“ʻOku ʻAfioʻi Au ʻe he Tamai Hēvaní,” Ki Hono Fakamālohia ʻo e Toʻu Tupú, Sānuali 2022.
Ko e Kaveingá mo Au
ʻOku vahevahe ʻe he toʻu tupú ʻa e founga ʻoku nau moʻui ʻaki ai e ngaahi fakalea ʻo e Ongo Kaveinga ʻa e Kau Finemuí mo e Kōlomu ʻo e Lakanga Taulaʻeiki Faka-ʻĒloné
ʻOku ʻAfioʻi Au ʻe he Tamai Hēvaní
“Ko ha foha ʻofeina au ʻo e ʻOtuá.”
ʻI he taimi naʻá ku nofo kemi ai mo ʻeku tangataʻeikí, naʻá ma feohi ʻi ha kiʻi vahaʻataimi he ʻikai toe ngalo ʻiate au. Ne ma kaka hake he tafaʻaki ʻo ha moʻunga kuo fuoloa e poʻulí peá ma maʻu ha feituʻu ke ma tangutu ai. ʻI heʻema sio hake ki he langí he pō ko iá, ne ʻākilotoa kimaua ʻe he ngaahi fetuʻu ngingila taha kuó u mamata ki aí. Ne fuoloa ʻema tangutu fakatahá ʻo fakahingoa taha taha ʻa e ʻū palanité mo e ngaahi pupunga fetuʻú.
ʻI heʻeku sio atu ki he ʻunivēsí ʻi muʻa ʻiate aú, naʻá ku ongoʻi siʻisiʻi mo taʻe mahuʻinga. Naʻe ʻikai ke u lava ʻo fakakaukauloto atu pe ko e ʻū palanite nai ʻe fiha ʻoku ʻi aí—“ngaahi maama ʻoku ʻikai hano ngataʻanga,” ko ia koā? Ko e hā nai au ʻo fakatatau mo e ʻū meʻa kotoa ko iá?
Naʻá ku ʻeke ki heʻeku tangataʻeikí pe ʻoku ʻi ai nai ha toe moʻui kehe ʻi he ʻunivēsí, ne u ʻosi ongoʻi lōmekina ʻi he foʻi fakakaukau ko iá. Pau pē naʻá ne ʻiloʻi ʻeku fakakaukaú, he naʻá ne pehē mai: “Ko e meʻa ʻeni ʻoku ou ʻiló. ʻOku lahi e ngaahi meʻa ne fakatupu ʻe he Tamai Hēvaní, hangē ko ia ʻokú ke sio ki aí. Ka ʻi he kotoa ʻo ʻEne ngaahi fakatupú, ʻokú Ne ʻofa ʻiate koe fakafoʻituitui.
“ʻOkú Ne ʻafioʻi e meʻa kotoa pē ʻokú ke fouá pea ʻokú Ne finangalo lahi ange ke Ne hoko ko ha konga hoʻo moʻuí. ʻOkú Ne finangalo ke ke maʻu ʻa e fiefiá mo tokoniʻi koe ke ke toe foki hake ʻo nofo mo Ia ʻo taʻengata.”
Naʻá ku kei ongoʻi taʻe mahuʻinga pē ʻi he malumalu ʻo e langi kilukilua ko iá, ka naʻá ku tui ki he fakamoʻoni ʻeku tangataʻeikí. Naʻá ku mahuʻinga ki he Tamai Hēvaní. Pea naʻá Ne finangalo ke fakakau Ia heʻeku moʻuí.
Naʻá ku manatuʻi ʻa e meʻa naʻe akoʻi mai ʻe Palesiteni Dieter F. Uchtdorf, ko e Tokoni Ua he taimi ko iá ʻi he Kau Palesitenisī ʻUluakí: “Ko ha lea fakatātā ʻeni kau ki he tangatá: ko e meʻa noa pē ʻa e tangatá ʻi hono fakafehoanaki ki he ʻOtuá; neongo iá, ʻoku tau mahuʻinga lahi ki he ʻOtuá.”1
Hangē ko e langi fetuʻuʻia ko iá, ʻoku ʻikai hano ngataʻanga ʻa e ngaahi fakatupu ʻa e ʻOtuá—ka ʻoku pehē pē foki mo ʻEne ʻofa ki Heʻene fānaú takitaha. Kiate kitautolu takitaha. ʻOku ou faʻa fakakaukau he taimi ʻe niʻihi ki he taimi ko ia ne u tangutu ai ʻi ha moʻunga ʻo ofoofo ʻi he fifilí. Mahalo ko ha meʻa noa pē au ʻi hono fakafehoanaki ki he ʻOtuá, ka ʻoku ʻikai ke Ne fakakaukau pehē. Ko Hono foha au, pea ʻokú Ne ʻafioʻi au.
ʻOku nofo e taha naʻá ne faʻú ʻi Kalefōnia, USA.