Ko e Kaveingá mo Au

ʻOku vahevahe ʻe he toʻu tupú ʻa e founga ʻoku nau moʻui ʻaki ai e ngaahi fakalea ʻo e Ongo Kaveinga ʻa e Kau Finemuí mo e Kōlomu ʻo e Lakanga Taulaʻeiki Faka-ʻĒloné

ʻOku Lava Ke U Ongoʻi ʻEne ʻOfá

Fai ʻe Olivia Roberts

“Ko ha ʻofefine ʻofeina au ʻo ha ongomātuʻa fakalangi, mo ha natula faka-ʻOtua mo e ikuʻanga ta‘engata.”

ʻI hoku fuofua taʻu ʻi he ako māʻolungá, ne hoko ai ha palopalema ʻi heʻeku uʻa maʻu meʻatokoní ʻo ne puleʻi ai ʻeku moʻuí. Naʻá ku tala ki he tokotaha kotoa pē ʻoku ou sai pē koeʻuhí ke ʻoua te nau faʻa ʻeke fehuʻi mai, ka naʻá ku mokosia, vaivaia, mo helaʻia he taimi kotoa pē koeʻuhí ko e ʻikai ke kai ha meʻakaí. Naʻe ʻikai ke u toe saiʻia he ngaahi meʻa naʻá ku faʻa saiʻia aí. Naʻe aʻu ʻo ʻikai ke u toe lotu ki he Tamai Hēvaní. Naʻá ku ongoʻi halaia ʻi he ʻikai ke u aʻusia e tuʻunga ne totonu ke u ʻi aí.

ʻI he kamataʻangá, naʻe ʻikai ke u fie tui ʻoku ʻi ai haʻaku palopalema. Ka naʻe faifai pē peá u maʻu ha ongo mālohi ke u talanoa ki hoku kaungāmeʻa mamaé kau ki hoku faingataʻaʻiá. Naʻe ʻikai ke u teitei ʻilo ʻe hoko ʻeku talanoa ki ha taha ne u falala ki aí ke fakahaofi ai ʻeku moʻuí.

Naʻe tala ʻe hoku kaungāmeʻá ki heʻeku ongomātuʻá ʻa e meʻa ʻoku hokó, koeʻuhí ko ʻene hohaʻa kiate aú. ʻI he faifai peá u tala kiate kinaua ʻa e moʻoní, naʻá ku ongoʻi mālohi ange ʻa e ʻofa ʻa e Tamai Hēvaní ʻi ha toe taimi kimuʻa. Naʻe hāsino ia ʻi he ʻofa naʻe fakahā mai ʻe heʻeku ongomātuʻá mo e toenga ʻo hoku ngaahi kaungāmeʻá mo e fāmilí kiate aú. Naʻe tokoni ʻenau poupou faka-Kalaisí ke u tali ʻa e palopalema ki heʻeku uʻa kaí—pea ʻi he tokoni ʻa e Tamai Hēvaní, te u lava leva ʻo ikunaʻi ia.

Ko hono kamata ko ia ʻo ʻeku fakaakeaké ko e fononga faingataʻa taha ia kuó u fouá. Naʻá ku ʻi falemahaki he ʻaho kotoa pē ʻi he tuku ʻa e akó ke maʻu ha faleʻi mo e faitoʻo. ʻI he kamata ke u ongoʻi ʻoku siva ʻeku ʻamanakí ʻi he fonongá, ne u maʻu ha fiemālie ʻi he lotú mo hono lau ʻeku folofolá.

ʻOku ou kei fefaʻuhi pē mo ʻeku faingataʻaʻia ʻi he uʻa kaí, ka ʻoku ʻikai ke ne toe puleʻi ʻeku moʻuí. ʻOku mahino ki heʻeku Tamai Hēvaní hoku ngaahi faingataʻaʻiá, loto-mamahí, mo ʻeku ongoʻi halaiá, pea ʻoku ou ʻiloʻi he taimí ni ne ʻikai ke u foua toko taha kotoa ia. ʻI heʻeku fakakaukauloto ki he ʻafio mai ʻa e Tamai Hēvaní kiate aú, ʻoku ou ongoʻi hoku ikuʻanga taʻengatá. ʻOku lava ke u ongoʻi ʻEne ʻofa ʻiate aú—ko ha ʻofa te ne tokoniʻi au ke u ikunaʻi ha faʻahinga meʻa pē.

ʻOku nofo e tokotaha naʻá ne faʻú ʻi ʻAlapama, USA.