha ʻi hoʻo kulupu toʻu tupú ʻokú ne foua ha taimi faingataʻa. ʻI he taimi ʻoku tau feinga ai ke hoko ko ha faʻifaʻitakiʻanga ʻo e ʻofa ʻa e Fakamoʻuí, ʻe tokoni ia ke tau toe vāofi ange ai mo e niʻihi kehé.”
Sōsiua C., taʻu 20, Faleniu, Haʻamoa ʻAmelika
Fai Pē ho ʻUlungaanga Totonú
“Mahalo ʻe ʻalu pē taimí mo hoʻo ʻiloʻi e ngaahi meʻa ʻoku mou faitatau aí, kae mahalo he ʻikai hoko ia he taimi pē ko iá. Lolotonga iá, te mou lava ʻo langaki ha vā fetuʻuaki ʻaki hano fai ha ngaahi ʻekitivitī mo e ngaahi meʻa ʻoku hoko he lolotonga ʻo e uiké. Fiefia ʻi he ngaahi ʻekitivitií! Fili ke ke kau atu, peá ke fai pē ho anga totonú!”
Hena W., taʻu 18, Nova Sikoutia, Kānata