“Ko e Kau Pēteliaké: Ko Hai Kinautolu pea mo e ʻUhinga ʻOku Mahuʻinga Aí,” Ki Hono Fakamālohia ʻo e Toʻu Tupú, Fēpueli 2022.
Haʻu, ʻo Muimui ʻIate Au
Ko e Kau Pēteliaké
Ko Hai Kinautolu pea mo e ʻUhinga ʻOku Mahuʻinga Aí
Mahalo pē kuó ke fanongo ʻia ʻĒpalahame, ʻAisake mo Sēkope. ʻOku tau faʻa lau fekauʻaki mo kinautolu ʻi he Tohi ʻa Molomoná pea kuo pau ke lahi ange hoʻo fanongoa ʻa kinautolu ʻi hoʻo ako e Fuakava Motuʻá he taʻu ní. Koeʻuhí ko e fuʻu lahi e tokanga kiate kinautolú, pau pē ʻoku nau mahuʻinga ʻaupito, ʻikai ko ia? Kae mahalo ʻokú ke fehuʻi loto pē, “Ko e hā ʻoku mahuʻinga ai he ʻahó ni e kau tangata ʻe toko tolu ne nau moʻui ʻi he taʻu ʻe lauiafe kuohilí?” ʻĀsinga ai, ko e kī ki he tali ko iá ʻoku maʻu ia ʻi he ngaahi fuakava taʻengata mo e ngaahi tāpuaki kuo talaʻofa mai ʻe he ʻOtuá maʻanautolú.
ʻĒpalahame
Ngaahi tā fakatātā ʻa Jarom Vogel
Ko ʻĒpalahamé ko ha palōfita maʻongoʻonga ia. Naʻá ne angatonu mo talangofua ki he ngaahi fekau ʻa e ʻOtuá.
Naʻá ne papitaiso, maʻu e lakanga fakataulaʻeikí, pea silaʻi ki hono uaifi ko Selá ki he taʻengatá.
Naʻe fai ʻe he ʻOtuá ha fuakava mo ʻĒpalahame ʻe maʻongoʻonga hono hakó pea te nau maʻu e ngaahi tāpuaki tatau kuó ne maʻú.
Te nau ʻave ʻa e kakato ʻo e ongoongolelei ʻo Sīsū Kalaisí ki he ngaahi puleʻanga ʻo e māmaní.
ʻAisake
Ko ʻAisaké ko e foha ia ʻo ʻĒpalahame mo Sela.
Naʻe folofola ʻa e ʻOtuá kia ʻĒpalahame ke feilaulau ʻaki ʻa ʻAisake. Naʻe ʻofa ʻa ʻĒpalahame ʻia ʻAisake ka naʻá ne fili ke talangofua ki he ʻOtuá. Kimuʻa pea feilaulauʻi ʻe ʻĒpalahame ʻa ʻAisaké, naʻe talaange ʻe ha ʻāngelo kia ʻĒpalahame ke tuku. Ko e loto-fiemālie ko ia ʻa ʻĒpalahame mo ʻAisake ke talangofua ki he ʻOtuá ko ha fakataipe ia ʻo e Fakalelei ʻa e ʻAlo Tofu Pē ʻe Taha ʻa e ʻOtuá ne Fakatupú.
Naʻe talaʻofa kia ʻAisake ʻa e ngaahi tāpuaki tatau pē mo ʻĒpalahamé.
Sēkope
Hangē pē ko ʻene tamaí mo e kuitangatá, naʻe tui faivelenga ʻa Sēkope ki he ʻOtuá.
Koeʻuhí ko e faivelenga ʻa Sēkopé, naʻe liliu ai ʻe he ʻEikí ʻa hono hingoá ko ʻIsileli, ʻa ia ko hono ʻuhingá ko e “tokotaha ʻoku ikuna mo e ʻOtuá” pe “tuku ke ikuna ʻa e ʻOtuá” (vakai, Bible Dictionary, “Israel”).
Naʻe toko 12 ʻa e ngaahi foha ʻo Sēkopé. Naʻe ʻiloa e ngaahi foha ko ʻení mo honau ngaahi fāmilí ko e faʻahinga ʻo ʻIsilelí.
Ko e fuakava naʻe fai ʻe he ʻOtuá mo ʻĒpalahamé naʻe fakafoʻou ia mo Sēkope mo ʻene fānaú.
Ko e Kau Pēteliaké mo Koe
ʻI hoʻo hoko ko e mēmipa ʻo e Siasí, ʻokú ke hoko ai ko ha hako ʻo ʻĒpalahame, ʻAisake, mo Sēkope. ʻOku ʻaonga kiate koe ʻa e fuakava ne nau fai mo e ʻOtuá!
ʻOkú ke maʻu e tāpuaki mo e fatongia ke fai hoʻo fakamoʻoni ki he Fakamoʻuí pea vahevahe ʻa e ongoongoleleí.
ʻOku uiuiʻi foki koe ke ke fakaafeʻi e tokotaha kotoa pē ke ne fakahoko mo tauhi ʻa e ngaahi fuakavá pea maʻu ʻa e ngaahi ouau ʻo e lakanga fakataulaʻeikí. Naʻe pehē ʻe Palesiteni Lāsolo M. Nalesoni ko e konga kotoa ʻeni ʻo hono tānaki fakataha ʻo ʻIsilelí, ʻa ia ko e “meʻa mahuʻinga taha ʻoku hoko ʻi he māmaní ʻi he ʻaho ní” (“ʻAmanakiʻanga ʻo ʻIsilelí,” [fakataha lotu fakaemāmani lahi ʻa e toʻu tupú, 3 Sune 2018], 8, ChurchofJesusChrist.org).