“Falala ki he ʻEikí,” Ki Hono Fakamālohia ʻo e Toʻu Tupú, Sānuali 2022.
Falala ki he ʻEikí
ʻOku fakaafeʻi koe ʻe he ʻOtuá ke ke falala kiate Ia ʻi he meʻa kotoa pē.
ʻI he taimi ʻe niʻihi ʻoku hoko ai e ngaahi faingataʻá, ʻoku tau fifili pe te tau falala nai ki ha taha, kau ai e ʻOtuá. ʻOku tau manavasiʻi naʻa kau foki mo Ia ʻi hono fakalotomamahiʻi kitautolú. Ko e meʻa ʻoku sai aí he ʻoku ʻofa haohaoa ʻa e ʻOtuá ʻiate kitautolu. ʻOkú Ne angaʻofa mo faitāpuekina mo faitotonu. ʻOkú Ne taʻefeliliuaki mo falalaʻanga.
Pea ʻoku tuʻunga ʻi he meʻa ko iá ʻa ʻetau lava ʻo falala kiate Ia ʻo tatau ai pē pe ko e hā. Ko e kaveinga ʻa e toʻu tupú ki he taʻu ní ko e “Falala [ki he ʻEikí]” (Lea Fakatātā 3:5–6).
Ko e ngaahi sīpinga ʻeni ʻo e founga ne takitaha falala ai ʻa kimautolu ʻi he Kau Palesitenisī Lahi ʻo e Kau Finemuí mo e Kau Talavoú, ki he ʻEikí.
Michelle D. Craig
Bonnie H. Cordon
Rebecca Craven
Falala ki he Ngaahi Taumuʻa ʻa e ʻOtuá
ʻI ha ngaahi ʻaho siʻi kimuʻa pea hoko hoku taʻu 16, naʻe hiki hoku fāmilí ki he tafaʻaki ʻe taha ʻo e fonuá. Ne u pehē ko ha taimi hala ‘aupito ia! ʻI heʻeku manatu ki he meʻa ne hokó, ʻoku lava ke mahino lelei kiate au ko e niʻihi ʻo e ngaahi tāpuaki maʻongoʻonga taha ki homau fāmilí mo aú naʻe tupu ia mei heʻemau hiki ko ia ʻi heʻeku kei taʻu hongofulu tupú. Mahalo he ʻikai mahino kiate kitautolu e taimi ʻa e ʻEikí ʻi he momeniti ko iá, ka ʻoku tau falala kiate Ia he ʻe lava ke tau falala ki Hono lotó mo ʻEne ngaahi taumuʻá.
Michelle D. Craig
Falala ki he Taimi ʻa e ʻEikí
Koeʻuhí ko hono uiuiʻi ʻeku tamaí ke hoko ko ha palesiteni fakamisioná, ne maʻu ai mo hoku uiuiʻi ke u ʻalu ʻo ngāue fakafaifekau kimuʻa ʻi he taʻu angamaheni ki he kau faifekau sisitaá. Naʻe ʻuhinga ia te u hū ki he senitā akoʻanga fakafaifekaú kimuʻa peá u ʻosi mei he ako māʻolungá. Kiate au, naʻe ʻikai mahino ʻa e taimí, ka naʻá ku maʻu ha fakamahino mālohi fakalaumālie ke falala ki he ʻEikí. Naʻá ku fai ia, pea naʻe lelei ʻaupito ʻa e meʻa kotoa.
ʻOku ʻuhinga ʻa e falala ki he ʻEikí ke laka ki muʻa neongo ʻoku ʻikai fuʻu mahino ʻa e halá.
Bonnie H. Cordon
Falala ki he ʻOtuá he Ngaahi Taimi Faingataʻá
ʻI heʻeku tupu haké, naʻe ngāue maʻuʻanga moʻui ʻeku tamaí ko ha ʻōfisa ʻi he Tau Maluʻi Fonuá. Ko e meʻa pē naʻe ʻikai sai ʻi heʻene ngāué ko e pau ke ne ʻalu ki he taú. Naʻá ku taʻu 13 he taimi naʻe mavahe tuʻo ua ai ʻeku tangataʻeikí ki Vietinemí. Naʻe haʻu maʻu pē ki heʻeku fakakaukaú ʻa e manavahē naʻa ʻikai ke ne toe foki maí, ka naʻe pehē foki mo ʻeku falala ki he ʻEikí. Kimuʻa pea mavahe ʻeku tangataʻeikí, naʻá ne foaki mai ha tāpuaki fakaetamai ʻo fakapapauʻi mai ʻe ʻiate au ʻa e ʻEikí mo tokoniʻi au lolotonga e mamaʻo ʻeku tangataʻeikí. Ne u ongoʻi nonga. Neongo naʻe ʻikai ke u ʻiloʻi fakapapau ʻe foki lelei mai ʻeku tangataʻeikí ki ʻapi, ka naʻá ku falala ʻe lelei pē ʻa e meʻa kotoa, neongo pe ko e hā e meʻa ʻe hokó.
Rebecca Craven
Ahmad S. Corbitt
Steven J. Lund
Bradley R. Wilcox
Fakafalala Koe ki he ʻOtuá
ʻI heʻeku kau ki he Siasí ʻi hoku taʻu hongofulu tupú, naʻá ku fakakaukau ke foaki ʻeku moʻuí, taimí, mo hoku lotó ki he ʻEikí. Neongo naʻe kiʻi ongo fakailifia ʻa e faʻahinga tukupā tuʻuloa ko iá, ka naʻá ku ʻilo naʻe totonu ia. Naʻá ku ongoʻi ko e finangalo ʻeni ʻeku Tamai Hēvaní maʻakú, pea naʻá ku maʻu ha nonga ʻi hono fakahoko iá. ʻOku ou fiefia ʻi heʻeku fili ke falala ki he ʻOtuá pea tuku ke Ne ikuna ʻi heʻeku moʻuí. ʻOku ou ʻilo pau kapau ne u fakafalala pē ki he mahino ne u maʻú, he ʻikai ke mei mohu nēkeneka, fiefia, mo nonga ʻeku moʻuí.
Ahmad S. Corbitt
Falala ki he Ueʻi Fakalaumālie ʻa e ʻEikí
Hili ʻeku ngāue fakafaifekaú, naʻe ueʻi au ke u hū ki he ngāue fakakautaú kae ʻoua te u toe foki ki he ʻunivēsití. ʻOku ʻikai ko ha meʻa ʻeni ia ne u fie fakahoko. Naʻá ku ongoʻi puputuʻu, ka kuó u ako ke falala ki he ʻOtuá, pea naʻá ku maʻu ha tui feʻunga ke fanongo kiate Ia mo talangofua. Naʻá ku hoko ko ha sōtia ʻi ha taʻu ʻe tolu.
Naʻe lahi ha ngaahi meʻa lelei ne hoko ʻi heʻeku moʻuí naʻe haʻu mei he fili ko iá, ʻo kau ai ʻeku fetaulaki mo hoku uaifí.
Steven J. Lund
Falala ki he Ngaahi Ueʻi ʻa e ʻOtuá ke Ngāue he Taimí Ni
Hili ʻeku faiako he kalasi onó ʻi ha taʻu ʻe tolu, ne u ʻilo kapau te u faiako ʻi ha toe taʻu ʻe fā, ʻe totongi ʻe he vāhenga akó ha konga ʻo ʻeku totongi akó ke maʻu hoku mataʻitohi MA. Naʻe hangē ia ha palani leleí—ka naʻe ueʻi au ʻe he Laumālié ke u fakafisi mei heʻeku ngāué ka u foki ʻo ako ke maʻu hoku mataʻitohí he taimi pē ko iá. Ne maʻu ʻe hoku uaifí ha ueʻi tatau, pea ne ma hoko atu leva mei ai. Naʻe ʻuhinga ia ne pau ke ma totongi pē ʻe kimaua ʻa e akó. Ka koeʻuhí ko ʻema fakahoko iá, naʻe fakangāueʻi au ke u faiako ʻi BYU—Polovo. Naʻe ʻikai ke mei fakaʻatā mai e faingamālie ko iá kapau ne ma toe tatali ʻi ha taʻu ʻe fā. Naʻe ʻikai ke ma ʻilo pe naʻe mei fēfē, ka naʻe tataki ʻe he ʻEikí homa halá ʻo hangē pē ko e meʻa naʻá Ne talaʻofá.
Bradley R. Wilcox